YOTAANTSI 40
Ikoakaakee Tasorentsi ankitetya
Maaroni tsinane okoake onkitetero otomi ibatsa aisati iitsaare eiro yojokiitantajatsi. Iramenerorika itsipapee atiri jaoka ikantari jananeki, ari iriñakameetsatakero iriniro. Apa Tasorentsi aisati ikoake ankitetya arosati asaikantyari kameetsa. Iramenajeiteerika itsipapee atiri jaoka akantari arori, ari iriñakameetsatakeri Tasorentsi aisati.
1. ¿Jaoka onkantyari ankitetya?
Ikanti Yioba: “Pincameetsatasanotanaje avirori” (1 Petero 1:16). Ankameetsatasanotantajeari ontimatiye ankitetero abatsa, aisati antero kameetsayetatsiri. Irotake okameetsatantari ankaatapinijeite, ankibero aitsaare, otimirika ashiakomento ankibero, ampishitero abanko aisati abameetsatero paitapeerika timimoteeri. Okameetsati ampishitero ibanko Tasorentsi. Ariorika antero oka, ari iriñakameetsayeetakeri Yioba (2 Corintosati 6:3, 4).
2. Akoakerika ankitetya, ¿paita ajokanajeri?
Okantee Bibiria: “Eiro meeca antayetirotsi caari cameetsatatsi, aisati eiro aquenqueshiretirotsi” (2 Corintosati 7:1). Irotake ashintsiperotantari ajokanajero antayetiri aisati akenkeshireyetiri kaari kameetsatatsi. Ankimoshiretakayeri Yioba ajokanajerorika kaari kameetsatatsi akenkeshireyetiri (Salmos 104:34). Ikoake Yioba añabeetero kameetsatatsiri (piñanatero Corosashisati 3:8).
Te inkoyeji Tasorentsi Yioba amonkotero coca, ampobatyaro pocharo, ajirikero droga aisati kamarampi. Okapee opitsitiro abatsa aisati akenkeshireane. Anintirorika añamento, eiro ajirikirotsi okapee. Aitake asaikajeite kameetsa, eiro ajokiitajatsi. Arojei kemisantiriri Yioba ashintsiperoti ankitetantyari, kemperi te antantajeityaji aisati te ameneroji shiakaantsi karatsempekiyetatsiri (Salmos 119:37; Ejesosati 5:5). Opomerentsitimobeteerika ajokero okapee, ari amatakero, tempa Yioba iramitakotee (piñanatero Salmos 121:1, 2).
PIYOTASANOTERO YOTAANTSIKA
Tsame ayotero ankiteterika iriñakameetsayeeteri Yioba. Aisati ayotero jaoka onkantyari ajokero ameyetari kaari kameetsatatsi.
3. Ariorika ankitetya ampinkatsateri Yioba
Ipakeri Yioba israeritapee ikantakantane, oka oinijanta ikoake iriori ankitetya. Piñanatero Éxodo 19:10 aisati 30:17-19. Impoiji pinkenketsatabakaajeitya:
-
¿Paita ikantakotirori Yioba kitetaantsi?
-
Akoakerika ankitetapinitya, ¿paita ametyari?
Maaroni arojei amatero ankitetapinitya jaokarika atimayetiri, itimimobeteerika kireki kapichaji orampa osheki. Pamenero SHIAKAANTSI aisati pinkenketsatabakaajeitya:
-
Ariorika ankamantante, ¿jaoka okantari atsarate aisati abibiriate? Okitetirika okapee, ¿impinkatsaterimpa atiri Yioba? ¿Paitakea impinkatsatantyariri?
4. Pojokanajero kaari kameetsatatsi
Irimatero Yioba irojokakayempiro pipobata.
Pipobatarorika pocharo orampa droga, timatsi okomita pojokero. Pimatantyarori pojokanajero oka pisampitya: ¿Paita abishimotenane aikerorika nopobata? Piñanatero Mateo 22:37-39. Impoiji pinkenketsatabakaajeitya, ¿jaoka okantari pipobatarika pocharo aisati droga...
-
... amashitakayempi pintsipabintsatyari Yioba?
-
... amashitakayeri pishaninkasanori aisati itsipapee?
Pinkenkeshirempa jaoka onkantyari pojokero pipobata. a Pamenero SHIAKAANTSI.
