YOTAANTSI 42
¿Paita okantakotiriri Bibiria timashitachari aisati aabakaachari?
Aparopee atiri ikanti pikoakerika pinkimoshirete pisaike, ontimatiye paabakayea. Iro kantaincha meeka aparopee aabakaachari aisati timashitachari te irisaikeji kameetsa. Ora Bibiria okanti yora timashitachari aisati aabakaachari irimatero inkantajeitya kimoshire.
1. ¿Paita irimateri timashitachari?
Okanti Bibiria: “Ariorica paacayero pishinto, ocameetsati; iro cantaincha ariorica pintsaneemparo, ocameetsatasanoti” (piñanatero 1 Corintosati 7:32, 33, 38). Yora timashitachari te inkenkeshireteroji koiteimotariri tsipatariri, irimatero paitapeerika ikoiri. Aparopee ijajeiti nampitsipeeki inkamantakotantyarori Iriñane Tasorentsi. Yora timashitachari otimi tiempo inkenkeshireapinitantyarori ikoayetiri Yioba.
2. ¿Paita irimateri aabakaasanotachari?
Yora timashitachari aisati aabakaasanotachari kameetsa ikantajeita. Okanti Bibiria: “Ocameetsati [shirampari] ontime intsipateari quiso oyerineri” (Génesis 2:18). Irimonkaraterorika shirampari jero ijina okantayetiri Iriñane Tasorentsi eiro yojokabakaatsi. Yokapee aabakaasanotachari inintabakaajeita, ipinkatsatabakaajeita aisati yamitakotabakaajeita, irotake kameetsa ikantajeitantari iriorijei jeri itomipee. Irintikea kaari aabakaajeitacha eiro imatirotsi intime kameetsa.
3. ¿Paita ikenkeshireakotiriri Yioba aabaakachari?
Ikantantakariri Yioba shirampari iraabakempa, ikantake: “Irinijantareanaqueri iriri aisati iriniro, quiso iroanaquero ijina” (Génesis 2:24). Ikoake Yioba shirampari jero ijina irinintabakaajeitya, iraabakempa irosati inkamake. Iro kantaincha ikanti Tasorentsi iranterorika shirampari kaari yai, onkoyeanontya ijina ojokajeririka ojime. Aisati tsinane anteririka kaari ai, inkoyeanontya ojime irojokajerorika ijina (Mateo 19:9). a Ikanti Tasorentsi timatsirika kemisantatsiri ijina eiro yaajitsi pashini tsinane (1 Timoteo 3:2).
PIYOTASANOTERO YOTAANTSIKA
Abirorika timashitachari orampa aabakaachari piyotero jaoka onkantyari pinkimoshiretantyari, aisati pinkimoshiretakantyariri Yioba.
4. Pinkimoshirete ainirokera pitimashita
Ikimoshiretini Jesoshi itimashitani (Mateo 19:11, 12). Piñanatero Mateo 4:23 aisati pinkenketsatabakaajeitya:
-
Itimashitani Jesoshi, ¿paita yantiniri?
Yora kemisantatsiri timashitachari irimatero inkimoshirete ariorika irantabeeteneri Tasorentsi kempe yantakerini Jesoshi. Pamenero SHIAKAANTSI aisati pinkenketsatabakaajeitya:
-
¿Paita irimateri kemisantatsiri ainirokera itimashita?
¿Piyoitimpa?
Te onkantakoteji Bibiria jaoka onkarate pisarentsite paabakempa. Iro kantaincha okanti irimatero shirampari iraye ijina irantyaritanakerika, aisati iriyotanakerika inkenkeshireasanotanakea kameetsa (1 Corintosati 7:36).
5. Pinkoyeeri pitsipatari kameetsa
Yora timashitachari koatsiri iraabakayea ontimatiye inkenkeshireasanotya jaanika intsipatyari. Piñanatero Mateo 19:4-6, 9 aisati pinkenketsatabakaajeitya:
-
¿Paita okameetsatantari inkenkeshireasanotya koatsiri iraabakayea?
