YOTAANTSI 38
Anintero añantari
Ora añantari oimoshirenkee. Ontimabetakearika pomerentsitantsi ari amatakero ankimoshiretanake. ¿Jaoka onkantyari ampasonkiteri Tasorentsi yoañantakeeri? ¿Paitakea ampasonkitasanotantyariri?
1. ¿Paitakea okameetsatantari anintero añantari?
Okameetsati anintero añantari tempa ipakeero Yioba. Iriotake “oaneantasanotatsiri”, imatakero yobetsikajeitakeri maaroni timajeitatsiri (Salmos 36:9). Aisati “iriotaque oaneajeiteeri, intacojeiteeri irinti. Tempa iriotaque paqueerori maaroni, paitaricapee” (Itiancaneni Jesoshi 17:25, 28). Iriotake Yioba peerori maaroni añantari. Ari irimatakero irisabikakaajeitee kimoshire (piñanatero Itiancaneni Jesoshi 14:17).
2. ¿Jaoka onkantyari pimpasonkiteri Yioba ipashitakempiro pañantari?
Pitimantakari otsomonteki piniro yamenakobentakempi Yioba. Shiretariniri Tasorentsi pajitachari Iravirini ikantakeri Yioba: “Pineasanotaquena povetsicantaquenari” (Salmos 139:16). Ikenkeshireakotiro Tasorentsi opinatasanota pañantari (piñanatero Mateo 10:29-31). Ariorika ayeri atiri ari okatsitimotakeri Tasorentsi aisati ariorika ayempa arosati (Éxodo 20:13). a Okatsitimonentiri eirorika ashentirotsi añantari, aisati eirorika ashentirotsi yañantari itsipapee. Ariorika arori ashentajea aisati aninterorika yañantari itsipapee ainijantero anintasanotiro añantari.
PIYOTASANOTERO YOTAANTSIKA
Tsame ayotero jaoka onkantyari ainijantero anintasanotiro añantari.
3. Pamenakobentero pañantari
Yora kemisantajeitiriri Tasorentsi ikashiakaakeri iriori irantabeeteneri onkantaitatiyempani, aisati ipajeitakeri yañantari, okempetakaro itabentakeneri Yioba, irotake okameetsatantari iramenakobentero yañantari. Piñanatero Oromasati 12:1, 2 aisati pinkenketsatabakaajeitya:
-
¿Paitakea pamenakobentantyarori pañantari?
-
¿Jaoka onkantyari pamenakobentero pañantari?
4. Paamabentakotyaro pañantari aisati itsipapee
Okamantee Bibiria aamabentantyarori kobenkatatsiri. Pamenero SHIAKAANTSI piyotantyarori jaoka onkantyari paamabentakotantyari.
Piñanatero Proverbios 22:3 aisati pinkenketsatabakempa, ¿jaoka onkantyari paamabentakotyaro pañantari...
-
... ariorika pintime pibankoki?
-
... ariorika pantabeete?
-
... ariorika piñatsatyaro perota?
-
... ariorika pantakotero shiakomentotsi?
5. Paamabentakotyari jobentsi tekera intime
Ikenketsatakotakeroni Iravirini jaoka ikantari Yioba ikenkeshireakotiri jobentsi ainirokera tsompoinaki iriniro. Piñanatero Salmos 139:13-17 aisati pinkenketsatabakaajeitya:
-
¿Jaoka okaratiri intantarori itimi jobentsi, otsomonteki iriniro orampa intimanakerika? ¿Paita ikantakotiri Yioba?
Ipakeri Yioba israeritapee ikantakantane intikaakobentantyarori tsinane tsomonteyetatsiri aisati jobentsi kaari timatsikera. Piñanatero Éxodo 21:22, 23 aisati pinkenketsatabakaajeitya:
-
¿Paita ikenkeshireakotiriri Tasorentsi atiri kaari tsatashitaari iroyeri jobentsi?
-
¿Jaoka ikantanentari Yioba ariorika abashityari atomi? b
-
¿Onimotakempimpa ikenkeshiretiri Tasorentsi?
Aisati tsinane nintirori añantari omaterome onkenkenkeshireashitya ojokeririka otomi. Piñanatero Ijorioririnte 13:6 aisati pinkenketsatabakaajeitya:
-
Ariorika irishintsinayeetero tsinane ojokerime otomi, ¿jaanika onkanteri iramitakotantyarori? ¿Paitakea antantyarori oka?
APAROPEE ATIRI IKANTI: “Onkoyeanontya tsinane ojokeririka otomi orampa eiro ojokiritsi. Irotake ashi obatsa”.
-
¿Paitakea piyotantari inintiro Yioba añantari tsinane tsomontetatsiri aisati yañantari otomi timatsiri tsompoinaki?
EIRO PIPEAKOTAROTSI
Ora añantari irotake ipashiteeri Yioba. Okamantee Bibiria aamabentakotyaro añantari aisati aamabentakotyaro yañantari itsipapee atiri.
Paita piyotabakeri
-
¿Paita piyotantari inintiro Yioba yañantari atiri?
-
¿Jaoka ikantanentari Yioba ariorika iroyempa irisati atiri? ¿Jaoka ikantanentari Yioba ariorika abamayeri pashini atiri?
-
¿Jaoka okantari pinebetari pañantari ipashitimpiri Yioba?
PAMENERO PASHINIPEE
¿Jaoka onkantyari pimpasonkiteri Yioba ipakempiro pañantari?
Iriotake betsikakerori maaroni timayetatsiri (pampoyeantsi 141) (2:41)
¿Inkabintsayerompa Yioba tsinane jokakeriri ojobentsite?
“¿Qué dice la Biblia sobre el aborto?” (Oka sankenarentsi otimi jw.org)
Piyotero ikoakaimpiri Yioba paamabentakotantyarori pañantari ariorika piñatsatya.
“¿Se justifica la participación en los deportes de riesgo?” (¡Despertad!, 8 de octubre de 2000)
¿Timatsimpa atiri koatsiri iroyempa irisati? Piyotero okantakotiri Bibiria.
a Ikenkeshireakotiri katsini Yioba atiripee obashiretachari (Salmos 34:18). Aisati iyotakotiro ikenkeshireari oachaneni, irotake ikoantari iramitakoteri. Piyotantyarori ikantayetiri Tasorentsi, piñanatero sankenarentsi pajitachari “¿Puede ayudarme la Biblia si ya no quiero vivir y he pensado en suicidarme?”, oka sankenarentsi otimakoti jeraka yotaantsikika, okantira “Pamenero pashinipee”.
b Ikoake Yioba inkabintsayero tsinane jokakeriri ojobentsite eiro obashiretantajatsi onkantyani. Piyotantyarori oka piñanatero sankenarentsi pajitachari “¿Qué dice la Biblia sobre el aborto?”, oka sankenarentsi otimi yotaantsikika, okantira “Pamenero pashinipee”.
