YOTAANTSI 59
Ari pimatakero oijanataantsi
Maaroni kemisantaperotatsiri intimimoteri kisanenterine aisati oijanaterine. ¿Intsaroakayearimpa yokapee?
1. ¿Paita ayotantari iroijanayeetee?
Iriñane Tasorentsi okamantee: “Queario, iquisheetiri maaroni quemisantiriri Jesoquirishito, ariorica icoasanotaque inquemisantasanoteri” (2 Timoteo 3:12). Te inkempetyariji Jesoshi tseenkantatsiri, irotake yoijanayeetantakariri. Aisati arori te ankempetyariji tseenkantatsiri, pinkatsari kipatsisati aisati kemisantashiyetachari, irotake yoijanatanteeri (Joa 15:18, 19).
2. ¿Paita anteri eiro atsaroakantaritsi oijanateene?
Okameetsati meeka ashintsiperote ashiretasanotantyariri Yioba. Ari amatakero oka amanapiniteririka Yioba, añanatapiniterorika iriñane maaroni kitaiteripeeki, aisati ajatapiniterika apatotaantsiki. Panterorika okapee ari pimatakero pomerentsitimobetempine. Peerani yoijanayeetakerini Paboro, irotake isankenatantakarori: “Niotaque intacotapinitaquena Avincatsarite, eiro noquenqueshireatsi” (Ijorioririnte 13:6).
Ariorika ankamantapinitante, oka amitakotee ashiretasanotyari Yioba aisati eiro atsaroakaaritsi oijanateene (Proverbios 29:25). Eirorika pitsaroakaarotsi meeka pinkamantante, pimatero pinkamantante koajikani ariorika intimabetakea pinkatsari oijanabetempine (1 Tesaronicasati 2:2).
3. Pimaterorika oijanataantsi, ¿paita kameetsatatsiri abishimotempine?
Te ankoabetya iroijanayeetee, iro kantaincha amaterorika oka, aitake ankisote ashiretari Tasorentsi. Eirorika otimitsi ashintsiti ari iramitakotee Yioba ashaninkatasanotyari irinti (piñanatero Santiaco 1:2-4). Okatsitimotiri Yioba ariorika iriñee ashinonka, iro kantaincha ikimoshireti ariorika amatero pomerentsitatsiri. Okamantee Bibiria: “Ariorica impasatashitempi yora nampitimpiri aisati te pimpiatsateari, ari irineacameetsatempi Tasorentsi.” (1 Petero 2:20). Intasonkakobenteri Tasorentsi maaroni kemisantiriri materone pomerentsi, inkantaitatiyempani irañajeitaje, eiro iñajiritsi kisanenterine (Mateo 24:13).
PIYOTASANOTERO YOTAANTSIKA
Tsame ayotero ari amatakero ashiretyari Yioba intimabetyarika oijanateene. Aisati ayotakotero jaoka onkantyari intasonkakobentee Yioba amaterorika pomerentsi.
4. Inkisabetempirika pishaninka ari pimatakero
Ikamantakee Jesoshi aparopee ashaninkaperori inkishimenteero ankemisanteri Yioba. Piñanatero Mateo 10:34-36 aisati pinkenketsatabakaajeitya:
-
Pikoakerika pantabeeteneri Yioba, ¿jaoka inkantanentyari pishaninka?
Piyotantyariri atiripee abishimotakeriri okapee pamenero SHIAKAANTSI. Impoiji pinkenketsatabakaajeitya:
-
Inkantempirika pishaninka pojokero pantabeetiniri Yioba, ¿paita panteri abirori?
Piñanatero Salmos 27:10 aisati Maricoshi 10:29, 30. Piñanatakero maaroni okapee pinkenketsatabakayea:
-
Oka ikashiakaakempiri Yioba, ¿amitakotempimpa pimatero ariorika inkishempi pishaninkapee? ¿Jaoka onkantyari amitakotantempiri?
5. Eiro pishinetiritsi oijanatempine irojokakayempiri Yioba
Ontimatiye ashintsibenteneri Yioba, ontimabetyarika oijanataantsi onkantyani antabeeteneri Yioba. Pamenero SHIAKAANTSI aisati pinkenketsatabakaajeitya:
-
Ariorika iroijanayeetempi, ¿jaanika shintsitakayempine? ¿Paita pamenabakeri shiakaantsikika?
Piñanatero Itiancaneni Jesoshi 5:27-29 aisati Ijorioririnte 10:24, 25. Piñanatabakero okapee sankenarentsi aisati pinkenketsatabakaajeitya:
-
Intimerika pinkatsari tikaakotempine pinkamantante aisati pampatotya, ¿paita okameetsatantari aikero pijatatiye pinkemisanteri Yioba?
6. Irimatakayempiro Yioba oijanataantsi
Osheki kemisantiriri Yioba onashiyebetaka isarentsite aisati ipoñajeita, otimimobetakari oijanataantsi imatakero ikemisantakeri Tasorentsi. Piyotantyarori jaoka okantakari imatantakarori pamenero SHIAKAANTSI. Impoiji pinkenketsatabakaajeitya:
-
¿Paita amitakotakeriri yokapee kemisantiriri Yioba imatakero oijanataantsi?
Piñanatero Oromasati 8:35 aisati 37-39, impoiji 2 Corintosati 4:7. Piñanatakero okapee sankenarentsi aisati pinkenketsatabakaajeitya:
-
Okapee sankenarentsi, ¿jaoka onkantyari amitakotantempiri pimatero paitapeerika pomerentsitantsi?
Piñanatero Mateo 5:10-12 aisati pinkenketsatabakaajeitya:
-
¿Paita pinkimoshiretantyari ontimabetya oijanataantsi?
Osheki kemisantiriri Yioba imatakero pomerentsipee aisati oijanataantsi. ¡Aitake abirori pimatakero okapee!
APAROPEE ATIRI IKANTI: “Eiro nomatirotsi oijanataantsi”.
-
¿Paita sankenarentsi Bibiria poinijayeriri atiri eiro ikenkeshireantarotsi oka?
EIRO PIPEAKOTAROTSI
Iñakameetsatiro Yioba ashintsibentiniri iriori, aisati antabeetiniri otimimobetee oijanataantsi. ¡Iramitakoteerika Yioba ari amatakero pomerentsitimoteene!
Paita piyotabakeri
-
¿Paita anteri eiro omapokanteetsi oijanataantsi?
-
¿Jaoka onkantyari abetsikempa amatantyarori pokatsine oijanataantsi?
-
Ontimabetyarika oijanataantsi, ¿paita piyotantari ari pimatakero pantabeeteneri Yioba?
PAMENERO PASHINIPEE
Piyotakoteri jaoka okantakari yamitakotakeri Yioba ebankari kemisantatsiri itimabeitani karabosoki.
Aparoni aabakaachari osheki osarentsipee ikemisantakeri Yioba otimimobetakari oijanataantsi. Piyotakotero paita shintsitakaakeriri.
Piyotero paita panteri ariorika iroijanayeetempi.
“Preparémonos ahora para la persecución” (La Atalaya, julio de 2019)
¿Paita okantakotiri Bibiria iroijanateerika ashaninkaperori? ¿Jaoka onkantyari aikero aakameetsatabakaajea aisati aikero ankeariobenteneri Yioba?
“La verdad no trae ‘paz, sino espada’” (La Atalaya, octubre de 2017)
