¿Kamakempa pishaninkasanori? Ariorika ikamake pishaninka, pisampitarika, ¿paita abishimoterine noshaninka kamaintsiri? ¿Arimpa noñajeri? Tsame piyotasanotero aka yotaantsika aisati oijatirori, akiro Bibiria sampitaantsipeeka.

1. ¿Jaoka ikantari kamatsiri?

Ishiakantakero Jesoshi yora kamatsiri imasanoti, ¿paitakea ishiantariri kamatsiri maatsiri? Yora maasanotatsiri te iriyoteji abisayetatsiri, aisati ariorika inkame atiri eiro ikematsikatajarotsi iriori, eiro yashinonkajatsi. Okanti Bibiria “ompeanajea iquenqueshireyevetari paitapeerica irantayetemeri” (piñanatero Salmos 146:4).

2. ¿Paita okameetsatantari ayotero oyerine kamayetaintsiri?

Osheki atiripee itsaroakaaro inkame, aisati itsaroakaari kamayetaintsiri. Pikenkeshiretirorika okapee, oimoshirenkempi okantakotiri Bibiria. Ikantake Jesoshi: “Aitaque piotavaquero queariotatsiri. Irootaque oipacaacoventajempineri” (Joa 8:32). Ikantashitari kemisantamempeashitachari inkamakerika atiri ora ishire irosati otimi, eiro okamitsi. Irointikea Iriñane Tasorentsi te obametakoteroji oka. Yora kamayetaintsiri te iriyoteji, opeanaka ikenkeshireyetiri, te irashinonkeaji aisati te irobashinonkeeji. Irotake kaari okameetsatanta amanakobenteri kamaintsiri, aisati eiro akenketsatakairitsi.

Ikanti aparopeeni atiri irimatero inkenketsatakayeri kamaintsiri, oka irotake tseeyantsi. Okanti Bibiria ‘ompeanajea ikenkeshireyebetari kamaintsiri’. Ijitashibetaka atiri ikenketsatakairi ishaninkani kamaintsiri, iro kantaincha kaari ini ishaninka, iritake kamaari, iriori ishiakantashitakari kamaintsiri. Ayoterorika okantiri Bibiria eiro yamatabiteetsi kamaari. Ikanti Yioba eiro akenketsatakaashitaritsi shiretsiyetatsiri, kobenkatatsiri irinti (piñanatero Deuteronomio 18:10-12).

3. Jaoka ikantari kamayetaintsiri

Osheki ikantakoyeetiri atiripee jaoka ikantari kamaintsiri, iro kantaincha ainiro osheki tseeyantsi.

• Anta pitiminta, ¿paita ikantakotiriri pishaninka jaoka ikantari kamaintsiri?

 4. Oipakakobentee obametakotiriri Bibiria kamaintsiri

Ayoterorika keariotatsiri obametakotiriri Bibiria kamaintsiri ajokero atsaroi. Piñanatero Salmos 146:3, 4 aisati pinkenketsatabakaajeitya:

• ¿Imaterompa kamaintsiri iroashinonkayee?

Obametakotiri Bibiria amitakotee ajokero yameyetari kenketsatakaashiyetariri kamaintsiri. Piñanatero Levítico 20:6 aisati Irantayeteri Jesoquirishito 4:11. Impoiji pinkenketsatabakaajeitya:

• Ariorika atiri yamanakotiri kamaintsiri, ¿jaoka ikantanentari Tasorentsi?

5. Obeshireakayee obametakotiriri Bibiria kamaintsiri

Osheki atiri ikantashita ariorika inkame yora kaari kameetsatatsi intayea paamariki, iro kantaincha Iriñane Tasorentsi te obametakoteroji oka. Obametakotiri Bibiria obeshireakayee. Piñanatero Oromasati 6:7 aisati pinkenketsatabakaajeitya:

• Okanti Bibiria ariorika inkamake atiri eiro itimitsi omperanajeitajearineri, ¿paita pikantiri abirori, yoashinonkairimpa Tasorentsi kamaintsiri?

Ayotasanoterorika jaoka ikantari Yioba, ari ayotanake te iroashinonkayeri Yioba kamaintsiri. Piñanatero Deuteronomio 32:4 aisati 1 Joa 4:8. Impoiji pinkenketsatabakaajeitya:

• ¿Jaoka ikantari Tasorentsi? ¿Ikoakempa Tasorentsi iroashinonkeeteri kamaintsiri?

• Okantakotiriri Bibiria kamaintsiri, ¿obeshireakaimpimpa? ¿Paitakea obeshireakantimpiri?

 EIRO PIPEAKOTAROTSI

Yora kamaintsiri tekatsi iriyote, te irashinonkayeaji aisati te iroimintsaroajeiteriji atiripee.

Paita piyotabakeri

• ¿Jaoka ikantari kamaintsiri?

• Ariorika ayojeite yora kaminkaripee ipeanaja kipatsipane, ¿paita oni ajokeri?

• Okantakotiri Bibiria kamaintsiri, ¿jaoka onkantyari obeshireakayee?