Salmos 90:1-17
(Ivampoyeane Moiseshi)
90 ¡Notasorentsite, avirotaque jocaacoventanari peerani irosati meeca!
2 Pitimitani tequerani povetsiquero toncaaripee aisati tequera ontimeni quipatsi;peerani catsini, irosati coajica avirotaque Tasorentsi.
3 Pipeiri atiri impianajea quipatsivane, ariorica pincante:“Pimpeanajea quipatsivane, tempa aviro atiri.”
4 Queario ora caratatsiri mil osarentsipee,oquempetimotaquempi aparo quitaiteri avisanaintsiri oshaiteeji;aisati oquempetaro avisanaque aparo tsiteniri.
5 Paajeitiri atiripee shintsi,iquempetacaro mishiveerentsi avishitachari,
6 aisati iquempetacaro tojari iroaquera shiocatsi;ariorica onquitaiteamane, oteaquireaveta cameetsa.Iro cantaincha ishaavijiitanajerica oshimpeshitanaje, oncamanaje.
7 Queariotaque ora piisanca otsoncana oimintsaroajeitana.
8 Piotasanotaquero nantayetiri caari cameetsatatsi,tecatsi manimotempine.
9 Queariotaque ontsoncajeitena piisanca;eiro osamaniti nontimajeite, oquempetacaro nanenqui.
10 Ocarati 70 nosarentsite naneajeiti,yora shintsitasanotatsiri, oncarate 80 irosarentsite.Iro cantaincha nonquimoshireventavetearo naneantari,oshequi ashireena antaveerentsi.Ora osarentsipee intsipaite avishi, aitaque aquempejeitarori.
11 ¿Jaanica iotirori oashinoncanti piisanca?¿Jaanica iotirori pitsimaasanota?
12 Poametasanojeitena jaoca oncarate nanee,nomatantearori niotero iotantsi, nosavicanteari cameetsa.
13 ¡Notasorentsite, pinquenqueshireacojeitajena!¿Jaoca oncarate poisamaninqueero?¡Pineshinoncajeitajena, narojei quemisantajeitimpiri!
14 Ariorica onquitaiteamanaje, piotacaajeitena pinintana,irosati nonquimoshireantanajea,nompampoyeacoventempi noncantaitatiyempani.
15 Pinquimoshiretacaajena maaroni, osarentsipeequi,onquempetajearo peerani nashinoncaajeivetaca.
16 ¡Ponijaajeiteri quemisantajeitimpiri aisati iriori irishanincajeitajeari,irineajeiterota pimayetiri aisati pitasorenca!
17 Irio Atasorentsite cavintsaanojeiteene.¡Pintasoncacoventenaro nantayetiri,aitaque pimataquero!
