YOTAANTSI 10
¿Jaanikampa kemisantaperotatsiri?
1. ¿Jaanikampa kemisantaperotiriri Tasorentsi?
“Yamatavijeitimpicari shiavetariri quenquetsatacotiriri Tasorentsi” (MATEO 7:15).
Yobametakeri Jesoshi irobamerepee jaoka inkantyari inkemisantaperotantyariri Tasorentsi. Oka oshiakanta kameetsa aotsi (Mateo 7:14). Yora Tasorentsi inintasanotiri maaroni ashaninkapee kemisantirori iriñane. Yora kemisantaperojeitatsiri yaniitanake iraotsiteki Tasorentsi. Piñanatero Joa 4:23, 24; 14:6; Ejesosati 4:4, 5.
Pamenero shiakaantsi ¿Jaanikampa kemisantaperotiriri Tasorentsi?
2. ¿Paita ikantakotakeriri Jesoshi kaari kemisantaperotatsiri?
“Icantanirojeiveta yoranqui: ‘Niotiri Tasorentsi’, iro cantaincha te irisavique cameetsa” (TITO 1:16).
Ikamantakee Jesoshi ontime koajika kemisantashiyetachari iramatabiteri atiripee. Yokapee amatabijeitantatsiri ikantashita: “Nokemisantiri Jesoshi”, iro kantaincha osheki yantayetiro kaari kameetsatatsi, aisati ikomitakayeri pashinipee. Iro kantaincha ari pimatakero piyoteri jaanika kemisantaperotiriri Tasorentsi, tempa yantayetiro kameetsatatsiri aisati kameetsa yobametiri itsipapee. Piñanatero Mateo 7:13-23.
3. ¿Jaanika antirori ikoakaakeriri Tasorentsi?
Yora kemisantaperotatsiri yantayetiro oka:
-
Ipinkatsatasanotiro Iriñane Tasorentsi. Osheki ashaninka yantayetiro yametakaro, irintikea kemisantaperotatsiri, paitapeerika tekera iranteroji ikenkeshirero ikoakaakeriri Tasorentsi (Mateo 15:7-9). Aisati imonkaratiro maaroni yobametakeriri. Piñanatero Joa 17:17; 2 Timoteo 3:16, 17.
-
Yobametanti ibajirosanori Tasorentsi, irointi Yioba. Yora Jesoshi yobametakeri atiripee jaoka ipajitari iriri, aisati jaoka ikantari iriri, impinkatsatantyariri Tasorentsi (Mateo 6:9). Anta pinampiki, ¿jaanikampa kantimpirori ibajirosanori Tasorentsi? Piñanatero Éxodo 3:13, 15; Joa 17:26.
-
Yobametanti Ipinkatsaritantari Tasorentsi. Isaikabeitani Jesoshi aka kipatsiki yobametakeri atiripee jaoka inkantyari Tasorentsi impinkatsaribentantyariri maaroni (Irocashi 4:43; 8:1; 23:42, 43). Irosati meeka, yora kemisantaperotatsiri ikamantiri pashinipee paita iranteri Tasorentsi koajika. Anta pinampiki, ¿jaanikampa kamantakojeitirori Ipinkatsaritantari Tasorentsi? Piñanatero Mateo 24:14.
-
Te inkempeempariji tseenkantatsiri. Yora kemisantaperotatsiri eiro yoijatiritsi pinkatsaripee, eiro yantabakaatsi aisati eiro ipeatsi rondero (Joa 17:16; 18:36). Aisati eiro ikoasanotirotsi irantero yantapinijeitiri tseenkantatsiri. Piñanatero Santiaco 4:4.
-
Inintaperotabakaajeitya. Yora kemisantaperotatsiri inintajeitiri chori, birakocha, maaroni. Tempa Iriñane Tasorentsi obametee maaroni atiripee akempetabakaajeita (Éxodo 20:13). Yora kaari kemisantaperotatsiri yajirikakero itonkamento, yobakeri pashinipee, iro kantaincha, kemisantaperotatsiri te iranteroji oka, irointikea, yobametakotirori Iriñane Tasorentsi aisati yamitakotiri ashaninkapee. Piñanatero Joa 13:34, 35; 1 Joa 4:20.
4. ¿Piyotimpa jaanika kemisantaperotiriri Tasorentsi meeka?
Anta pinampikinta, ¿jaanikampa obametakotimpirori Bibiria, ibajirosanori Tasorentsi aisati Ipinkatsaritantari Tasorentsi? ¿Jaanika piñakeri inintabakaajeita, te irantabakayempaji? ¿Paita pikantiri abirori? Piñanatero 1 Joa 3:10-12.
