Premye liv Samyel 20:1-42
-
Zonatan i fidel avek David (1-42)
20 Alor David ti sove e kit sa landrwa kot i ti pe reste Nayot dan lavil Rama. Par kont, i ti vin kot Zonatan e dir: “Ki mon’n fer? Ki fot mon’n fer e ki pese mon’n fer kont ou papa ki i pe rod touy mwan?”
2 Zonatan ti reponn li: “Pa posib! Ou pa pou mor. Gete! Mon papa pa pou zanmen fer okenn keksoz san dir mwan, ki swa i enportan oubyen non. Alor akoz mon papa pou kasyet sa avek mwan? Sa pa posib.”
3 Me David ti fer ankor en serman e dir: “I bezwen ki ou papa i konnen ki ou apresye mwan e i’n dir dan li menm, ‘Pa bezwen les Zonatan konn sa parski i pa pou kontan.’ Me mon fer serman devan Zeova sa Bondye vivan e mon asir ou ki* mon kapab mor nenport ler!”
4 Alor Zonatan ti dir David: “Mon pou fer tou sa ki ou dir mwan.”
5 David ti dir Zonatan: “Demen i lafet nouvellin e lerwa pou ekspekte ki mon asiz atab pour manze. Ou merit fer mwan ale e mon pou kasyet dan lakanpanny ziska ler fernwanr i fer apredmen.
6 Si ou papa i remarke ki mon pa la, dir li, ‘David ti sipliy mwan pour donn li permisyon pour li kapab al kot li vitman dan lavil Betleenm, parski tou son fanmir i zwenn laba en fwa par an pour ofer en sakrifis.’
7 Si i dir ou, ‘Napa problenm,’ sa i vedir ki mwan ou serviter mon napa nanryen pour per. Me si i ankoler, ou kapab asire ki i’n fini deside pour fer mwan ditor.
8 Demontre lanmour fidel anver mwan ou serviter, parski ou’n fer en lalyans avek mwan devan Zeova. Me si mon’n fer en keksoz mal e mon koupab, ou menm ou touy mwan. Ou pa bezwen livre mwan dan lanmen ou papa.”
9 Alor Zonatan ti reponn: “Pa bezwen dir en keksoz koumsa! Si mon dekouver ki mon papa in deside pour fer ou ditor, pa mon pou dir ou?”
10 Me David ti demann Zonatan: “Lekel ki pou dir mwan si ou papa i koz avek ou dan en fason brit?”
11 Zonatan ti dir David: “Vini, annou al dan lakanpanny.” Alor zot tou le de zot ti al dan lakanpanny.
12 Apre, Zonatan ti dir David: “Ki Zeova Bondye Izrael i en temwen. Demen oubyen apredmen apepre menm ler, mon pou gete ki lentansyon mon papa konsernan ou. Si i mazin an byen lo ou David, mon pou anvoy en dimoun pour dir ou.
13 Me si mon papa i anvi fer ou ditor e mwan mon pa averti ou pour ou kapab sove, ki Zeova i pini mwan severman.* Ki Zeova i avek ou zis parey i ti avek mon papa.
14 Eski ou ou pou demontre lanmour fidel parey Zeova anver mwan tan ki mon ankor vivan e menm si mon mor?
15 Silvouple, promet mwan ki ou pou touzour demontre lanmour fidel anver mon fanmir,* menm si Zeova i detri tou bann lennmi David lo later.”
16 Alor Zonatan ti fer en lalyans avek David ek fanmir David.* I ti osi dir: “Zeova pou fer bann lennmi David rann kont.”
17 Alor Zonatan ti demann David pour refer serman akoz son lanmour pour Zonatan, parski i ti kontan David parey i ti kontan son prop lekor.
18 Apre sa, Zonatan ti dir li: “Demen i lafet nouvellin. Zot pou remarke ki ou pa la, parski ou plas pou vid
19 e apredmen, zot pou pli remarke ki ou pa la. Ou bezwen vin dan sa landrwa kot ou ti kasyet lot zour* e reste o bor sa ros ki la.
20 Mon pou viz e tir trwa fles akote sa ros, konmsi mon pe tap en target.
21 Mon pou dir mon serviter, ‘Al rod bann fles.’ Si mon dir mon serviter, ‘Gete! Bann fles i lo sa kote o bor ou, pran zot,’ ou pou konnen ki ou kapab retournen. Mon fer serman o non Zeova sa Bondye vivan ki sa i vedir ki ou napa nanryen pour per e ki napa okenn danze pour ou.
