Ariorika ankarateri ayemisantaririnte akempeta pinkatsarini Iravirini. Ikantake iriori: “¡Ocameetsatasanotaque catsini ariorica iquempeavacaajeita quemisantatsiri, isavicajeiti cameetsa, yaacameetsatavacaajeita!” (Salmos 133:1). Ashintsiperote aakameetsatabakaajeitya maaroni.

1. ¿Paita yantajeitiri kemisantajeitiriri Yioba?

Pijaterika apatotaantsiki irashi kemisantiriri Yioba pashiniki nampitsi, iraakameetsatempi kemisantatsiri pashinisati, inkempetakantempi pishaninkasanori ontimabetya te inkemeroji piñane. Jaokarika pijayeteri, ari piñakeri kemisantiriri Yioba iñanatiro Bibiria aisati sankenarentsipee kempe abiro piñanatiri. Jaokarika isaikajeitiri inintabakaajeita, ikoake “inkamantakotero ibajiro Yioba” aisati “intsipatabakaajeitya inkeariobentantyanariri” (Sofonías 3:9, TNM).

2. ¿Paita panteri pishaninkatantyariri piyemisantaririnte?

“Pinquearioventero, pinintavacaasanojeitea catsini” (1 Petero 1:22). Eiro pamenirotsi kaari kameetsatatsi yantiri piyemisantaririnte, irointikea pamenero maaroni kameetsatatsiri yantiri. Eiro apaniro pitsipatari piyemisantaririnte kempetimpiri, irointikea pintsipatyari piyemisantaririnte pashinisati, onashibeta iriñane pintsipatyari. Timatsirika pasankaneki pikisanentiri atiri pashinisati, pojokero oka (piñanatero 1 Petero 2:17). a

3. ¿Paita panteri ikisakempirika piyemisantaririnte?

Atsipatabakaajeibeta, iro kantaincha otimi antane, irotake akisabakantari aparopee kitaiteri. Okamantee Bibiria: “Eiro pipiataritsi quisavetempineri, irointi pincavintsayeri. Tempa icavintsaimpi Avincatsarite, meeca pishiacoteri, pincavintsaajeiteri itsipapee” (piñanatero Corosashisati 3:13). Osheki kitaiteri akantimonentakari Yioba, iro kantaincha iriori ikabintsaajeitee, irotake ikoantari ankabintsayeri ayemisantaririnte. Piyotirorika pikantimonentakari pishaninka, pishintsite pinkanteri inkabintsayempi (piñanatero Mateo 5:23, 24). b

 PIYOTASANOTERO YOTAANTSIKA

4. Pojokero pikisanentiri pashinisati

Akoake aninteri maaroni ayemisantaririnte, iro kantaincha timatsi okomitimotee, tempa te ankempetabakaajeitya arorijei. ¿Paita amitakoteene anintajeiteri maaroni ayemisantaririntepee? Piñanatero Itiancaneni Jesoshi 10:34, 35 aisati pinkenketsatabakaajeitya:

• Te irinashitakayeariji Yioba atiripee, irointikea ikoake irishaninkatajeari, ¿jaoka pinkanteriri abirori pashinisatipee?

• Anta pinampiki, ¿paita ikantimayeetiri? ¿Paita kaari okameetsatanta pinkempetyari kantimatantatsiri?

Piñanatero 2 Corintosati 6:11-13 aisati pinkenketsatabakaajeitya:

• ¿Paita panteri pishaninkatantajeariri piyemisantaririnte pashinisati?

5. Okameetsati pinkabintsayeri piyemisantaririnte

Ikameetsatasanoti Yioba, eiro amatirotsi ankanteri “nonkabintsayempi”, irintikea iriori ari inkabintsaakee osheki. Piñanatero Salmos 86:5 aisati pinkenketsatabakaajeitya:

• ¿Jaoka ikantari Yioba ikabintsanti?

• Tempa Yioba iritake kabintsantatsiri, ¿pipasonkitirimpa? ¿Paita pipasonkitantariri?

• ¿Paitakea otimimotanteeri akisabakaaka kitaiteripeeki?

Ariorika ankempetyari Yioba antsipajeityari kameetsa maaroni ayemisantaririnte. Piñanatero Proverbios 19:11 aisati pinkenketsatabakaajeitya:

• Ariorika inkisheetempi, ¿jaoka pinkantyari abiro eiro otimimotantimpitsi pomerentsitantsi?

 Timatsi arori akishiri atiripee, ¿jaoka ankantyari eiro akisantaritsi? Pamenero SHIAKAANTSI aisati pinkenketsatabakaajeitya:

• ¿Jaoka okantari tsinane aakameetsatantajarori oyemisantaroronte?

 EIRO PIPEAKOTAROTSI

Ariorika pinkabintsayeri piyemisantaririnte aisati paakameetsateri, ari pintsipatabakaajeitakea kameetsa apatotaantsiki.

Paita piyotabakeri

• ¿Jaoka onkantyari pojokantyarori pikisanentiri pashinisati?

• Ariorika inkisheetempi, ¿paita panteri abirori?

• Kempe Yioba, ¿pikoimpa pinkabintsayeri itsipapee? ¿Paita pikoantari pinkabintsante?