Abashireta katsini ikamakerika ashaninka, irotake kaari akoanta inkame atiri. Okanti Bibiria koajikani eiro akamajeitajitsi (1 Corintosati 15:26). Piyotabakero yotaantsiki 27 jaoka onkantyari Yioba irishajero kamanetantsi. Aka yotaantsika piyotero jaoka okantari irointinaajeri Yioba osheki kamaintsiniri irañantajeari inkantaitatiyempani. ¿Keariompa intinaanaje kamaintsiniri? ¿Jaoka intinaanajeri? ¿Kipatsiki orampa inkiteki?

1. ¿Jaoka inkanteriri Yioba ashaninkaite kamaintsiniri?

Ikoasanoti Yioba iroañajeitajeri kamayetaintsiri. Yora Job irintini shiretariri Tasorentsi, iyotake Job irointinaajeri Tasorentsi inkamabetakea. Ikantakeri Job Tasorentsi: “Abiro pinkajemena, narori aisati nankempi” (piñanatero Job 14:13-15, TNM).

2. ¿Jaoka okantari ayotantari intinaanaje kamaintsiniri?

Isaikabeitani Jesoshi kipatsiki, Tasorentsi ishintsitakaakeri irointinaantajeariri kamaintsiniri. Irotake imatantakarori Jesoshi yoitinaajiro aparoni ebankaro aisati yoitinaajiri otomi tsinane kamajimentaaro (Maricoshi 5:41, 42; Irocashi 7:12-15). Peerani ikamake itsipabintsare Jesoshi pajitachari Irasaro. Otimabeta abisanake 4 kitaiteri ikamantakari yoitinaajiri Jesoshi Irasaro. Yamanakeri Jesoshi Tasorentsi, impoiji ikajemakotajiri: ‘¡Irasaro, pintinaanaje, pimpocaje! Irosati isoquijantanaja camavetainchari’ (Joa 11:43, 44). ¡Itinaanaja Irasaro! Ikimoshiretanake ishaninkapee aisati itsipabintsarepee.

3. ¿Arimpa intinaanaje ashaninka kamaintsiniri?

Okamantee Bibiria “irointinaajeitajeri Tasorentsi maaroni camajeivetainchari” (Itiancaneni Jesoshi 24:15). Itinaakeri Jesoshi kaminkaripee iro kantaincha yokapee te irijateji inkiteki (Juan 3:13, TNM). Kapichanibaniji irointinaajeri Jesoshi osheki kamayetaintsiri irañantajeari kameetsaiteriki kipatsi. Ikantake Jesoshi ‘maaroni ikenkeshireakotiri Tasorentsi intinaanajeʼ, ipeakotakaririka atiri ishaninka kamaintsiniri, iro kantaincha Tasorentsi te impeakotyariji, irointinaajeri maarojeini (Joa 5:28, 29).

 PIYOTASANOTERO YOTAANTSIKA

4. Irimatero Jesoshi irointinaajeri kamayetaintsiri

Ayotero jaoka okantakari yoitinaajiri Jesoshi Irasaro. Piñanatero Joa 11:14 aisati 38-44. Impoiji pinkenketsatabakaajeitya:

• ¿Jaoka okantari piyotiro ikamake Irasaro? (Pamenero orijaniki 39).

• Intimakeme Irasaro inkiteki kimoshire, ¿paitakea iramantyariri Jesoshi kipatsiki?

Pamenero SHIAKAANTSI.

5. ¡Intinaajeitanaje kamayetaintsiri!

Piñanatero Salmos 37:29 aisati pinkenketsatabakaajeitya:

• ¿Jaoka intinaanajeri kaminkaripee?

Irointinaajeitajeri Jesoshi maaroni keariobentiniriri Yioba aisati irointinaajeri itsipapee atiri. Piñanatero Itiancaneni Jesoshi 24:15 aisati pinkenketsatabakaajeitya:

• Ariorika intinaanaje kamayetaintsiri, ¿jaanika pikoiri piñajeri abirori?

• Oshaninkapee Felicita iyotajiro intinaanaje kamaintsiri. ¿Jaoka ikantashiretanajari oshaninkapee Felicita?

 EIRO PIPEAKOTAROTSI

Okamantee Bibiria intinaanaje osheki katsini kamaintsiniri. Ikoake Yioba irañajeitaje kamayetaintsiri, irotake ishintsitakantakariri Jesoshi irointinaajeitajeri.

Paita piyotabakeri

• ¿Paita piyotantari ikoake Yioba aisati Jesoshi irointinaajeri kamayetaintsiri?

• ¿Jaoka intinaanajeri kamayetaintsiri, aka kipatsiki orampa inkiteki? ¿Paita piyotantarori oka?

• ¿Paita pishiretantari intinaanaje pishaninka kamaintsiniri?