YOTAANTSI 34
¿Jaoka onkantyari ainijantyariri Yioba anintiri?
¿Pishaninkatarimpa Tasorentsi? ¿Pikoakempa pishaninkatasanotyari? Ariorika pinintasanoteri Tasorentsi Yioba, aitake irinintasanotakempi aisati inkempoyeakobentempi. ¿Jaoka onkantyari poinijantyariri pinintiri?
1. ¿Jaoka ankantyari ainijantyariri Yioba anintiri?
Ariorika akemisantiri Tasorentsi ainijairi anintasanotiri (piñanatero 1 Joa 5:3). Yora Tasorentsi te irishintsinateeji ankemisanteri, irointikea ishinetee ankoyeanontya ankemisanteririka. Okanti Bibiria “pinquimoshirejeite pimpincatsateri, Tasorentsi” (Salmos 100:2). Ikoakaimpi Tasorentsi pinkemisanteri tempa pinintasanotiri. Aka parteki 3 aisati parteki 4 piyotero paita panteri poinijantyariri Yioba pinintiri: Piyotero pantero kameetsayetatsiri aisati eiro pantirotsi kaari kameetsayetatsi.
2. ¿Paitakea opomerentsitimotanteeri ainijayeri Yioba anintiri?
“Yora cameetsatatsiri avishimoyetiri oshequi pomerentsitimotariri” (Salmos 34:19). Maaroni atiripee ikomitaro aisati otimimotiri pomerentsi. Kemperi, te añeriji kireki aisati yoashiretakayeetari. Ariorika abishimotee kaari kameetsatatsi, opomerentsita amonkaratero ikoakaakeeri Tasorentsi. Amaterome ajokerome akemisanti. Pinkemisanteririka Yioba, poinijeri pinintasanotiri aisati kiso poanakeri. Impoiji Yioba kiso iroanakempi aisati abirori, eiro yojokimpitsi (piñanatero Salmos 18:25).
PIYOTASANOTERO YOTAANTSIKA
Tsame ayotero paita ikoantari Yioba ankemisanteri, aisati paita amitakoteene ankemisantapiniteri.
3. Itseeyakotakempi kamaari
Sankenarentsi Job okanti yora kamaari itseeyakotakari Job aisati itseeyakotakari maaroni kemisantajeitiriri Tasorentsi. Piñanatero Job 1:1 aisati 1:6-2:10. Impoiji pinkenketsatabakaajeitya:
-
¿Paita itseeyakotakariri kamaari Job? (Pamenero Job 1:9-11).
-
¿Paita itseeyakotakariri kamaari maaroni atiripee aisati abirori? (Pamenero Job 2:4).
Piñanatero Job 27:5b aisati pinkenketsatabakaajeitya:
-
¿Jaoka okantakari yoinijaakeri Job Yioba inintirini?
Ikemisantakeri Job Yioba yoinijantakariri inintasanotirini.
Ankemisanteri Yioba ainijantyariri anintasanotiri.
4. Pinkimoshiretakayeri Yioba
Piñanatero Proverbios 27:11 aisati pinkenketsatabakaajeitya:
-
¿Jaoka ikantanentari Yioba ariorika pinkemisanteri aisati pinkoyeero kameetsatatsiri? ¿Paitakea inkimoshiretantyari Yioba?
5. Ari pimatakero pinkeariobenteneri Yioba
Arori anintasanotiri Yioba, irotake akamantantariri pashinipee atiri. Opomerentsitimobetee, aikero akamantakotiri Yioba tempa anintasanotiri. Pamenero SHIAKAANTSI aisati pinkenketsatabakaajeitya:
-
¿Okomitimotimpimpa pinkamantakoteri Yioba?
-
¿Jaoka okantakari yojokantakarori Greyson itsaroi ikamantantariri itsipatari?
Te ompomerentsitasanotyaji ankemisanteri Yioba aninterorika iñakameetsatiri aisati aninaterorika kaari iñakameetsati. Piñanatero Salmos 97:10 aisati pinkenketsatabakaajeitya:
-
Piyotabakero oka abiro, ¿jaoka okantari iñakameetsatiri Yioba? Aisati, ¿jaoka okantari kaari iñakameetsati?
-
¿Paita amitakotempine pinintero kameetsatatsiri aisati pininatero kaari kameetsatatsi?
6. Asabike kameetsa ankemisanteririka Yioba
Ankemisanteri Yioba kameetsa asabikantyari onkantyani. Piñanatero Salmos 32:8 aisati pinkenketsatabakaajeitya:
-
¿Iyotirompa Yioba koiteimoteeri? ¿Paita piyotantarori oka?
-
¿Paita amitakotakempiri Bibiria? Tempa piyotakotakeri Tasorentsi, ¿paita abishimotakempiri?
APAROPEE ATIRI IKANTI: “Te inkenkeshireakoteroji Tasorentsi nantayetiri”.
-
¿Paita sankenarentsi Bibiria poinijayeriri atiri pobametantyariri yobashireta Yioba antirorika antane?
EIRO PIPEAKOTAROTSI
Poinijayeri Yioba pinintiri pinkemisanteririka aisati eirorika pijokiritsi ompomerentsitimobetempi.
Paita piyotabakeri
-
¿Paita piyotakotabakeriri abishimotakeriri Job?
-
¿Jaoka onkantyari abiro poinijayeri pinintiri Yioba?
-
¿Paita amitakotempine eiro pijokiritsi Yioba?
PAMENERO PASHINIPEE
Piyotero jaoka onkantyari pinkisobantyariri Yioba aisati piyemisantaririntepee.
Piyotasanotero itseeyakotakee Satanashi.
Piyotakotero irimatero jananekipee iroinijeri Yioba inintiri.
¿Jaoka ikantari ebankaripee ikematsikataro pomerentsitatsiri eiro yojokantaritsi Yioba?
Poipakaakobentante eiro pikemisantantaritsi shintsinatimpiri (3:59)
