Maaroni atiri ikishita iishi aisati ikitsaataro kitsaarentsi inebetari. Ariorika ankemisantero okantiri Bibiria asaikajeite kimoshire aisati ankimoshiretakayeri Yioba. Tsame ayotero ikantakotiri Tasorentsi ankitsaatyari.

1. ¿Paita obameteri Bibiria ankitsaatya?

Maaroni kemisantatsiri inkitsaatya kameetsa eiro inebeyeetantaritsi, aisati kameetsa inkenkeshiretya. Okameetsati inkitsaajeitya kameetsa inkempejeitantyariri “quemisantajeitiriri Tasorentsi” (1 Timoteo 2:9, 10). Piyotero okarati cuatro obametaantsi: 1) Ankitsaatya kameetsa, maaroni kemisantiriri Yioba ikishita aisati ikitsaataro inebetari irijatantyari apatotaantsiki, oka ikitsaatarika oinijairi Tasorentsi ipinkatsatasanotiri. 2) Ankitsaatya kameetsa eiro akoitsi inebeyeetee. 3) Ariorika ankitsaatya, kameetsa ankenkeshiretya eiro akempetantarotsi iitsaare tseenkantatsiri. 4) Ankitsaatyarika kameetsa ainijantya arotake kemisantiriri Tasorentsi (1 Corintosati 10:31).

2. Ankitsaatyarika kameetsa, ¿jaoka inkantanentyari ayemisantaririnte?

Okameetsabeta ankoyeero aitsaare, iro kantaincha ankenkeshireakotero paita inkenkeshiretempari ayemisantaririnte aitsaare aisati aishi. Eiro akoitsi impashibentakayearo atiri aitsaare, irotake akemisantantarori oka obametaantsi: “Anquenqueshireacojeiteri ayemisantaririnte, inquimoshirejeitanteari iriori. Aisati amitacojeiteri iriotasanotanteari, inquemisantasanotanteari” (piñanatero Oromasati 15:1, 2).

3. ¿Jaoka onkantyari amitakoteri akitsaatari inkemisantantyariri atiri Tasorentsi?

Maaroni kitaiteripee ankitsaatya kameetsa jaokarika ajateri. Iro kantaincha ankitsaatyaro aitsaare kameetsa ajatantyari ibankoki Tasorentsi aisati ajatantyari ankamantante. Te ankoyeji iramenero atiri aitsaare irojokeri Tasorentsi. Irointikea akoasanoti ankitsaatya kameetsa amitakotantyariri itsipapee iriyotero keariotatsiri aisati “incoasanojeite atiri inquemisanteri yora oavisacojeitaqueeri” (Tito 2:10).

 PIYOTASANOTERO YOTAANTSIKA

4. Aitsaare aisati aishi oinijanta apinkatsatiri Yioba

¿Paitakea ankenkeshiretantyari jaoka okantari aitsaare aisati aishi? Piñanatero Salmos 47:2 aisati pinkenketsatabakaajeitya:

• ¿Jaoka onkantyari inkitsaatya kamantakotiriri Yioba?

• Pijaterika ibankoki Tasorentsi aisati pinkamantanterika, ¿paitakea pinkenkeshireakotantyari jaoka okantari piitsaare aisati piishi?

 5. Jaoka pinkantyari pinkitsaatya aisati pinkishitya

Pamenero SHIAKAANTSI.

Ariorika pamenero pinkitsaatyari eiro pamenirotsi kitsaarentsi pinatachari. Irointikea pamenero kitsaarentsi kameetsatatsiri aisati kitetatsiri. Piñanatero 1 Corintosati 10:24 aisati  1 Timoteo 2:9, 10. Impoiji pinkenketsatabakempa, ¿paitakea eiro pikitsaatantarotsi...

• ... kitsaarentsi pitsitatsiri aisati tsereatsiri?

• ... kitsaarentsi abikatsiri, orijaniki, karashempa, karaneji iramenanteetempiri?

Keariotake arojei te ankemisanteroji kantaantsi ipakeriri Tasorentsi Moiseshi, iro kantaincha oka kantaantsika obametee paita ikenkeshireari Yioba. Piñanatero Deuteronomio 22:5 aisati pinkenketsatabakaajeitya:

• ¿Paitakea eiro ikitsaatantatsi shirampari kempe tsinane? Aisati, ¿paitakea eiro okitsaatantatsi tsinane kempe shirampari?

Piñanatero 1 Corintosati 10:32, 33 aisati 1 Joa 2:15, 16. Impoiji pinkenketsatabakaajeitya:

• Oka pikitsaatari, ¿inebetarompa piyemisantaririnte aisati atiripee? ¿Paitakea pinkenkeshiretantyarori pikitsaatarika?

• Anta pisabikinta, ¿jaoka ikantari atiri ikitsaata? ¿Jaoka ikantari ikishita?

• ¿Ariompa inkitsaatakea ayemisantaririnte kempe atiri timatsiri anta pisabikinta? ¿Paita pikenkeshiretari abirori?

 EIRO PIPEAKOTAROTSI

Ariorika ankitsaatya aisati ankishitya kameetsa ainijayeri Yioba apinkatsatiri aisati itsipapee.

Paita piyotabakeri

• ¿Paitakea ikoantari Yioba ankitsaatya kameetsa?

• ¿Paita obametimpiri Bibiria pinkitsaatantyari kameetsa?

• ¿Ariompa amitakotakeri pikitsaatari inkemisantantyariri atiri Tasorentsi? ¿Jaoka onkantyari amitakotantyariri?