Premye liv bann Lerwa 9:1-28
9 Dek ki Salomon ti’n fini konstri lakaz Zeova, lakaz* lerwa ek tou keksoz ki Salomon ti anvi fer,
2 Zeova ti aparet avek Salomon en dezyenm fwa, zis parey i ti aparet avek li ler i ti Gibeonn.
3 Zeova ti dir li: “Mon’n tann ou lapriyer ek ou siplikasyon ki ou ti fer devan mwan. Mon’n sanktifye sa lakaz ki ou’n konstri pour ki mon non i toultan ganny glorifye laba. Mon pou vey li e pran ka avek li pour touzour.
4 Me ou, si ou servi mwan* parey ou papa David ti fer avek en leker senser ek ladrwatir par fer tou keksoz ki mon’n donn ou lord pour fer e si ou obei tou mon bann lalwa ek zizman,
5 alor mon pou byen etabli ou tronn ek ou rwayonm lo Izrael pour touzour zis parey mon ti promet ou papa David ler mon ti dir, ‘I pou toultan annan en zonm dan ou desandans ki pou asiz lo tronn Izrael.’
6 Me si zot ek zot bann garson zot aret servi mwan e zot pa obei mon bann komannman ek lalwa ki mon’n donn zot e zot al ador lezot bondye e azenou devan zot,
7 mon pou tir bann Izraelit dan sa pei ki mon’n donn zot e mon pou rezet sa lakaz ki mon’n sanktifye pour mon non. Tou dimoun pou mepriz e monk Izrael.
8 Sa lakaz pou vin en ta debri. Tou dimoun ki pas o bor li pou etonnen, zot pou soufle e dir, ‘Akoz Zeova in fer sa avek sa pei ek sa lakaz?’
9 Alor zot pou dir, ‘Sa i akoz zot in abandonn Zeova zot Bondye ki ti fer zot bann zanset sorti Lezip. Zot in kontan lezot bondye e zot in azenou devan zot e ador zot. Sanmenm sa Zeova in anmenn sa maler lo zot.’”
10 Salomon ti pran 20 an pour konstri sa de lakaz, lakaz Zeova ek lakaz* lerwa
11 e pandan sa letan, Iram lerwa Tir ti donn Salomon bann dibwa sed, dibwa zenevriye* ek lakantite lor ki Salomon ti anvi e Lerwa Salomon ti donn Iram 20 lavil dan rezyon Galile.
12 Alor, Iram ti kit Tir pour al get sa bann lavil ki Salomon ti’n donn li, me i pa ti satisfe avek zot.*
13 I ti dir: “Mon frer, ki kalite lavil ou’n donn mwan?” Alor sa bann lavil ti ganny apele pei Kaboul* ziska ozordi.
14 Antretan, Iram ti anvoy 120 talan* lor pour lerwa.
15 Sa i sa bann dimoun ki Lerwa Salomon ti’n donn zot lord pour konstri lakaz Zeova, son prop lakaz,* konblaz,* miray Zerizalenm, Azor, Megido ek Gezer.
16 (Faraon lerwa Lezip ti’n monte e pran lavil Gezer. I ti bril sa lavil e touy bann Kananeen ki ti pe reste laba. Alor, i ti donn son fiy sa lavil konman en kado* ler son fiy ki ti’n marye avek Salomon ti pe ale.)
17 Salomon ti rekonstri* Gezer, Bet-Oronn Anba,
18 Baalat ek Tamar ki ti dan dezer dan sa pei
19 e osi tou bann lavil ki Salomon ti servi pour stor keksoz ladan, bann lavil saret lager, lavil bann kavalye e nenport keksoz ki Salomon ti anvi konstri dan Zerizalenm, dan Liban e partou dan pei kot i ti pe dirize.
20 Me tou bann Amorit, Itit, Perizit, Ivit ek bann Zebouzit ki ti ankor la e ki pa ti form parti pep Izrael,
21 zot bann desandans ki ti’n reste deryer dan sa pei e ki bann Izraelit pa ti’n kapab detri zot konpletman, Salomon ti fer zot travay dir konman lesklav ziska ozordi.
22 Me Salomon pa ti fer okenn Izraelit vin lesklav parski zot ti son bann gerye, serviter, prens, zofisye larme, sef son bann dimoun ki anmenn saret lager ek kavalye.
23 I ti annan 550 sef bann gouverner ki ti ansarz bann travay Salomon, zot ti bann formenn ki ti ansarz bann dimoun ki ti pe travay.
24 Me fiy Faraon ti kit Lavil David e al reste dan son prop lakaz ki Salomon ti’n konstri pour li. Apre sa, Salomon ti konstri sa konblaz.*
25 Trwa fwa par an, Salomon ti ofer bann lofrann brile* ek bann sakrifis lape* lo lotel ki i ti’n konstri pour Zeova. I ti osi fer lafimen bann sakrifis monte lo lotel ki ti devan Zeova. Alor i ti fini konstri sa lakaz.
26 Lerwa Salomon ti osi fer en kantite bato laba Ezyonn-Geber ki o bor Elot, lo bor Lanmer Rouz ki dan pei Edonm.
27 Iram ti osi anvoy son bann serviter lo sa bann bato. Zot ti bann maren eksperyanse e zot ti pou travay ansanm avek bann serviter Salomon.
28 Zot ti al Ofir e zot ti retourn avek 420 talan lor pour Lerwa Salomon.
Bann not
^ Oubyen “pale.”
^ Literalman, “mars devan mwan.”
^ Oubyen “pale.”
^ Sa i refer avek en pye dibwa ki apel Juniper an Angle. Vwar it-2-E 139.
^ Literalman, “zot pa ti bon dan son lizye.”
^ Oubyen posibleman, “Pei pa bon pour narnyen.”
^ En talan ti pez 34.2 kilo. Vwar Lezot lenformasyon B14.
^ Oubyen “pale.”
^ Oubyen “Milo.” Sa mo Ebre i vedir “konble.”
^ Oubyen “en kado maryaz.”
^ Oubyen “ranforsi.”
^ Oubyen “Milo.” Sa mo Ebre i vedir “konble.”
^ Vwar Leksplikasyon bann mo.
^ Vwar Leksplikasyon bann mo.
