YOTAANTSI 14
¿Paita yantayetiri maaroni kemisantaperotatsiri?
1. ¿Paita ikoyeantakariri Tasorentsi ishiraerisatipee peerani?
Yapatojeitantakariri Yioba ishaninkajeitakari Abaramani, impoiji ipakeri ikantakantiri aisati ipajitakeri Ishiraeri, apaniro irintini kemisantajeitiriniri iriori (Salmos 147:19, 20). Itasonkakobentakeri Yioba ishiraerisatipee, impoiji itasonkakobentajeiteri maaroni atiripee aisati. Piñanatero Génesis 22:18.
Yora Tasorentsi ikoyeajeitakeri ishiraerisatipee irobametakotantyarori ibajiro Tasorentsi, ikemisantajeitantakariri Tasorentsi kameetsa isaikajeiti (Deuteronomio 4:6). Aisati yora ishiraerisatipee ikamantajeitiniri pashini nampitsipeeki iriyotantyariri Tasorentsisanori. Piñanatero Isaías 43:10, 12, TNM.
2. ¿Paita yantayetiri kemisantaperotatsiri?
Yora ishiraerisatipee te inkemisantajeiteriji Tasorentsi, irootake ikoyeantakariri Tasorentsi oijajeitiriri Jesoshi (Mateo 21:43; 23:37, 38). Meeka apaniro kemisantajeitiriri Yioba ikamantajeitiri maaroni ashaninkapee jaoka ikantari Tasorentsi Yioba. Piñanatero Itiancaneni Jesoshi 15:14.
Yora Jesoshi yobameetsajeitakeri irobamerepee inkamantantyariri pashinipee aisati inkemisantakaajeiteri (Mateo 10:7, 11; 24:14; 28:19, 20). Irosati meeka yora kemisantaperotatsiri imonkaratiro ikantakeri Jesoshi, irootake yobamejeitantariri maaroni ashaninkapee. Aisati meeka, yora Yioba yapatojeitiri yokapee ashaninka inkemisantajeitantyariri iriori (Irantayeteri Jesoquirishito 7:9, 10). Ariorika yapatojeita yora kemisantaperotatsiri yamitakotabakaajeita, yoimoshirenkabakaajeita, aisati anta yapatotantari yorajei kemisantiriri Yioba, iyojeitiro Iriñane Tasorentsi, kaari onashiyeta iyotabakeri. Piñanatero Ijorioririnte 10:24, 25.
3. ¿Jaoka okantari intantanakarori yorajei kemisantiriri Yioba?
Osarentsiki 1870, aparopee kemisantatsiri yapatojeitaka ishitoriajeitantyarori Iriñane Tasorentsi aitake iñakero kearioperotatsiri, yokapee ishiari irobamerepee Jesoshi. Yora kemisantaperotatsiri ikamantanti maaroni nampitsipeeki, aisati yobamejeitiri atiripee jaoka ikantari Tasorentsi ipinkatsaribentanti. Osarentsiki 1931 yora kemisantaperojeitatsiri irinti pajitachari yorajei kemisantiriri Yioba. Piñanatero Itiancaneni Jesoshi 1:8; 2:1, 4, 11; 5:42.
4. ¿Paita yantayetiri yorajei kemisantiriri Yioba?
Peerani itimini aparopee kemisantatsiniri irintini jibatakantiriri oijajeitiriri Jesoshi, yorajei ipinkatsajeitakeri Jesoshi. Aisati meeka chora jibatakantiriri maaroni kemisantiriri Yioba, yamenakobentajeitiri kemisantajeitatsiri sabikajeitatsiri maaroni nampitsipeeki (Itiancaneni Jesoshi 16:4, 5). Aisati yamenakobentajeitiri yora antirori sankenarentsipee okarati 800 iñanepeeki anta pankotsipeeki Beteri. Aisati jibatakantiriri maaroni kemisantiriri Yioba yoimoshirenkajeitiri, yobamejeitiri okarati 120.000 apatojeitainchari kemisantatsiri. Aisati ikoyeajeitiri aparopee kemisantatsiri irobametantyari, irishenteri pashinipee kemisantatsiri. Piñanatero 1 Petero 5:2, 3.
Kempe irobamereni Jesoshi, meeka maaroni kemisantiriri Yioba ikamantajeitiri ashaninkapee ibankopeeki (Itiancaneni Jesoshi 20:20). Aisati ipiapinijeita irobametantyariri maaroni koatsiri iriyotero Iriñane Tasorentsi. Aisati yorajei kemisantiriri Yioba inintabakaajeita, ikempetabakaajeita, tempa itasonkakobentajeitiri Tasorentsi (2 Tesaronicasati 1:3). Yorajei kemisantiriri Yioba kimoshire ikanta, tempa ikemisantajeitiri Tasorentsi, aisati intakotapinitiri ashaninkapee. Piñanatero Salmos 33:12; Itiancaneni Jesoshi 20:35.
