Bann profesi dan Labib i montre ki Satan ti pou persekit nou pour esey anpes nou prese. (Zan 15:20; Re 12:17) Ki mannyer nou kapab ed nou bann frer ek ser ki pe ganny persekite dan lezot pei? Nou kapab priy pour zot. “Siplikasyon en zonm drwat i annan bokou lefe.”—Zak 5:16.

Kwa ki nou kapab demande dan nou lapriyer? Nou kapab demann Zeova pour donn bann frer ek ser kouraz e pour ed zot pour ki zot pa viv dan lafreyer. (Iza 41:10-13) Nou kapab osi priye pour ki bann gouvernman oubyen lotorite i azir an faver predikasyon “pour ki nou kapab kontinyen viv en lavi kalm e trankil.”—1Ti 2:1, 2.

Ler Pol ek Pyer ti ganny persekite, bann Kretyen dan premye syek ti mansyonn zot non dan lapriyer. (Akt 12:5; Ro 15:30, 31) Menm si nou pa konn non tou sa bann frer ek ser ki pe ganny persekite ozordi, nou kapab mansyonn zot kongregasyon, pei oubyen rezyon.