Ipinkatsaribentiro Jesoshi inkite, kapichanibaniji aisati impinkatsaribentero kipatsi. Tsame ayotero irantayeteri Jesoshi iramitakojeitanteeri.

1. ¿Jaoka onkantyari Jesoshi iramitakoteri atiripee kameetsa irisaikantyari kipatsiki?

Manataantsiki pajitachari Aramaqueroni, intsonkajeiteri Jesoshi maaroni pinkatsaripee kipatsisati aisati atiripee kaari kameetsatatsi (Irantayeteri Jesoquirishito 16:14, 16). Ari omonkaratakea okamantiri Bibiria: “Eiro osamanititsi intime caari cameetsajeitatsi” (Salmos 37:10). Ariorika impinkatsaribentero Jesoshi kipatsi irobabisakojeiteri maaroni atiripee irisabikajeitantyari kameetsa (piñanatero Salmos 72:12-14).

2. Ariorika impinkatsaribentero Jesoshi kipatsi, ¿jaoka onkantyari irisabikajeite atiri?

Okamanti Bibiria: “Yora cameetsajeitatsari, irashitasanotearo quipatsi, aisati incanteani irisavicantearo” (Salmos 37:29). Pinkenkeshirea ariorika maaroni atiripee inintajeiteri Yioba, inintabakaajeitya, iraakameetsatabakaajeitya. ¿Añajerorika oka jaoka ankantanentyari? Kimoshire ankantya, ¿tempa? Eiro ajokiitajatsi, aintikea maaroni antime kameetsa ankantaitatiyempani.

3. Ariorika impoyereajeri Jesoshi maaroni piatsatinkari, ¿paita abisatsineri?

Yora Jesoshi jeri 144.000 kemisantatsiri impoyereajeri maaroni piatsatinkari, impoiji impinkatsaribentero kipatsi onkarate 1.000 osarentsi, irobameetsashirejeiteri atiripee intekatsitantanajeari. Ariorika ontsonkapaakea okapee osarentsi, irisabisakajeite kimoshire kemisantajeitiriri Tasorentsi kameetsaiteriki kipatsi. Impoiji Jesoshi iroimpiajeneri iriri ipinkatsaritantari, yora sabikajeitatsineri kipatsiki ‘impinkatsatasanoteri Tasorentsi’ (Mateo 6:9, 10). Maaroni iriyotero apinti Yioba irinti pinkatsari kameetsatasanotatsiri, irio Tasorentsi tsonkajeiterineri Satanashi jeri inampirepee aisati yora piatsajeityarine (Irantayeteri Jesoquirishito 20:7-10). Ontime onkantyani maaroni irantayeteri Tasorentsi, eiro opeatsi.

 PIYOTASANOTERO YOTAANTSIKA

4. Intsonkeeteri pinkatsaripee kipatsisati

Yora pinkatsaripee yoashinonkajeitiri atiri (Eclesiastés 8:9). Ariorika impinkatsaribentajeitee Jesoshi, intsonkajero Tasorentsi Yioba maaroni pomerentsitantsi.

Piñanatero Salmos 110:5, 6 aisati 2 Tesaronicasati 1:6-8. Impoiji pinkenketsatabakaajeitya:

• Yora Yioba aisati Jesoshi, ¿jaoka inkanteriri pinkatsaripee aisati oijajeitiriri?

• Yora Yioba aisati Jesoshi, ¿jaoka inkanteriri atiripee? ¿Onimotimpimpa irantajeiteri?

5. Irinti Jesoshi kameetsari pinkatsari

Ariorika impinkatsaribentero Jesoshi kipatsi iraakameetsajeiteri maaroni atiripee. Pamenero SHIAKAANTSI piyotantyarori ikoake Jesoshi iramitakoteri atiripee, aisati jaoka okantakari ishintsitakaakeri Yioba Jesoshi irimonkaratantyarori oka.

Maaroni yantayetakeri Jesoshi isaikabeitani kipatsiki yoinijantaka paita iranteri ariorika impinkatsaribentee, koajikani iriori irantero kameetsayetatsiri, ¿paita pikoayetiri irimonkaratero? Piñanatero maaroni oka sankenarentsipee:

6. Impinkatsaribentee Jesoshi antimantajeari kameetsa

 EIRO PIPEAKOTAROTSI

Ariorika impinkatsaribentero Jesoshi kipatsi irimonkaratero Tasorentsi ikoakeri, irobameetsatajero kipatsi aisati irisabikakaajeiteri pinkatsajeitiriri onkantaitatiyempani.

Paita piyotabakeri

• ¿Paita iranteri Jesoshi impinkatsatasanotantyariri atiripee apinti Yioba?

• ¿Jaoka okantari piyotiro irimonkaratero Jesoshi ikantayetakeri Tasorentsi?

• Maaroni irantayeteri Jesoquirishito, ¿paita pikoasanotiri piñero?