Premye liv Kronik 15:1-29
15 David ti kontinyen konstri bann lakaz dan Lavil David. I ti prepar en landrwa pour Lars* sa vre Bondye e fer en latant pour li.
2 Alor i ti dir: “Personn pa devret anmenn Lars sa vre Bondye eksepte bann Levit, parski Zeova in swazir zot pour anmenn Lars Zeova e pour servi li pour touzour.”
3 Apre, David ti rasanble pep Izrael antye Zerizalenm pour zot anmenn Lars Zeova dan sa landrwa ki i ti’n prepare pour sa Lars.
4 David ti rasanble bann desandans Aaron ek bann Levit.
5 Parmi bann Koatit, i ti annan sef Ouriyel ek 120 son bann frer.
6 Parmi bann Merarit, i ti annan sef Asaya ek 220 son bann frer.
7 Parmi bann Gersonmit, i ti annan sef Zoel ek 130 son bann frer.
8 Parmi bann desandans Elizafann, i ti annan sef Semaya ek 200 son bann frer.
9 Parmi bann desandans Ebronn, i ti annan sef Eliel ek 80 son bann frer.
10 Parmi bann desandans Ouzyel, i ti annan sef Aminadab ek 112 son bann frer.
11 An plis ki sa, David ti apel pret Zadok ek pret Abyatar e osi Ouriyel, Asaya, Zoel, Semaya, Eliel ek Aminadab ki ti bann Levit.
12 I ti dir zot: “Zot, zot bann sef fanmir* parmi bann Levit. Sanktifye* zot lekor, zot ek zot bann frer. Apre anmenn Lars Zeova Bondye Izrael dan sa landrwa ki mon’n prepare pour li.
13 Vi ki zot pa ti anmenn sa Lars premye fwa, Zeova ti pran en gran lakoler avek nou, parski nou pa ti rode ki mannyer nou devret fer li.”
14 Alor bann pret ek bann Levit ti sanktifye zot lekor pour zot anmenn Lars Zeova Bondye Izrael.
15 Apre, bann Levit ti anmenn Lars sa vre Bondye lo zot zepol avek bann bar, parey Moiz ti’n donn lord dapre sa ki Zeova ti’n dir.
16 Apre, David ti dir bann sef Levit swazir zot bann frer ki ti bann santer, pour sant avek lazwa e avek bann lenstriman lanmizik: bann lenstriman lakord, larp ek senbal.
17 Alor bann Levit ti swazir Emann garson Zoel. Parmi son bann frer, zot ti swazir Asaf garson Berekya e parmi bann Merarit zot bann frer, zot ti swazir Etann garson Kousaya.
18 Ansanm avek zot, i ti annan zot bann frer ki ti dan dezyenm group, Zekarya, Benn, Zaazyel, Semiramot, Zeyel, Ouni, Eliab, Benaya, Maaseya, Matitya, Elifeleou, Mikneya e Obed-Edonm ek Zeiel ki ti bann gardyen baro.
19 Emann, Asaf ek Etann ki ti bann santer, ti devret zwe bann senbal an kwiv.
20 Zekarya, Azyel, Semiramot, Zeyel, Ouni, Eliab, Maaseya ek Benaya ti zwe bann lenstriman lakord ki ganny akorde pour zwe bann not ki o.*
21 Matatya, Elifeleou, Mikneya, Obed-Edonm, Zeiel ek Azazya ti zwe larp ki ganny akorde pour zwe bann not ki ba.* Zot ti pou diriz bann lanmizik.
22 Kenanya sef bann Levit ti siperviz transportasyon Lars, parski i ti en eksper
23 e Berekya ek Elkana ti bann gardyen ki ti vey Lars.
24 Sebanya, Zosafat, Netanel, Amasay, Zekarya, Benaya ek Eliezer ki ti bann pret, ti soufle tronpet byen for devan Lars sa vre Bondye. Obed-Edonm ek Zeya osi ti servi konman bann gardyen pour Lars.
25 Apre, David, bann ansyen dan Izrael ek bann sef mil solda ti al sers lars lalyans Zeova dan lazwa kot lakaz Obed-Edonm.
26 Vi ki sa vre Bondye ti’n ed bann Levit ki ti pe anmenn lars lalyans Zeova, zot ti sakrifye set zenn toro ek set zenn mal mouton.
27 David ti’n met en manto* san lanmans ki ti’n ganny fer avek bon kalite latwal, parey sa ki tou bann Levit ki ti pe anmenn Lars ti’n mete e parey pour bann santer ek Kenaya ki ti ansarz transportasyon ek bann santer. David ti’n osi met en efod* ki ti’n ganny fer avek linenn.
28 Tou bann Izraelit ti pe anmenn lars lalyans Zeova. Zot ti pe kriye avek lazwa e zot ti pe zwe korn, tronpet ek senbal. Zot ti pe zwe bann lenstriman lakord ek larp byen for.
29 Me ler lars lalyans Zeova ti ariv dan Lavil David, Mikal fiy Sail ti get par lafnet e i ti vwar Lerwa David anba pe sot sote e pe selebre. I ti konmans degout David dan son leker.
Bann not
^ Vwar Leksplikasyon bann mo.
^ Literalman, “sef lakaz paternel.”
^ Oubyen “met apar.”
^ Literalman, “Alamot.” Vwar Leksplikasyon bann mo.
^ Literalman, “Seminit.” Vwar Leksplikasyon bann mo.
^ Manto ti ganny mete par lao lenz en dimoun.
^ Vwar Leksplikasyon bann mo.
