Peerani intanakarori aparoni inampire Tasorentsi irintini kameetsatatsiri, iro kantaincha impoiji ikenkeshireapinitakero kaari kameetsatatsi, tempa ikoabeta irishiarime Tasorentsi, irootake ipeantakari tseeyachari, ipajita kamaari aisati Satanashi (Joa 8:44). Yora kamaari yamatabitakero Eva, impoiji iroori jeri ojime te inkemisantajeiteriji Tasorentsi, irootake yashinonkantari maaroni atiripee. Piñanatero Génesis 3:1-6, 19.

Yora kamaari ikantimatiro ipinkatsariti Tasorentsi, aisati pashinipee atiri yoijajeitakeri kamaari, te impinkatsajeiteriji Tasorentsi. Meeka kamaari ipinkatsaribentiro kipatsi. Piñanatero Joa 14:30; 1 Joa 5:19.

Maaroni yobetsikakeri Tasorentsi irointi kameetsaperotatsiri. Jibataintsiri atiripee aisati inampirepee Tasorentsi imaterome inkemisanterime Tasorentsi, iro kantaincha te inkemisantajeiteriji iriori (Deuteronomio 32:4, 5). Yora Tasorentsi ishinetee arori ankoyeanontya paita anteri, te irishintsinateeji. Okameetsati ankemisanteri iriori tempa anintasanotiri. Piñanatero Santiaco 1:13-15; 1 Joa 5:3.

Meeka osheki atiri yashinonkaka tempa pinkatsariyetatsiri ipinkatsaribentiri pashinipee, yora Tasorentsi ishinetiro oka, ¿paitakea? Iriyotantyarori atiripee apaniro irinti Tasorentsi kameetsa pinkantsari (Éxodo 1:13, 14; Deuteronomio 32:5). Ari ayotake, tekatsi pinkatsari materone intsonkero kaari  kameetsatatsi, mantsiarentsi aisati antabakaachari. Piñanatero Oromasati 9:17.

Maaroni ishaninkajeitakari Tasorentsi kameetsa irisabikajeite (Deuteronomio 5:29). Irotaintsi, yora Tasorentsi Yioba intsonkeri maaroni pinkatsariyetatsiri kipatsisati. Apaniro pinkatsajeitiriri Tasorentsi irisabikajeite aka kipatsiki (Salmos 37:11). Piñanatero 1 Corintosati 15:24.

Pamenero shiakaantsi ¿Paita ishinetantari Tasorentsi abashinonkayea?

Yora kamaari ikantashitimpi: “Pikemisantiri Tasorentsi tempa yamitakotakempi, ipakempi koiteimotakempiri”, irinti ikantimatanti. Ariorika pinkemisantasanoteri Tasorentsi, ari pimatakero piyotakayeri kamaari irinti tseeyachari, aisati pinkimoshiretakayero irasankane Tasorentsi Yioba. Piñanatero Proverbios 27:11; Irantayeteri Jesoquirishito 12:10.

Pijibate piyotero paita ikoiri Tasorentsi, impoiji pantayetero ikoakaakempiri iriori (Joa 4:23). Pijokeri kamaari, eiro poijatiritsi pinkatsaripee aisati eiro pantabakaatsi, eiro pipiatsi rondero, irointikea pinkempetyari Jesoshi. Piñanatero Joa 17:14.

Meeka yora ashaninka yaimentaro ijina, ikoshitabakaaka, ikishimentabakaaka, yantayetiro ikoakaakeri kamaari. Ariorika poijateri Jesoshi irishirontimentempi pishaninkasanori (1 Petero 4:3, 4). Eiro pobashiretatsi, pinkarajeiteri kemisantiriri Tasorentsi, ari iramitakotakempi pantabeeteneri Tasorentsi. Ompomerentsitimobetakea, pinkemisanteri Tasorentsi, ari pijokakeri kamaari, irinti itseeya. Piñanatero 1 Corintosati 6:9, 10; 15:33.

Inintasanotimpi Tasorentsi irootake ikantantimpiri iriori koajika eiro piñajirotsi kaari kameetsatatsi. Maaroni abentariri Tasorentsi kameetsa intimajeite aka kipatsiki inkantyani. Piñanatero Proverbios 2:20, 21.