Memoryal i donn nou en bon loportinite pour reflesir lo bann benediksyon ki nou pou gannyen a lavenir gras a ranson, tel parey rezireksyon. I pa ti zanmen dan plan Zeova ki imen i mor. Sanmenm rezon ki lanmor i enn bann douler pli fermal, sirtou ler nou perdi en dimoun ki nou kontan. (1Ko 15:26) Menm Zezi son leker ti fermal ler i ti vwar son bann disip pe plere apre ki Lazar ti’n mor. (Zan 11:33-35) Alor vi ki Zezi i reflekte son Papa parfetman, nou kapab asire ki Zeova osi i soufer ler i vwar nou pe plere akoz nou’n perdi en dimoun ki nou kontan dan lanmor. (Zan 14:7) Zeova i enpasyan pour sa letan kan i pou resisit son bann serviter e nou osi nou devret santi parey.—Zob 14:14, 15.

Vi ki Zeova i en Bondye annord, i fer sans pour krwar ki rezireksyon pou ganny fer dan lord. (1Ko 14:33, 40) I kapab ki dan plas lanterman, i pou annan bann laranzman pour akey bann ki resisite. Eski ou medit lo rezireksyon, sirtou ler ou dan dey? (2Ko 4:17, 18) Eski ou remersye Zeova ki i’n donn nou sa ranson e ki i’n montre nou dan Labib ki bann mor pou viv ankor?—Kol 3:15.

• Lekel parmi ou bann zanmi ek fanmir ki ou pli anvi vwar zour rezireksyon?

• Ki personnaz Labib ou pli anvi zwenn e koz avek?