22 Me si mon dir sa garson, ‘Gete! Bann fles i par devan ou,’ ale, parski Zeova i anvi ki ou ale.
23 Ki Zeova i en temwen pour touzour ki nou’n fer en promes avek kanmarad.”
24 Alor David ti kasyet dan lakanpanny. Ler lafet nouvellin ti arive, lerwa ti pran son plas atab pour pran son repa.
25 Lerwa ti pe asiz dan son plas o bor miray parey labitid. Abner ti pe asiz lo son kote e Zonatan ti pe asiz fas a fas avek Sail. Par kont, plas David ti vid.
26 Sail pa ti dir nanryen sa zour, parski i ti dir dan li menm: ‘I bezwen ki en keksoz in arive avek David ki aprezan i enpir. Wi, i bezwen ki i enpir.’
27 Son lannmen apre lafet nouvellin, setadir dezyenm zour, plas David ti ankor vid. Alor, Sail ti dir son garson Zonatan: “Akoz garson Zese pa’n vin manze ni yer ni ozordi?”
28 Zonatan ti reponn Sail: “David ti sipliy mwan pour donn li permisyon pour al Betleenm.
29 I ti dir, ‘Silvouple permet mwan pour ale, parski tou mon fanmir pe zwenn ansanm dan lavil pour ofer en sakrifis e mon prop frer in demande pour mwan vini. Alor si ou dakor, silvouple les mwan al vwar mon bann frer san ki personn i realize.’ Sanmenm sa i pa’n vin manz lo latab lerwa.”
30 Sail ti pran en gran lakoler avek Zonatan e i ti dir li: “Ou garson en fanm rebel, eski ou krwar ki mon pa konnen ki ou pe swazir pour pran kote avek garson Zese? Sa i en laont pour ou e en laont pour ou manman!
31 Tan ki garson Zese i vivan lo later, ni ou ni ou rwayonm pa pou an sekirite. Alor anvoy en dimoun pour al sers li e anmenn li kot mwan, parski i merit lanmor.”*
32 Par kont, Zonatan ti dir son papa Sail: “Akoz i devret ganny touye? Ki i’n fer?”
33 Ler Sail ti tann sa, i ti balans en lans pour touy li. Alor Zonatan ti konpran ki son papa ti’n fini deside pour touy David.
34 Deswit, dan son lakoler Zonatan ti leve e kit latab. I pa ti manz nanryen sa dezyenm zour lafet nouvellin, parski i ti pran lapenn pour David e parski son prop papa ti’n imilye li.
35 Lannmen bomaten, Zonatan ti al dan lakanpanny pour zwenn David parey zot ti’n fer laranzman. I ti anmenn en zenn serviter avek li.
36 I ti dir son serviter: “Silvouple, taye e al rod bann fles ki mon tire.” Sa serviter ti taye e Zonatan ti tir en fles ki ti pas par lao son latet.
37 Ler sa serviter ti ariv kot sa fles ki Zonatan ti’n tire, Zonatan ti koz for e dir son serviter: “Mon krwar sa fles i par devan ou.”
38 Zonatan ti dir: “Depese! Al vit! Pa tarde!” Alor serviter Zonatan ti anmas bann fles e i ti revin kot son met.
39 Sa serviter pa ti konpran ki pe pase, zis Zonatan ek David ki ti konnen ki tousala ti vedir.
40 Apre, Zonatan ti donn son serviter son bann zarm e i ti dir li: “Al anmenn sa dan lavil.”
41 David ti pe kasyet pa tro lwen avek zot, dan sid. Ler sa serviter ti ale, David ti sorti. Apre, i ti tonm azenou e bes son latet trwa fwa. Zot ti anbras kanmarad e zot tou le de zot ti plere, me David ti pler plis.
42 Zonatan ti dir David: “Al anpe, parski nou tou le de nou’n fer serman o non Zeova e dir, ‘Ki Zeova i en temwen pour touzour ant ou ek mwan e ant ou desandans ek mon desandans.’”
Apre sa, David ti leve e ale e Zonatan ti retourn dan lavil.
Bann not
^ Oubyen “zis parey ou vivan.”
^ Literalman, “Ki Zeova i fer sanmenm avek mwan e azout plis ankor.”
^ Literalman, “lakaz.”
^ Literalman, “avek lakaz David.”
^ Literalman, “zournen travay.”
^ Literalman, “parski i en garson lanmor.”