Iriñane Tasorentsi amitakotempi payeri kameetsari pitsipatari. Okameetsatasanoti pinkoyeeri pitsipatari nintasanotiriri Yioba. b Piñanatero 1 Corintosati 7:39 aisati 2 Corintosati 6:14. Impoiji pinkenketsatabakaajeitya:
-
Pitimashitarika, ¿paitakea okameetsatantari payeri kemisantiriri Yioba?
-
Payeririka kaari kemisantiri Yioba, ¿jaoka inkantanentyari Yioba?
Iroisoyeeteririka vaca jeri boro inchakiiki irantabeetakantyariri, aitake iroashinonkabakaajeitya. Aisati kemisantatsiri irayerorika kaari kemisantiri Yioba ontimimoteri osheki obashinonkantsi.
6. Paita ikenkeshireakotirori Yioba aabakaantsi
Peerani nampitsiki Israeri, aparopee israerita ishemakaro ijina irotake yojokantakarori, impoiji yaajiro pashini tsinane. Piñanatero Malaquías 2:13, 14, 16 aisati pinkenketsatabakaajeitya:
-
¿Paitakea ishemantakariri Yioba jokabakaachari kaari kemisantiro ikantakantiri?
Yora antirori kaari yai aisati jokabakaachari yoashinonkairi ishaninkapee.
Pamenero SHIAKAANTSI aisati pinkenketsatabakaajeitya:
-
Iriorika pijime (pijina) kaari kemisantiri Yioba, ¿paita panteri pinkaratabakaajeitantyari kimoshire?
7. Pinkemisantero ikantakotirori Yioba aabakaantsi
Aparopee atiri opomerentsitimotari inkemisantero ikantakotirori Yioba aabakaantsi. c Iro kantaincha itasonkakobentiri Yioba kemisantajeitiriri. Pamenero SHIAKAANTSI.
Piñanatero Ijorioririnte 13:4 aisati pinkenketsatabakaajeitya:
-
¿Pimaterompa pinkemisantero ikantakotirori Yioba aabakaantsi? ¿Paita pimatantyarori oka?
Ikoake Yioba ariorika atiri iraabakayea, irisankenatakotya Municiparirariki aisati irisankenatakotya jokabakaachari, iro ikanteetiri requisito legal. Piñanatero Tito 3:1 aisati pinkenketsatabakaajeitya:
-
Abirorika aabakaachari, ¿pisankenatakotakampa anta Municiparirariki?
APAROPEE ATIRI ISAMPITA: “Te nonkoyeji nosankenatero paperiki naabakantyari, ¿paitakea naabakantyari?”.
-
¿Paita pinkanteriri abirori?
EIRO PIPEAKOTAROTSI
Abirorika timashitachari irompa aabakaachari iro kameetsatatsiri, oka oshiaro ipashitimpiri Yioba. Maaroni kemisantajeitiriri Tasorentsi amatero asabike kimoshire.
Paita piyotabakeri
-
Ainirokera itimashita atiri, ¿paita irimateri iranteri?
-
Yora kemisantiriri Tasorentsi, ¿paitakea okameetsatantari iraaje kemisantatsiri?
-
¿Okameetsatimpa aabakaachari irojokabakaashitajea? ¿Paita okantiri Bibiria?
PAMENERO PASHINIPEE
¿Paita kantachari apatiro aaje ‘kemisantiriri Abinkatsarite’?
“Preguntas de los lectores” (La Atalaya, 1 de julio de 2004)
Apite kenkitsarentsi obametempine jaoka ikantakari intakaro inintabakaa aisati jaoka ikantakari yaabakantakari.
Piyotakotero iyenkitsare kemisantatsiri pasonkitimentirori ipakeriri Yioba.
¿Paita ikenkeshireakotirori kemisantatsiri jokabakaantsi?
“Honremos ‘lo que Dios ha unido’ ” (La Atalaya, diciembre de 2018)
b Pashiniki nampitsi timatsi yametari atiri. Yamenayetiniri apa tsinane irijinantyari itomi, aisati yamenayetiniro shirampari ojimentyari irishinto. Yora apa kemisantatsiri te irameneriji iriorika ashitaarantinkari, irintikea yameniri iriorika nintiriri Yioba.
c Tekerarika paabakayeaji jeri pitsipatari, abiro pinkoyeanontya paabakaasanotyarika orampa pojokanajeririka.
