Meeka osheki atiri yapatotimentajeitiri ikemisantiri Tasorentsi, kameetsa ikantajeita. Aisati yora Tasorentsi inintajeitiri, ikenkeshireakojeitiri iriorijei. Iro kantaincha timatsi kaari kemisaperotatsiri antayetirori kaari kameetsatatsi (2 Corintosati 4:3, 4; 11:13-15). Aparopee kemisantashiyetachari yobajeitakeri ashaninkapee, ikoshitaka, yantashiyetari jananeki, irootake ashaninkapee itseenkantariri Tasorentsi. Piñanatero Mateo 24:3-5, 11, 12.

Yora kemisantaperotatsiri ipinkatsatasanotiri Tasorentsi Yioba, irointikea kaari kemisaperotatsiri yobashiretakairi iriori, tempa yobametiri ashaninkapee, yora kamayetaintsiri irijate inkiteki irompa paamariki, oka irointi tseeyantsi. Iro kantaincha, yora Yioba ikoiri ashaninkapee iriyotantyarori keariotasanotatsiri. Piñanatero Salmos 146:4; 1 Timoteo 2:3-5.

Yora Tasorentsi iyotasanotiro yantayetiri kaari kemisantaperotatsiri, eiro yamatabitiritsi iriori (Santiaco 4:4). Peerani, isaikabeitani Noé chorani aparoni nampitsi pajitachari Baberi, anta intanakaro kaari kameetsatatsi. Irootake meeka maaroni kaari kemisantaperotatsiri iro jitachari “Antyaro oni Babironia”. Koraketaintsi yora Tasorentsi intsonkaperoteri maaroni kemisantashiyetachari. Piñanatero Irantayeteri Jesoquirishito 17:1, 2, 5, 16, 17; 18:8.

Osheki atiripee ikemiri kaari kemisantaperotatsiri, iro kantaincha Tasorentsi Yioba irameneri kameetsari ashaninka irampatojeiteri, aisati intiankeri kemisantaperotatsiri irobametantyarori keariotasanotatsiri. Piñanatero Joa 6:45; Irantayeteri Jesoquirishito 7:9, 15.

Yora Tasorentsi inintiri maaroni koatsiri ikemiri iriori, aisati antirori kameetsatatsiri. Irootake ikantantimpiri pinijantareajeri kemisantashiyetachari. Pinintiririka Tasorentsi Yioba, eiro kiso poajeitiritsi kaari kameetsaperotatsiri. Piñanatero Irantayeteri Jesoquirishito 18:4.

Peerani osheki atiri ikemisantakero yobametakeriri irobameresanoripee Jesoshi, irootake iyotantakarori keariotasanotatsiri, kimoshire ikantajeita. Aisati ora Bibiria obametempi abirori kameetsa pisaikantyari, aisati poijatasanoteri Tasorentsi Yioba. Piñanatero 1 Tesaronicasati 1:8, 9; 2:13.

Maaroni jokiriri kaari kemisantaperotatsiri, impoiji inkarateri kemisantaperotatsiri, yora Yioba inintiri iriorijei. Ariorika pinkarateri kemisantaperojeitatsiri piñajeri kameetsari ashaninka, impoiji kameetsa pisaike, pinintabakaajeitya, koajika onkantyani pintime iroakerari kipatsi. ¿Pikoimpa paayero oka? Piñanatero Maricoshi 10:29, 30; 2 Corintosati 6:17, 18.

Koraketaintsi intsonkeri Tasorentsi maaroni kaari kemisantaperotatsiri, eiro añajiritsi iriorijei. Apaniro saikajeitatsine kemisantaperotiriri Tasorentsi. Aitake kameetsa antime ankantaitatiyempani. ¿Okameetsatimotimpiri ikantimpiri Tasorentsi? Piñanatero Irantayeteri Jesoquirishito 18:20, 21; 21:3, 4.