YOTAANTSI 2
¿Jaanika Tasorentsi?
1. ¿Paita okameetsatantari anintasanoteri Tasorentsi?
Yobetsikakeri Tasorentsi maaroni timayetatsiri. Peerani katsini aisati meeka irosati koajika ari itimake (Salmos 90:2). Apinti Tasorentsi ikamantajeitena kameetsari ñaantsi (1 Timoteo 1:11). Iritake oañantatsiri irootake ankemisantantyariri iriori. Piñanatero Irantayeteri Jesoquirishito 4:11.
2. ¿Jaoka ikantayetari Tasorentsi?
Tekatsi materone atiri ñerine Tasorentsi, tempa te añeroji ibatsa, itonki, irinti kempe tampea, iro kantaincha yanaakotiri maaroni timayetatsiri (Joa 1:18; 4:24). Pinkoakerika piyotero jaanika Tasorentsi pamenero maaroni yobetsikakeri iriori. Okempeta, pamenero maaroni piratsipee aisati chochokipee, ari piyotakeri yora betsikirori irinti yotinkari aisati inintajeitakee maaroni. Pamenero impokiropee, katsirinkaiteri aisati maaroni, piyoteri yora Tasorentsi chora ishintsinka katsini. Piñanatero Oromasati 1:20.
Aisati piyotantyarori jaoka ikantari Tasorentsi, piñanatero ora Bibiria, oka sankenarentsi obametempi pantantyarori kameetsatatsiri, ari pinkimoshiretakayeri Tasorentsi, irointikea panterorika kaari kameetsatatsi pobashiretakayeri iriori. Piñanatero Salmos 103:7-10.
3. ¿Jaoka ipajitari Tasorentsi?
Ikantakeri Jesoshi: “Apa jenokisati, nopinkatsatasanotiro pibajiro” (Mateo 6:9, TNM). Ikantabeta aparopee ashaninka: “Paba, Tasorentsi, Abinkatsarite”, iro kantaincha kaari ibajirosanori, irointi timatsi ibajirosanori ipajita Yioba. Aparopee Bibiria iñaneki chori okanti Yavé aisati Jehová. Piñanatero Salmos 83:18, TNM.
Pashinipee Bibiria te onkonijateji ibajirosanori Tasorentsi, apaniro okanti: “Tasorentsi, Abinkatsarite”, iro kantaincha anta sankenarentsiki peesatoni, ari okonijatake ibajirosanori Tasorentsi pajitachari Yioba okaratake 7.000. Yobametakotakeri Jesoshi atiripee ibajiro iriri. Piñanatero Joa 17:26.
Pamenero shiakaantsi ¿Jaoka ipajitari Tasorentsi?
4. ¿Ikenkeshireakotimpi Tasorentsi abirori?
Pamenero oka, aparoni shirampari ikenkeshireakotiro irishinto, aisati Tasorentsi ikenkeshireakotimpi abirori
Ari inintakempi Yioba abirori, irosati, ¿paita pashinonkantari? Aparopee ikantashita: “Yoashinonkaakempi Tasorentsi” iro kantaincha irointi, ¡antaroite tseeyantsi! Piñanatero Santiaco 1:13.
Ikantimpi Tasorentsi: “Pinkoyeanontya paita pikoiri”. ¡Okameetsati pantabeeteneri iriori! (Josué 24:15). Iro kantaincha, osheki atiripee yantayetiro kaari kameetsatatsi irootake ashinonkajeitantari, maaroni oka obashiretakayeri Yioba. Piñanatero Génesis 6:5, 6.
Tempa inintakee Yioba arori, intsonkero oashinonkaantsi, kaari kameetsatatsi, ikoiri iriori kameetsa asaikajeite. Impoiji, yotaantsiki 8 piyotero, ¿paita ishinetantakarori Tasorentsi ashinonkajeita? Piñanatero 2 Petero 2:9; 3:13.
5. ¿Jaoka pinkantyari pinkempejitantyariri Tasorentsi?
Ariorika pinkenketsatakayeri Yioba ari intsipatakempi iriori, tempa ikenkeshireakotimpi abirori (Salmos 65:2; 145:18). Iyotakempi Yioba ainiro pantane, iro kantaincha ikoasanoti inkabintsayempi. Ari pimatakero pitsipamintsantyariri iriori. Piñanatero Salmos 103:12-14; Santiaco 4:8.
Ontimatiye pininteri Tasorentsi tempa itimakaakempi abirori (Maricoshi 12:30). Ariorika piyotakotero jaoka ikantari Tasorentsi aisati pinkemisanteri iriori, ari pinintakeri. Aitake pitsipamintsantyari Yioba. Piñanatero 1 Timoteo 2:4; 1 Joa 5:3.
