1.  ¿Paita kantachari Antyaro oni Babironia?

2.  ¿Jaoka onkarate inkonijatantyari Mesiashi?

3.  Procedimientos médicos aajatirori irajantsi

4.  ¿Kameetsampa irojokero aabakaachari itsipatari?

5.  Bieshitapee

6.  Jokiirentsi pajenkantatsiri

7.  Pipimantiri aisati ikantiri joeshi

 1. ¿Paita kantachari Antyaro oni Babironia?

Ora “Antearo oni Vavironia” irotake maaroni rerigionipee kaariperori (Irantayeteri Jesoquirishito 17:5). ¿Paitakea?

• Osabiki maaroni nampitsipeeki. Oka tsinane ojibatiri “atiripee savicajeitatsiri jaocaricapee”, aisati irotake “anaacojeitiriri itsipapee atiri ipincatsariti” (Irantayeteri Jesoquirishito 17:15, 18).

• Te oshiaroji poritica aisati kaari oni pimantayetatsiri. Okanti Bibiria: “Yora pincatsaripee” aisati ‘pimantapinibeitachaniri’ iriñabakero maaroni intsonkeetero Antyaro oni Babironia (Irantayeteri Jesoquirishito 18:9, 15).

• Otseeyakotari Tasorentsi. Oka ipajiyeetiri “antajeitiriri shirampari”, okoakotiri iirekite poritico irotake amitakotantariri (Irantayeteri Jesoquirishito 17:1, 2). Amatabitiri sabikajeitatsiri kipatsiki aisati obakantakeri osheki atiripee (Irantayeteri Jesoquirishito 18:23, 24).

Pimpiajero yotaantsiki 13, oparitsa 6

 2. ¿Jaoka onkarate inkonijatantyari Mesiashi?

Okamantake Bibiria, ariorika abisanake 69 semana inkonijate Mesiashi (piñanatero Daniel 9:25).

• ¿Jaoka okaratiri intantanakarori 69 semana? Peerani osarentsiki 455 t.i.J. yareetapaaka Nehemías Jerosareniki “irobetsikantajearori” oka nampitsi (Daniel 9:25, TNM; Nehemías 2:1, 5-8).

• ¿Jaoka okarati onkisote 69 semana? Okanti Bibiria, “aparo quitaiteri onquempetea aparo osarentsi” (Números 14:34; Ezequiel 4:6). Aparoni semana onkempetya 7 osarentsi, aisati 69 semana onkempetya 483 osarentsi (69 por 7).

• ¿Jaoka onkarate ontsonkantanakeari 69 semana? Osarentsi 455 t.i.J. irosati osarentsiki 29 i.J. abisanaje 483 osarentsi. a Omonkaratantakari okapee osarentsi ibaotisataka Jesoshi aisati ipeanaja Mesiashi (Irocashi 3:1, 2, 21, 22).

Pimpiajero yotaantsiki 15, oparitsa 5

 3. Procedimientos médicos aajatirori irajantsi

Meeka itimi aabintantatsiri yaajatiro irajantsi iraabintantempiri ariorika pijokiitakea, iro kantaincha otimi aparopee procedimiento médico eiro yantirotsi kemisantaperotatsiri. Kempetachari: Eiro apiritsi iraja itsipapee atiri, aisati eiro ashinetiritsi aabintantatsiri irobakotajero iraja asatantajearori impoiji ariorika intotee (Deuteronomio 15:23).

Yora kemisantatsiri irishineteri aabintantatsiri iraajatiteri iriraja iramenantyarori jaoka okantari, aisati irishineteri aabintantatsiri irantero ikanteetiri hemodiálisis aisati hemodilución (irantakotero máquina de recuperación de sangre orampa máquina de circulación extracorpórea). Aparopee kemisantatsiri inkoyeanontya iraajatakanterorika iriraja ariorika intoyeeteri, aisati ariorika iramenakantero jaoka okantari iriraja, aisati ariorika irantero pashini tratamiento. Tekera pishineteri aabintantatsiri iraajatitempiro piraja, pijibate pisampiteri jaoka inkanterori piraja iraabintantempiri. Aisati pisampitempa okapee sampitaantsi:

• Ariorika intoyeetempi iraajayeetempirorika piraja, abiro pisampitempa, ¿pikoimpa poimpiajero piraja pishitsaki? Abiro pinkenkeshirempa poimpiajerorika piraja pishitsaki orampa eiro, pamenanontya (Deuteronomio 12:23, 24).

