YOTAANTSI 26

¿Paita otimantakari ashinonkantsi aisati pomerentsi?

REPRODUCIR EN

Osheki atiripee ashinonkachari isampita: “¿Paita otimantakari ashinonkantsi aisati pomerentsi?”. Ora Bibiria akiro sampitaantsika.

1. ¿Jaoka okantakari intanakaro Satanashi yoashinonkairo kipatsi?

Ikoake kamaari (Satanashi) impinkatsaribentajeiteri maaroni timayetatsiri, irotake ipiatsatantakariri Tasorentsi. Ikoakaakeri Aran jero Eva impiatsatyari Tasorentsi aisati, irotake yamatabitantakarori tsinane Eva (Génesis 3:1-5). Kamaari ikenkeshireakaakaro tsinane irinti Yioba imanapitsatiro kameetsatatsiri. Yamatabitantakarori Satanashi Eva irotake jibatatsiri tseeyantsi. Okantakotiri Bibiria: “Yashi yoiro itseeya. Iriotaque tseeyacaayetariri atiri” (Joa 8:44).

2. ¿Paita ikoanakeri Aran aisati Eva?

Ipayetakeri Yioba Aran aisati Eva maaroni chochokipee irobantyarori, iro kantaincha ikantajeitakeri aparoni inchato katiachari niyanki eiro poarotsi (Génesis 2:15-17). ¿Paita ikoanakeri iriorijei? “Irosati ojireantacaro oacaro [Eva] aisati opaqueri iriori ojime, yoacaro” (Génesis 3:6). Apiteroite te inkemisanteriji Tasorentsi. Yora Aran jero Eva irintini ikameetsajeitini, irimaterome irantajeiterome ikoakaabetakariri Tasorentsi, iro kantaincha yojokanajiro ikemisanti, te impinkatsateriji Yioba. Yantantakarori oka otimanake osheki pomerentsi (Génesis 3:16-19).

3. ¿Paita ipajenkakeeri Aran aisati Eva?

Yora Aran jero Eva te inkemisanteriji Tasorentsi, irotake ipeajeitantanajari kaari kameetsajeitatsi, aisati ipajenkakeri oka icharineitepee. Okanti Bibiria: “Peerani intanacaro caari cameetsatatsi aparoni shirampari, yora Aran […]. Irootaque meeca acamanejeitantari arori maaroni: ashi airo acamajeiti maaroni” (Oromasati 5:12).

¿Paita ashinonkantari? Ashinonka tempa antakero kaari kameetsatatsi, aparopee kitaiteri yoashinonkajeitee atiripee, aisati ashinonka omapokee pomerentsi.

PIYOTASANOTERO YOTAANTSIKA

Tsame ayotero te iri Tasorentsi kantakayearone pomerentsi, aisati ayotero jaoka ikantanentari Tasorentsi ariorika iñee ashinonka.

4. Yora kantakaakarori ashinonka

Osheki atiri ikenkeshirea iri Tasorentsi pinkatsaribentirori kipatsi. ¿Keariompa oka? Pamenero SHIAKAANTSI.

SHIAKAANTSI: ¿Jaanika pinkatsaribentirori kipatsi? (1:24)

Piñanatero Santiaco 1:13 aisati 1 Joa 5:19. Impoiji pinkenketsatabakaajeitya:

¿Irimpa Tasorentsi kantakaakarori otimi pomerentsi aisati ashinonkantsi?

5. Jaoka ikantirori Satanashi kipatsi

Pamenero SHIAKAANTSI.

SHIAKAANTSI: ¿Paita ishinetanteeri Tasorentsi abashinonkempa? (bekarachari kapichaji) (3:07)

Piñanatero Génesis 3:1-6 aisati pinkenketsatabakaajeitya:

¿Paita tseeyantsi ikantanakeri kamaari? (Pamenero 4 aisati 5).
¿Jaoka ikantakari itseeyakotakari kamaari Yioba?
¿Irimpa Yioba kameetsari pinkatsari, paita itseeyakotakariri kamaari?

Piñanatero Éxodo 1:13, 14 aisati pinkenketsatabakaajeitya:

Te impinkatsaribenteroji Tasorentsi kipatsi, ¿jaoka ikantajeitari atiripee?

Isaikabeitani Aran aisati Eva pankirentsimashiki Edén, irintini ikameetsajeitini, iro kantaincha iriorijei ikemisantakeri kamaari aisati ipiatsajeitakari Yioba.
Ipiatsatantakariri Aran Tasorentsi otimanake antane arori, ashinonka aisati akamajeiti.
Intsonkero Yioba antane, eiro ashinonkajatsi aisati eiro akamajeitaji. Koajika ampeanajea ankameetsataje, antimaje kameetsaiteriki kipatsi.

6. Okatsitimotiri Yioba ashinonka

Ariorika iñee Yioba ashinonka, ¿okatsitimotirimpa? Piñanatakotero ikantakeri pinkatsari Iravirini aisati kemisantatsiniri Petero. Piñanatero Salmos 31:7 aisati 1 Petero 5:7. Impoiji pinkenketsatabakaajeitya:

Tempa okatsitimotiri Yioba ashinonka, ¿jaoka pikantashirenentari abiro?

7. Intsonkajero Tasorentsi oashinonkairiri atiri

Piñanatero Irantayeteri Jesoquirishito 21:3, 4. Impoiji pinkenketsatabakaajeitya:

Ikashiakaakee Yioba intsonkajero oashinonkairiri atiripee, aisati iroanenkajero kipatsi. Tempa pikemakero iranteri Yioba, ¿jaoka pikantanentari?

¿Piyoitimpa?

Ikantimanatakeri Satanashi Yioba, ipitsitakero ibajiro, aisati ikantimanatakeri ipinkatsariti, ikantashita kempe oka ‘te irimateroji Tasorentsi impinkatsaribentante kameetsa’. Kapichanibaniji Yioba intsonkajero pomerentsitimotariri atiri, inkitetajero ibajiro. Iroinijantajero okameetsati ipinkatsaritantari, tekatsi apiitajerone inkantimatajeri Yioba, oka irotake okameetsatasanoti (Mateo 6:9, 10).

APAROPEE ATIRI IKANTI: “Yobetsikanakee Tasorentsi abashinonkempa”.

¿Paita pikantiri abiro?

EIRO PIPEAKOTAROTSI

Kantakaakarori ashinonkajeita iriotake Satanashi, aisati Aran jero Eva yamakero ashinonka. Ariorika iñee Yioba ashinonka okatsitimotiri, koajikani intsonkajero oka ashinonkajeita.