Premye liv bann Lerwa 4:1-34
4 Lerwa Salomon ti diriz Izrael antye.
2 Sa ti son bann o zofisye:* Azarya garson Zadok ti pret,
3 Elioref ek Aiya bann garson Sisa ti bann sekreter, Zeosafat garson Ailoud ti ekri tou sa ki ti arive,
4 Benaya garson Zeoada ti ansarz larme, Zadok ek Abyatar ti bann pret,
5 Azarya garson Natann ti ansarz bann gouverner, Zaboud garson Natann ti en pret e i ti zanmi lerwa,
6 Aisar ti ansarz lakour lerwa e Adoniram garson Abda ti ansarz bann dimoun ki lerwa ti’n donn lord pour travay dir konman lesklav.
7 Salomon ti annan 12 gouverner ki ti ansarz Izrael antye e zot ti fourni manze pour lerwa ek tou dimoun ki ti reste kot li. Sak sa bann gouverner ti responsab pour fourni manze pour en mwan dan en lannen.
8 La ki mannyer zot ti apele: Garson Our ki ti ansarz bann teritwar dan montanny Efraim,
9 garson Deker ki ti ansarz Makaz, Saalbim, Bet-Semes ek Elonn-Bet-Anann,
10 garson Esed ki ti ansarz Aroubot (i ti osi ansarz Soko ek Efer antye),
11 garson Abinadab ki ti ansarz tou bann lapant montanny Dor (Tafat fiy Salomon ti son madanm),
12 Baana garson Ailoud ki ti ansarz Taanak, Megido ek Bet-Seann antye ki ti o bor Zaretann ki par anba Zezreel. I ti ansarz depi Bet-Seann ziska Abel-Meola e ziska dan rezyon Zokmeam.
13 I ti osi annan garson Geber ki ti ansarz Ramot-Gilead (i ti ansarz bann vilaz* Zair garson Manase ki Gilead. I ti osi ansarz rezyon Argob ki Basann: 60 gran lavil ki ti annan bann miray ek bann baro ki annan bann bar kwiv),
14 Ainadab garson Ido ki ti ansarz Maanaim,
15 Aimaaz ki ti ansarz Naftali (i ti marye avek Basemat en lot fiy Salomon),
16 Baana garson Ousay ki ti ansarz Aser ek Bealot,
17 Zeosafat garson Paroua ki ti ansarz Isakar,
18 Simei garson Ela ki ti ansarz Benzamen,
19 Geber garson Ouri ki ti ansarz Gilead, setadir teritwar Sionn lerwa bann Amorit ek teritwar Og lerwa Basann. I ti osi annan en gouverner ki ti ansarz tou lezot gouverner dan pei.
20 I ti telman annan en kantite dimoun dan Zida ek Izrael ki zot ti parey bann gren disab o bor lanmer. Zot ti pe manze, bwar e zot ti ere.
21 Salomon ti diriz tou bann rwayonm depi Larivyer* ziska pei bann Filisten e ziska lafrontyer Lezip. Zot ti anmenn taks* ki Salomon ti demande e zot ti servi li tou dilon son lavi.
22 Lakantite manze ki Salomon ti gannyen toulezour pour li ek bann dimoun ki ti reste kot li ti 30 kor* bon lafarin ek 60 kor lafarin,
23 10 bef angrese, 20 bef ki sorti dan laplenn* ek 100 mouton san kont bann serf, gazel, serf rouz* ek bann koukou* angrese.
24 Salomon ti kontrol tou keksoz lo sa kote Larivyer,* depi Tifsa ziska Gaza, sa ti enkli tou bann lerwa lo sa kote Larivyer. I ti annan lape dan tou rezyon partou otour li.
25 Tou dimoun dan Zida ek Izrael ti viv an sekirite tou dilon lavi Salomon. Sakenn anba son prop pye rezen ek son prop pye fig, depi Dann ziska Beer-Seba.
26 Salomon ti annan 4,000* park pour son bann seval ki anmenn saret lager ek 12,000 seval.*
27 Sa bann gouverner ti fourni manze pour Lerwa Salomon e pour tou dimoun ki ti manz lo latab lerwa. Sakenn ti responsab pour rod manze pour en mwan e fer sir ki nanryen pa ti manke.
28 Zot ti osi anmenn lorz* ek lapay pour bann seval nenport landrwa kot i ti neseser e pour bann seval ki anmenn saret lager, sakenn dapre zot bezwen.
29 Bondye ti donn Salomon bokou lasazes ek disernman e osi bokou lentelizans* parey disab o bor lanmer.
30 Lasazes Salomon ti pli bokou ki lasazes tou dimoun ki ti reste dan Les ek Lezip.
31 I ti pli saz ki tou lezot dimoun. I ti pli saz ki Etann en Ezrait ek Emann, Kalkol ek Darda, bann garson Maol. I ti vin renonmen dan tou bann nasyon otour li.
32 I ti ekri 3,000 proverb ek 1,005 sanson.
33 I ti koz lo bann pye dibwa, depi pye sed Liban ziska lizop* ki pous lo miray. I ti osi koz lo bann zannimo, zwazo,* reptil* ek pwason.
34 Dimoun sorti dan tou bann nasyon ti vin ekout lasazes Salomon. Sa ti enkli bann lerwa sorti partou lo later ki ti’n tann konsernan son lasazes.
Bann not
^ Oubyen “bann prens.”
^ Oubyen “kan.”
^ Setadir, Larivyer Efrat.
^ Oubyen “kado.”
^ En kor ti 220 lit. Vwar Lezot lenformasyon B14.
^ Sa i en kalite zwazo. Cuckoo an Angle.
^ Roebuck an Angle.
^ Oubyen “laplenn zerb.”
^ Setadir, was Larivyer Efrat.
^ Sa sif i ganny trouve dan serten maniskri e dan lezot verse dan Labib ki koz lo menm lenformasyon. Me dan lezot maniskri i met 40,000.
^ Oubyen “kavalye.”
^ Lorz i en plant parey dible ki ganny servi pour fer lafarin.
^ Literalman, “en gran leker.”
^ Lizop i en plant. Vwar Leksplikasyon bann mo.
^ Oubyen “bann zannimo ki anvole.”
^ Oubyen “bann zannimo ki ranpe.” Aparaman, sa pe refer avek lezar, serpan, zensek ek lezot pti zannimo.