• Ariorika iraajayeetero piraja inkitetantajearori, ¿pikoimpa poimpiajero piraja? Ariorika pantero oka, ¿jaoka pinkantanentyari?

Pimpiajero yotaantsiki 39, oparitsa 3

 4. ¿Kameetsampa irojokero aabakaachari itsipatari?

Okanti Iriñane Tasorentsi te onkameetsateji irojokabakayea aabakaajeitachari, aisati okanti irojokabakayearika eiro yaabakaajatsi (1 Corintosati 7:10, 11). Iro kantaincha aparopee aabakaachari irimajeitero irojokabakaanajea (separarse) ontimerika okapee pomerentsi:

• Te inkoyeji shirampari imperi ishaninka koiteimotariri: Yora shirampari te irineshinonkateriji ishaninkaite, te inkoyeji imperi paitapeerika koiteimotariri, kemperi: Te añeroji iroyeari, iitsaare aisati ibanko (1 Timoteo 5:8).

• Iposapinitiri ishaninka: Ariorika shirampari imposhero ijina ari ojokiitanakea aisati irotaintsi onkame (aisati timatsi tsinane oposhiri ojime) (Carashiasati 5:19-21).

•   Te irishineteroji ijina onkemisanteri Yioba: Osheki itsañakotaro shirampari ijina, te irishineteroji onkemisanteri Yioba, aisati okempeta tsinane osheki otsañakotari ojime, te oshineteriji inkemisanteri Yioba (Itiancaneni Jesoshi 5:29).

Pimpiajero yotaantsiki 42, oparitsa 3

 5. Bieshitapee

Yora kemisantaperotatsiri te iranteroji bieshita kaari ininti Yioba. Iro kantaincha inkenkeshireajero iyotakotabakeri Bibiriaki iriyotantyarori paita iranteri ontimerika bieshita. Pinkenkeshiretero paita panteri abishimotempirika oka:

• Inkantempirika atiri “feliz Navidad”, “feliz Año Nuevo” aisati pashinipee. Pimatero pinkanteri “pasonki”. Iro kantaincha ikoakerika atiri iriyote paita kaari pantantaro oka bieshita, piyotakayeri.

• Inkantempirika pijime kaari kemisantatsi orampa pijina: “Tsame ankarajeiteri ashaninkaite bieshitaki abantyari”. Pijibate pinkenkeshirempa, ¿okameetsatimpa oka bieshita? Impoiji pinkanteri pitsipatari: “Nojaterika bieshita eiro nantirotsi yameyetari kaari kemisantatsi”.

• Ariorika otimi bieshita impempiririka pibatorote kireki. Pisampitempa jaoka pinkanteriri kireki. Payeririka yoka kireki, ¿inkenkeshiriempa pibatorote pantiro oka bieshita? ¿Irompa ipashitimpiri kireki yamenakero kameetsa pantabeeti?

• Otimirika bieshita ipayeetimpiro irekaro. Inkantempirika atiri: “Niyotake narori te panteroji oka bieshita, iro kantaincha nokoake nompempiro oka irekaro”. Tekera payero irekaro, okameetsati pisampitempa: ¿Paita ipantanarori oka irekaro? ¿Yaakameetsatanampa? ¿Irointimpa ikoake irantakayenaro kaari kameetsatatsi? Paitapeerika antayeteri akoasanoti kameetsa ankantanentya, aisati akoasanoti ankisobenteneri Yioba (Itiancaneni Jesoshi 23:1).

