Premye liv Samyel 11:1-15
11 Pli tar, Naas ki ti en Amonnit ti monte e etabli son kan pour lager kont lavil Zabes ki dan rezyon Gilead. Me tou bann zonm ki ti reste Zabes ti dir Naas: “Fer en lalyans* avek nou e nou pou servi ou.”
2 Naas sa Amonnit ti reponn zot: “Mon pou fer en lalyans avek zot a kondisyon ki zot les mwan tir tou zot lizye drwat. Mon pou fer sa pour anmenn laont lo Izrael antye.”
3 Bann ansyen ki ti reste Zabes ti reponn li: “Donn nou set zour pour nou kapab anvoy bann mesaze partou dan teritwar Izrael. Si napa personn pour sov nou, nou ava rann lekor.”
4 Ler bann mesaze ti ariv Gibea kot Sail ti reste, zot ti dir lepep ki’n arive e tou dimoun ti plere asodlarm.
5 Me Sail ti pe vini sorti dan plantasyon avek bann bef. I ti demande: “Ki sa bann dimoun i gannyen? Akoz zot pe plere?” Alor zot ti rakont li tou sa ki bann zonm sorti Zabes ti’n dir.
6 Ler Sail ti tann sa, lespri sen Bondye ti donn li lafors e i ti pran en gran lakoler.
7 Alor i ti pran de toro e koup zot par bout. I ti donn bann mesaze sa bann bout lavyann e zot ti anmenn sa partou dan teritwar Izrael. Bann mesaze ti dir: “Tou bann ki pa swiv Sail ek Samyel i devret konnen ki sanmenm sa ki pou arive avek zot bef!” Sa ti fer lepep annan en gran respe pour Zeova, alor zot ti zwenn ansanm avek en sel nide antet.*
8 Sail ti konte konbyen zonm ti’n zwenn ansanm Besek. I ti annan 30,000 zonm sorti dan tribi Zida e 300,000 zonm sorti dan lezot tribi Izrael.
9 Aprezan, Sail ek son bann solda ti dir bann mesaze ki ti’n vin kot zot sorti Zabes: “Al dir bann zonm dan lavil Zabes ki dan rezyon Gilead, ‘Demen ver midi,* zot pou ganny sove.’” Bann mesaze ti al dir sa avek bann zonm ki ti reste Zabes e zot ti byen kontan.
10 Alor bann zonm ki ti reste Zabes ti dir bann Amonnit: “Demen, nou pou rann lekor e zot kapab fer sa ki zot oule avek nou.”
11 Son lannmen, Sail ti separ son larme an trwa group. Granmaten,* zot ti al dan milye kan e zot ti lager kont bann Amonnit ziska ver midi. Bann Amonnit ki ti sirviv ti disperse e sakenn ti fer pour li.
12 Apre, lepep ti dir Samyel: “Lekel ki ti pe dir, ‘Eski Sail pou vin nou lerwa?’ Donn nou sa bann zonm pour nou met zot amor.”
13 Par kont, Sail ti dir: “Personn pa devret ganny met amor ozordi, parski ozordi, Zeova in sov Izrael.”
14 Pli tar, Samyel ti dir lepep: “Vini, annou al Gilgal pour anons ankor ki Sail i lerwa.”
15 Alor tou dimoun ti al Gilgal e laba zot ti fer Sail vin lerwa devan Zeova. Apre, zot ti ofer bann sakrifis lape devan Zeova. Sail ek tou bann Izraelit ti selebre e zot ti dan en gran lazwa.
Bann not
^ Oubyen “en lagreman.”
^ Literalman, “konman en sel zonm.”
^ Literalman, “ler soley i so.”
^ Sa i apepre 2 er bomaten ziska 6 er bomaten.
