YOTAANTSI 6
¿Jaoka irijateri kamayetaintsiri?
1. ¿Arimpa intinaanaje kamayetaintsiri?
Isaikabeitani Jesoshi aka kipatsi, itsipatari Irasaro kamake, yoka shirampari isaikini nampitsiki pajitachari Betania. Yareetantapaakari Jesoshi abisanake okarati cuatro kitaiteri ikamantakari Irasaro. Impoiji yora Jesoshi jero iritsiropee Irasaro, Marita, María aisati pashini ishaninkapee ijajeiti imorokinta Irasaro. Yora Jesoshi yoitinaajiri Irasaro. ¿Piyotimpa abirori jaoka okantashiretakari iritsiropee Irasaro? Piñanatero Joa 11:21-24, 38-44.
Ora Bibiria okamantimpiri, koajika ari intinaanaje kamayetaintsiri.Ora Marita oshiretakari Tasorentsi Yioba irointinaajeri kamayetaintsiri, kameetsa irisaikantyarori kipatsiki. Piñanatero Joa 11:25.
2. ¿Jaoka irijateri kamayetaintsiri?
Ikantakeri Tasorentsi Aran: “Pimpeanajea kipatsi tempa abirotake kipatsi” (GÉNESIS 3:19).
Maaroni atiripee arojeitake kipatsibane (Génesis 2:7; 3:19). Ainiro kantashiyetachari: “Ariorika inkame atiri irisokije ishire, ikenakenayetake, oimintsaroakairiri pashinipee”, maaroni oka, irointi tseeyantsi. Yora kaminkaripee te inkenkeshirempaji, te inkatsiteji. Intinaantajari Irasaro, te inkanteji: “Nojaiti inkiteki, nojaiti sharinkabeniki”, tekatsi inkante. Piñanatero Salmos 49:17, 19; 146:4.
Aparopee atiri ikantashita: “Yora Tasorentsi intaayeri antayetirori kaari kameetsatatsi anta sharinkabeniki”, irointi oka ¡antaroite tseeyantsi! Meeka piyotakeri yora kamayetaintsiri impeanajea kipatsi, aisati ompeanajea ikenkeshireyebetari. Yora Tasorentsi eiro katsini itaairitsi ashaninka paamariki tempa iritake Apa, yashi yoiro inintanti. Piñanatero Deuteronomio 12:31.
Pamenero shiakaantsi ¿Paita abisatsineri ankamakerika?
3. ¿Arimpa pinkenketsatakayeri kamayetaintsiri?
Yora kamayetaintsiri, te irimateroji iñabete, te inkemeji (Salmos 115:17). Yora inampirepee kamaari ishiakotiri iriñane kamayetaintsiri, tempa ikoi iramatabijeiteri ashaninkapee (Jorashi 6). Irootake kaari ikoanta Tasorentsi pabentyari kenketsatakairiri kamayetaintsiri. Piñanatero Deuteronomio 18:10, 11.
4. ¿Jaanika kamayetaintsiri tinaajanchaneri?
Osheki kamayetaintsiri intinaanaje irisaikantyarori kipatsiki. Aparopee ashaninka te iriyoteriji Tasorentsi, omabetakea yantakero kaari kameetsatatsi, ari intinaanaje. Piñanatero Irocashi 23:43; Itiancaneni Jesoshi 24:15.
Ariorika intinaanaje atiripee, aparoni kemisantatsiri irobameteri iriyotantyariri Yioba jeri itomi, aisati inkemisantantyariri iriorijei (Itiancaneni Jesoshi 10:42). Irimonkaraterorika ikantiri Tasorentsi, inkantyani isaike iroakerari kipatsiki. Piñanatero Joa 5:28, 29.
5. ¿Paitakea Tasorentsi intinaantajeariri kamayetaintsiri?
Tasorentsi Yioba irointinaajeri kamayetaintsiri tempa inintasanojeitakee. Aisati itiankakeri itomi ikamimentajeitakee, irootake amatantyari añapaajeri ashaninka kamaintsiri. ¿Jaanikampa pikoi piñajeri abirori? Piñanatero Ejesosati 1:7, 8; 1 Corintosati 15:26.