Pimpiajero yotaantsiki 44, oparitsa 1

 6. Jokiirentsi pajenkantatsiri

Tempa anintajeitiri atiripee, te ankoyeji ampajenkeri jokiirentsi. Aakeerika jokiirentsi pajenkantatsiri ontime aamabentakotya, eiro apajenkantaritsi. Aisati akoake ankemisantero okantiri Bibiria: “Oquempetaca picavintsaaja avisati, pincavintsaajeiteri itsipapee, pinintajeiteri” (Oromasati 13:8-10).

¿Jaoka onkantyari ankemisantero oka ikantakeri Tasorentsi? Timatsirika atiri aakeri jokiirentsi pajenkantatsiri, eiro yabitsanotiritsi iyemisantaririnte, eiro ipiritsi irako, aisati tsinane eiro onintaborotirotsi oyemisantaroronte. Otimimotimpirika jokiirentsi pajenkantatsiri, eiro pikisatsi inkantempirika piyemisantaririnte “eiro pijatitsi nobankoki”, tempa iriori ishentiri ishaninkaitepee. Tekeratsita pibaotisatyaji pinkamanteri jibatakantantatsiri (coordinador del cuerpo de ancianos) aakempi jokiirentsi pajenkantatsiri, eiro pipajenkantaritsi pashinipee atiri. Ariorika abirori pintsipatyari atiri aakeri jokiirentsi pajenkantatsiri, aisati tekeratsita paabakayeaji pijate anta aabintaantsipankoki iramenantempiri jaoka okantari piraja. Panterorika oka poinijantya pinintajeitiri maaroni atiripee, aisati “ocameetsaveta pincavintsayea avisati, iro cantaincha ocameetsatasanoti aisati pincavintsaajeiteri itsipapee” (Jiriposhisati 2:4).

Pimpiajero yotaantsiki 56, oparitsa 2

 7. Pipimantiri aisati ikantiri joeshi

Ariorika pimpimantero pichakarate aisati inkanteetempirika “pimpena kireki”, okameetsati pisankenatero paperiki eiro opomerentsitimotantimpitsi, pantero oka maaroni atiripee aisati ayemisantaririnte (Jeremías 32:9-12). Aisati timatsirika pomerentsi jeri ayemisantaririnte, kempetachari pomerentsitakayeene kireki aisati paitapeerika amanantiri, ¿paita anteri? Intsipaite abetsikero apiteni, eiro akisanentiritsi ayemisantaririnte.

Ariorika intseeyakotakempi piyemisantaririnte aisati yamatabitakempi inkoshitantempiri, ¿jaoka onkantyari pimatantyarori oka antyaroite pomerentsi? (Piñanatero Mateo 18:15-17). Ikantakee Jesoshi antero okapee:

1. Otimimotimpirika oka pomerentsi, apaniro pijatashiteri piyemisantaririnte pobetsikantajearori oka (pamenero orijaniki 15).

2. Eirorika ikemimpitsi, paanakeri aparoni kemisantatsiri antyari irompa apite kemisantatsiri inkenketsatakantyariri, eiro añantajarotsi pomerentsi (pamenero orijaniki 16).

3. Terika inkemisantempiji paabetanakari apite piyemisantaririnte, pinkenketsatakayeri jibatakantirori iramitakotantempiri pobetsikajero pomerentsi (pamenero orijaniki 17).

Timatsirika pomerentsi anta apatotaantsiki paamabentempa, eiro pairitsi piyemisantaririnte anta joeshiki, eiro ikantimatanteetaritsi Yioba aisati ayemisantaririnte (1 Corintosati 6:1-8). Iro kantaincha timatsi pomerentsi irobetsikeri joeshi, kempe: timatsirika jokajerone ijina, irapitsayeetempiririka pitomi, impantyariri iroyeari pitomi aisati paitapeerika, irotake okapee irobetsikeri joeshi.

Aisati irimatero kemisantiriri Tasorentsi inkamanteri joeshi otimirika antyaroite kaari kameetsatatsi, kempe: ariorika atiri irantabintsatero tsinane te onkoyeji, irantabintsateri jananeki, irantabakayea atiri, timatsirika koshitaantsi, aisati ariorika iroyeri atiri ari irimatero iraanakeri joeshiki.

Pimpiajero yotaantsiki 56, oparitsa 3