Premye liv Samyel 31:1-13
-
Sail ek trwa son bann garson i mor (1-13)
31 Bann Filisten ti pe lager avek Izrael. Bann zonm Izraelit ti sove devan bann Filisten e en kantite parmi zot ti ganny touye lo Montanny Gilboa.
2 Bann Filisten ti tay deryer Sail ek son bann garson e zot ti reisi touy Zonatan, Abinadab ek Malki-Soua ki ti bann garson Sail.
3 Lager ti entansifye kont Sail. Finalman, bann solda ki tir fles ti vwar li e zot ti gravman bles li.
4 Sail ti dir sa solda ki ti pe anmenn son zarm: “Tir ou lepe e touy mwan, koumsa sa bann zonm ki pa servi Bondye* pa pou kapab tret mwan dan en fason kriyel* e touy mwan.” Me sa solda ti refize, parski i ti vreman per. Alor Sail ti pran son prop lepe e larg son lekor lo la.
5 Ler sa solda ti vwar ki Sail ti’n mor, li osi i ti larg son lekor lo son lepe e mor akote li.
6 Alor Sail ek son trwa garson, ensi ki sa solda ki ti pe anmenn son zarm ek tou son bann zonm ti mor ansanm sa zour.
7 Ler bann Izraelit ki ti dan vale e dan rezyon Zourden ti tande ki bann zonm Izrael ti’n sove e ki Sail ek son bann garson ti’n mor, zot ti konmans kit lavil e taye. Apre sa, bann Filisten ti vin reste dan sa bann lavil.
8 Son lannmen, ler bann Filisten ti vin pran bann keksoz lo bann solda ki zot ti’n touye, zot ti vwar lekor Sail ek son trwa garson lo Montanny Gilboa.
9 Alor zot ti koup son latet e tir son lekipman batay lo li. Zot ti anvoy bann mesaze partou dan pei bann Filisten pour anons sa nouvel dan tanp* zot bann zidol e parmi lepep.
10 Apre sa, zot ti met lekipman batay Sail dan tanp Astoret e zot ti klout son lekor lo miray Bet-Sann.
11 Ler bann zabitan Zabes-Gilead ti tann sa ki bann Filisten ti’n fer avek Sail,
12 tou zot gerye ti leve, vwayaz lannwit antye e al tir lekor Sail ek son bann garson lo miray Bet-Sann. Apre sa, zot ti retourn Zabes e bril zot.
13 Answit, zot ti pran bann lezo e anter zot Zabes anba sa pye tamaris. Apre, zot ti zennen* pour set zour.
Bann not
^ Literalman, “pa sirkonsi.”
^ Oubyen “kapab boufonn mwan.”
^ Literalman, “lakaz.”
^ Vwar Leksplikasyon bann mo.