Piñanatero 1 Corintosati 10:13 aisati pinkenketsatabakaajeitya:
-
Pamaneririka Tasorentsi, piñanaterorika Bibiria aisati pampatotyarika, ¿pimaterompa pojokero pameyetari? ¿Paita pimatantyari pojokero?
5. Eiro pikenkeshireirotsi pitsiyetatsiri
Piñanatero Corosashisati 3:5 aisati pinkenketsatabakaajeitya:
-
Te onimoteriji Tasorentsi amenero karatsempekiyetatsiri, antantya aisati asankenatero acerorariteki añatsatantyariri atiripee, ¿paita ayotakotantariri Tasorentsi ipinkiro okapee?
-
¿Komitanimpa amonkaratero ikanteeri Yioba ankitetantyari? ¿Pimaterompa pojokero oka ipinkiri Yioba? ¿Paitakea pimpinkantyarori?
Piyotero jaoka onkantyari pojokero kenkeshireantsi pitsiyetatsiri. Pamenero SHIAKAANTSI.
Yobametakee Jesoshi ajokero intsipaite pitsiyetatsiri. Piñanatero Mateo 5:29, 30 aisati pinkenketsatabakaajeitya:
-
Te inkoakayeeroji Jesoshi ankitsoriero aki, aisati antotero ako, irointikea ikoake ajokero ameyetari pitsitatsiri intsipaite. ¿Paita panteri eiro pikenkeshireantarotsi kaari kameetsatatsi pitsitakayempine? b
Pishintsiterika pojokantyarori pitsiyetatsiri, iñakameetsatempi Yioba abirori. Piñanatero Salmos 103:13, 14 aisati pinkenketsatabakaajeitya:
-
Abishimotimpirika pitsiyetatsiri, ¿amitakotimpimpa oka sankenarentsika aikero pijatatiye pishintsitanake? ¿Paitakea amitakotantimpiri?
¡Eiro pimaotitsi! Pipariakerika pinkatiyanaje
Pinkenkeshireashitemparika abiro: “Nantajiro kaari kameetsatatsi, eiro nomatiro nantajero kameetsatatsiri”. Pinkenkeshiretero oka, yora shiachari imparierika eiro itimanaji oshaabijiki, irointikea inkatiyanaje aikero irishianaje. Oka okempetaro timatsirika pantajiro kaari kameetsatatsi, eiro pikantashiretitsi abiro. Ari pimatakero pojokanajero oka pitsitatsiri. Pimpariabetakearika ¡eiro pishematsi, aikero pijatatiye! Iramitakotempi Yioba pojokantyarori okapee.
APAROPEE ATIRI IKANTI: “Nametakaro okapee, eiro nomatiro nojokero”.
-
¿Paita sankenarentsi Bibiria poinijayeriri yoka atiri pobametantyariri iramitakoteri Yioba irojokero yametari kaari kameetsatatsi?
EIRO PIPEAKOTAROTSI
Ankimoshiretakayeri Yioba ankitetyarika abatsa aisati akenkeshireyetiri, aisati ariorika ankitetero paitarika antayetiri.
Paita piyotabakeri
-
¿Paitakea okameetsatantari ankitetya?
-
¿Jaoka onkantyari pinkitetero timimoyetimpiri?
-
¿Paita anteri ankitetantyarori akenkeshireyetiri aisati antayetiri?
PAMENERO PASHINIPEE
Onabeta aro ashinonkainkari, ¿paita anteri ankitetantyari?
Piñanatakotero sankenarentsipee amitakotempine pojokanajero pipobata.
Piyotakotero paita abishimotempine pameneririka karatsempekitatsiri.
“La pornografía: ¿inofensiva o perjudicial?” (La Atalaya, 1 de agosto de 2013)
Piyotakoteri aparoni shirampari, jaoka okantakari yojokanajiro yameniri karatsempekitatsiri.
“Sufrí muchas recaídas hasta que lo logré” (La Atalaya, núm. 4 2016)
a Okantira yotaantsikika “Pamenero pashinipee”, otimi obametaantsi pajitachari “Cómo dejar de fumar”, oka amitakotempi pojokero pipobatarika.
b Piyotantyari jaoka onkantyari eiro papiitajirotsi pantantajea, piñanatero yotaantsi 25 sankenarentsiki pajitachari Lo que los jóvenes preguntan. Respuestas prácticas (volumen 1), otoina opajita “¿Podré vencer el hábito de la masturbación?”.
