Yobametakee Jesoshi akoakerika ampeanajea kemisantatsiri ontimatiye abaotisatya (piñanatero Mateo 28:19, 20). ¿Paita kantachari baotismo? Pikoirika pibaotisatya, ¿paita pimonkarateri?

1. ¿Paita kantachari baotismo?

Ora ñantsi baotismo opoñaka iriñaneki kirieko, ikanteetiri “pintsitianaje”, orampa pinkiajate nijaki. Ibaotisatantakari Jesoshi ikiajatake nijaki Jordán impoiji “yaatanaji” (Maricoshi 1:9, 10). Ibaotisatantari kemisantaperotatsiri aisati ikiajataji nijaki maaroni ibatsa.

2. ¿Paita iroinijanteri yora baotisatachane?

Ibaotisatantari atiri yoinijanta iriori ikashiakaakeri Yioba. ¿Jaoka onkantyari ankashiakayeri Yioba? Ankashiakayeri ankanteririka Tasorentsi ankeariobentero antabeeteneri iriori onkantaitatiyempani, tekera abaotisatya antero oka amanantsi. Pinkashiakayeririka Tasorentsi pinkanteri apinti iriori pantabeeteneri, aitake pimatakeneri ikoakaimpiri. Pishiari Jesoshi aisati pinkemisanteri. Ikantake iriori: “Picoasanotirica pinquemisantasanotena, eiro pantanontatsi avisati [...] pinquemisantasanotanaquena” (Mateo 16:24). Ariorika iribaotisatya yora kashiakakeriri Yioba irishaninkatajeari iriori, aisati irishaninkatajeari kemisantajeitiriri.

3. ¿Paita irimonkarateri yora koatsiri iribaotisatya?

Pinkoakerika pibaotisatya pijibate piyotasanoteri Tasorentsi Yioba aisati antyarotanake pishiretyari (piñanatero Ijorioririnte 11:6). Aikerorika piyotasanoteri Tasorentsi aisati pishiretyaririka ari pinintasanoteri, pinkoasanote pinkamantante aisati pinkemisantero ikantayeteeri (2 Timoteo 4:2; 1 Joa 5:3). Ariorika “amajeiteneri [Yioba]”, ari amatakero ankoyeanontya antabeeteneri aisati abaotisatya (Corosashisati 1:9, 10). a

 PIYOTASANOTERO YOTAANTSIKA

4. Ibaotisane Jesoshi

Piyotantyarori jaoka okantakari ibaotisataka Jesoshi piñanatero Mateo 3:13-17. Impoiji pinkenketsatabakaajeitya:

• Ibaotisatantakari Jesoshi, ¿irionimpa jobentsi?

• ¿Jaoka okantakari ibaotisayeetakeri? ¿Apintompa isayeetakeri nija itoinaki?

Ibaotisatantakari Jesoshi, intanakaro yantakeneri Tasorentsi ikoakaakeriri. Piñanatero Irocashi 3:21-23 aisati Joa 6:38. Impoiji pinkenketsatabakaajeitya:

• Ibaotisatantakari Jesoshi, ¿paita antabeerentsi ijibatakeri?

5. Ari pimatakero pibaotisatya

Pinkoakerika pibaotisatya ontime pintsaroye, iro kantaincha ari pimatakero panaakotero pitsaroi ariorika piyotasanoteri Tasorentsi Yioba. Piyotakoteri aparopee matakerori ibaotisataka, pamenero SHIAKAANTSI.

Piñanatero Joa 17:3 aisati Santiaco 1:5. Impoiji pinkenketsatabakaajeitya:

• ¿Paita amitakoterine yora koatsiri iribaotisatya?

1. Ariorika ankashiakayeri Yioba ankanteri antabeeteneri onkantaitatiyempani.

2. Ariorika abaotisatya ayotakayeri itsipapee antabeeteneri Yioba onkantyani.

 6. Ariorika abaotisatya ankarateri ishaninkaite Yioba

Abaotisatyarika amatero ashaninkatajeari kemisantiriri Tasorentsi otimabetaka akantashiyeta, ankempetabakaajeitya. Maarojeini akeariobentiniri Yioba aisati akemisantiro okantayetiri Bibiria. Piñanatero Salmos 25:14 aisati Salmos 133:1. Impoiji pinkenketsatabakaajeitya:

• Ariorika pibaotisatya, ¿paita timimotempine?

 EIRO PIPEAKOTAROTSI

Ikantakee Jesoshi okameetsati abaotisatya, amatantyarori abaotisatya ankemisanteri Yioba, ashiretyari aisati antabeeteneri.

Paita piyotabakeri

• ¿Paita kantachari baotismo? ¿Paita abaotisatantyari?

• Tekera pibaotisatya, ¿paita pinkashiakayeriri Tasorentsi?

• Tekera pinkashiakayeriji Tasorentsi aisati tekera pibaotisatya, ¿paita pimonkarateri?