YOTAANTSI 5
¿Paita otimantari kipatsi?
1. ¿Paita yobetsikantakarori Tasorentsi kipatsi?
Yobetsikakero Yioba kipatsi intimantyari atiripee. Yobetsikantakariri Aran jero ijina irisaikantyarori aka kipatsiki, te irisaikeji anta inkiteki. Irointi, yora inampirepee Tasorentsi isaiki anta inkiteki (Jorashi 6). Yora Tasorentsi yobakeneri Aran ibankiremashiki Eren (Génesis 2:15-17). Ikoasanotake iriori, ishaninkajeitakari Aran irashitasanotyaro kipatsi inkantyani. Piñanatero Salmos 37:29; 115:16.
Ora ibankiremashiki Eren irointini orijaniki. Yora Aran irishekiasanojeitanake katsini itomipee, aisati kapichaji, kapichaji irantero kipatsi oshiari ibankiremashi Eren (Génesis 1:28). Ora kipatsi irointi ibanko atiri, ontime onkantyani, eiro opeatsi. Piñanatero Salmos 104:5.
Pamenero shiakaantsi ¿Paita yobetsikantakarori Tasorentsi kipatsi?
2. Meeka, ¿paita kaari otimanta kameetsari kipatsi?
Yoimisokijajeitakeri Tasorentsi yora Aran aisati Eva, tempa te inkemisanteriji iriori. Irootake opeantakari ibankiremashi Eren, tekatsi betsikerone. Ora Bibiria okanti, osheki atiripee kaari kameetsatatsi yaakero kipatsi (1 Joa 5:19). Piñanatero Génesis 3:23, 24.
¿Imonkaraterompa Tasorentsi maaroni ikantayetakeri peerani? Ari imatakero. Tempa irinti shintsiperotatsiri aisati mayetirori maaroni (Salmos 119:90). Kapichanibaniji yora Tasorentsi irisabikakaajeiteri atiri aka kipatsiki inkantyani. Piñanatero Salmos 37:11, 34.
3. ¿Jaoka inkantyari Tasorentsi irobameetsatantyarori kipatsi?
Ikoyeakeri Tasorentsi itomi irobameetsatantyarori kipatsi. Yora itomi intsipajeityari inampirepee Tasorentsi intsonkajeiteri maaroni kisanentiriri iriori, obayeritaantsiki pajitachari Aramakeroni. Impoiji iriorijei irashitakoteri kamaari aisati iroisotasanoteri onkarate 1.000 osarentsipee. Iro kantaincha Tasorentsi intikakobenteri maaroni kemisantajeitatsiri aisati irisabikakaajeiteri iroakerari kipatsiki inkantaitatiyempani. Piñanatero Irantayeteri Jesoquirishito 20:1-3; 21:3, 4.
4. ¿Jaoka onkarateri ontsonkajea pashinonkaka?
¿Jaoka onkarateri Tasorentsi intsonkero kaari kameetsatatsi? Ikantakeri Jesoshi: “Ontime iramanatabakaajeitya, itashe, irojokiitya atiripee”. Ariorika pamenero oka, ari piyotake koraketaintsi impoke Jesoshi. Piñanatero Mateo 24:3, 7-14, 21, 22.
Ariorika Jesoshi impinkatsaribentero kipatsi onkarate 1.000 osarentsipee, intsonkero maaroni ashinonkaantsi (Salmos 72:7). Tempa irinti Jesoshi pinkatsari, aisati irinti jibatakantiriri sacerotepee, irishajero irantane kaari kameetsatatsi maaroni nintajeitiriri Tasorentsi. Eiro añajiritsi jokiijeitachari, kenkibaripee aisati kaminkaripee. Piñanatero Mateo 15:30; 1 Corintosati 15:26.
5. ¿Jaanika sabikajeitatsine iroakerari kipatsi?
Anta apatotaantsipankoki yorajei kemisantiriri Yioba piñajeri ashaninka kameetsari, aisati piyotero okantiri Bibiria
Maaroni kemisantiriri Tasorentsi irisabikajeite iroakerari kipatsiki (1 Joa 2:17). Ikantakeri Jesoshi oijajeitiriri: “Pobamejeiteri atiri kameetsatatsiri”. Meeka Yioba yobamejeitiri atiripee irisabikantyarori iroakerari kipatsi (1 Timoteo 2:4). Abiro apa, ina, ebankari, jananeki, maaroni, pijate yapatotantari yorajei kemisantiriri Yioba piyotantyarori ikantimpiri Tasorentsi, aisati kameetsa pisaikantyari. Piñanatero Irantayeteri Jesoquirishito 15:4.
