Premye liv Kronik 19:1-19
19 Pli tar, Naas lerwa bann Amonnit ti mor e son garson ti vin lerwa dan son plas.
2 David ti dir: “Mon pou demontre lanmour fidel anver Anoun garson Naas parski son papa ti demontre lanmour fidel anver mwan.” Alor David ti fer bann mesaze al rekonfort Anoun vi ki son papa ti’n mor. Me ler bann serviter David ti ariv dan pei bann Amonnit pour konsol Anoun,
3 bann prens Amonnit ti dir Anoun: “Eski ou krwar ki David in anvoy son bann serviter rekonfort ou zis pour li onor ou papa? Pa David in fer son bann serviter vin kot ou pour zot espyonn byen sa pei pour li konnen ki i annan ladan e pour li detri li?”
4 Alor Anoun ti pran bann serviter David, i ti raz zot labarb e koup zot lenz par lao zot deryer e apre i ti fer zot ale.
5 Ler David ti tann sa ki ti’n arive avek sa bann zonm, deswit i ti fer lezot zonm al zwenn zot parski zot ti’n ganny imilye. Lerwa ti dir zot: “Reste Zeriko ziska ler zot labarb i repouse e apre, retournen.”
6 Pli tar, bann Amonnit ti remarke ki David ti’n ay zot. Alor Anoun ek bann Amonnit ti anvoy 1,000 talan* larzan pour lwe bann saret lager e pour anploy bann kavalye ki sorti Mezopotami,* Aram-Maaka ek Zoba.
7 Alor zot ti lwe 32,000 saret lager, ansanm avek lerwa Maaka ek son bann dimoun. Zot ti vini e etabli zot kan devan lavil Medeba. Bann Amonnit ti sorti dan zot lavil e rasanble pour lager.
8 Ler David ti tann sa, i ti anvoy Zoab ek son larme antye al lager avek zot e sa ti enkli son bann gerye ki pli for.
9 Bann Amonnit ti al dan larantre lavil e organiz zot pour lager, me bann lerwa ki ti’n vini ti dan lakanpanny zot tousel.
10 Ler Zoab ti vwar ki bann larme ti pe vin atak zot par devan e par deryer, i ti swazir bann pli bon solda dan Izrael e i ti organiz zot pour zot lager avek bann Siriyen.
11 I ti fer son frer Abisay ansarz larestan solda pour organiz zot pour lager avek bann Amonnit.
12 Apre i ti dir: “Si bann Siriyen i vin tro for pour mwan, ou devret vin sov mwan me si bann Amonnit i vin tro for pour ou, mon pou vin sov ou.
13 Nou devret reste for e pran kouraz pour lager pour nou pep e pour bann lavil nou Bondye. Zeova pou fer sa ki li i vwar i bon.”
14 Apre, Zoab ek son bann zonm ti al lager avek bann Siriyen me bann Siriyen ti sove e taye.
15 Ler bann Amonnit ti vwar ki bann Siriyen ti’n sove, zot osi zot ti sove devan son frer Abisay e zot ti al dan lavil. Apre sa, Zoab ti retourn Zerizalenm.
16 Ler bann Siriyen ti vwar ki bann Izraelit ti’n ganny laviktwar lo zot, zot ti anvoy bann mesaze pour rasanble bann Siriyen ki ti dan rezyon Larivyer.* Sofak sef larme Adadezer ti diriz zot.
17 Ler zot ti dir David sa ki ti pe arive, deswit i ti rasanble larme Izrael antye e i ti travers Larivyer Zourden e al kot zot. I ti organiz zot pour lager avek bann Siriyen. David ti al lager avek bann Siriyen e zot ti lager avek li.
18 Bann Siriyen ti sove devan bann Izraelit e David ti touy 7,000 solda ki ti pe kondwir saret lager ek 40,000 solda apye parmi bann Siriyen. I ti osi touy Sofak zot sef larme.
19 Ler bann serviter Adadezer ti vwar ki Izrael ti’n ganny laviktwar lo zot, deswit zot ti fer lape avek David e zot ti vin son bann serviter. Bann Siriyen pa ti oule ed bann Amonnit ankor.
Bann not
^ En talan ti pez 34.2 kilo. Vwar Lezot lenformasyon B14.
^ Literalman, “Aram-Naaraim.”
^ Setadir, Larivyer Efrat.
