YOTAANTSI 3
¿Jaanika pakerori Bibiria?
1. ¿Jaanika ashitarori Bibiria?
Okamantempi Iriñane Tasorentsi pisaikantyari pinkantaitatiyempani (Salmos 37:29). Isankenare Tasorentsi otimi okarati 66 sankenarentsipee, aisati 40 kemisantajeitatsiniri isankenatakero Iriñane Tasorentsi. Yora Moiseshi isankenatakero Génesis irosati Deuteronomio, aisati yora Joa isankenatakero oberantapaakarori sankenarentsi pajitachari Irantayeteri Jesoquirishito, iro kantaincha ora Bibiria kaari oni iriñane atiri, irointi iriñane Tasorentsi. Yora Tasorentsi ipakero ishintsinka kemisantatsiri isankenatantyarori iriñane (Éxodo 34:27). Piyotake meeka, ora Bibiria irointi iriñane Tasorentsi Yioba. Piñanatero 2 Timoteo 3:16; 2 Petero 1:20, 21.
Pamenero shiakaantsi ¿Jaanika ashitarori Biblia?
2. ¿Paita pinkemisantantyarori Bibiria?
Ora Bibiria okanti keariotasanotatsiri, tempa irointi iriñane Tasorentsi. Yora Tasorentsi te inkempetyariji atiri, te intseeyempa. Imonkaratasanotakero iriori maaroni (Josué 23:14). Apinti irinti Tasorentsi mayetirori maaroni. Piñanatero Tito 1:2, 3.
Ora Bibiria irointi kameetsaperori, tempa irashi Tasorentsi. Osheki atiri chora Iriñane Tasorentsi, onashijeita iñanepee. Keario ora Bibiria irointi peesato, iro kantaincha obamejeitee jaoka okantari kipatsi, inkite, maaroni. Omabetakea isankenatakero Iriñane Tasorentsi okarati 40 shirampari, iro kantaincha irointi apaniro. Inintasanojeiteri Tasorentsi maaroni atiripee, irootake ipantakerori iriñane. Ora Bibiria opashinitakaajeiteri ashaninka aisati ari iramitakotakeri irantantyarori kameetsatatsiri. Meeka piyotasanotiro ora Bibiria te ontseeyempa, te amatabitempiji. Piñanatero 1 Tesaronicasati 2:13.
Pamenero shiakaantsi ¿Paita pinkemisantantyarori Biblia?
3. ¿Paita okamantimpiri Iriñane Tasorentsi?
Iriñane Tasorentsi okamantimpiri, yora Tasorentsi irobameetsatero kipatsi, kameetsa irisaikantyari ashaninkapee. Aisati okantimpiri, peerani intanakarori yora Aran jero ijina yamashitakaro, irootake meeka te añero kameetsa kipatsi, iro kantaincha korake saikaantsi kameetsa. Piñanatero Irantayeteri Jesoquirishito 21:4, 5.
Ora Bibiria timatsi ikantakantiri, yobametantiri Tasorentsi. Aisati okantimpiri jaoka ikantajeitiriri Tasorentsi atiripee kameetsatatsiri, kaari kameetsatatsi. Ariorika piyotero oka, aitake piyotasanotero jaoka ikantayetari Tasorentsi, impoiji pimatero pishaninkatajeari iriori. Piñanatero Salmos 19:7, 11; Santiaco 2:23; 4:8.
4. ¿Paita piyoteri ariorika piñanatero Bibiria?
Peerani yora Jesoshi yobametapinitakeri atiripee okantiri isankenare Tasorentsi. Aisati piyotantyarori Iriñane Tasorentsi, oka sankenarentsi amitakotempine, tempa timatsi osheki sankenajeitachari Bibiriaki. Piñanatero Irocashi 24:27, 45.
Maaroni ikamantimpiri Tasorentsi irointi kameetsatasanotatsiri, iro kantaincha pashinipee ashaninka itseenkiro okantiri Bibiria, irootake ikisantari, ¡eiro pikemisantiritsi iriori! Irointikea aikero pijatatiye pishitoriatero Bibiria pañantyari pinkantyani. Piñanatero 1 Timoteo 2:4.
