Imazin ou pe viv Galile dan letan Zezi. Ou’n al Zerizalenm pour selebre Lafet bann Payot. Sa lavil i ranpli avek lezot adorater Zeova ki sorti byen lwen. Ou anvi ofer en lofrann avek Zeova. Alor, ansanm avek ou kabri ki ou pou ofer konman lofrann, ou konmans marse pour al kot tanp dan sa lavil ranpli avek dimoun. I pa en voyaz fasil. Ler ou arive, tanp i plen avek lezot dimoun ki zot osi zot anvi ofer zot lofrann. Finalman, i ariv ou tour pour donn pret ou kabri. A sa moman, ou rapel ki ou frer ki kapab la parmi lafoul oubyen dan lavil, i annan en keksoz kont ou. Zezi i dir ki ou devret fer. (Lir Matye 5:24.) Ki mannyer ou avek ou frer ki’n ganny ofanse i kapab fer lape parey Zezi in dir? Dan sa de lalis anba, met en mark o bor sa larepons ki byen.

OU BEZWEN . . .

• koz avek ou frer selman si ou krwar i annan en bon rezon pour li ankoler

• esey koriz ou frer akoz ou krwar i tro sansib oubyen akoz li osi i responsab pour sa problenm

• ekout avek pasyans anmezir ki ou frer i eksprim li e menm si ou pa konpran tou keksoz, senserman demann leskiz pour lafason ki i santi oubyen pour konsekans ki ou aksyon in anmennen

OU FRER I DEVRET . . .

• rod sipor lezot dan kongregasyon e dir zot ki mannyer ou’n mal fer avek li

• reprimann ou, revwar tou pti detay sa lofans e demann ou pour admet ou fot

• rekonnet ki ou’n abes ou e ki ou’n annan kouraz pour apros li e li osi i bezwen pardonn ou avek tou son leker

Menm si konmela nou nepli ofer sakrifis zannimo dan nou ladorasyon, ki Zezi ti ansennyen konsernan fer lape avek nou frer ek ladorasyon ki Bondye i aksepte?