Premye liv Samyel 6:1-21
-
Bann Filisten i fer Lars retourn Izrael (1-21)
6 Lars* Zeova ti dan pei bann Filisten pour set mwan.
2 Bann Filisten ti apel bann pret ek bann ki predir lavenir e demann zot: “Ki nou devret fer avek Lars Zeova? Dir nou ki mannyer pour fer li retourn dan son pei.”
3 Zot ti dir: “Si zot fer lars lalyans ki pour Zeova, Bondye Izrael ale, pa anvoy sa lars san en lofrann. Zot devret fer sir ki zot donn Bondye en lofrann pour zot ganny pardonnen. Sa i sel fason ki zot pou ganny geri e zot pou konnen akoz i ankor pe pini zot.”
4 Alor bann Filisten ti demande: “Ki lofrann nou devret anvoye pour li pour nou ganny pardonnen?” Zot ti dir: “Dapre lakantite sef ki bann Filisten i annan, anvoy senk zimorid annor ek senk souri annor parski sa menm fleo in frap zot ek zot bann sef.
5 Zot devret onor Bondye Izrael. Alor fer bann lobze dan laform zimorid e dan laform bann souri ki pe fer dega dan zot pei. Petet i pou aret pini zot, zot bondye ek zot pei.
6 Akoz zot bezwen antete parey Lezip ek Faraon? Ler Bondye ti pini zot, zot ti oblize fer bann Izraelit ale.
7 Aprezan, fer en saret nef e pran de bef ki annan piti e ki pa’n zanmen anba en zoug. Apre sa, anmar sa de bef avek sa saret, me retourn avek zot piti kot lakour, lwen avek zot manman.
8 Pran Lars Zeova e met li dan sa saret. O bor lars, met dan en bwat bann lobze annor ki zot pe anvoye pour li konman en lofrann pour zot ganny pardonnen. Apre, fer sa saret ale
9 e veye ki arive: Si i mont lo semen ki al Bet-Semes, dan direksyon son pei, nou pou konnen ki Bondye Izrael ki’n fer nou ditor. Si non, nou pou konnen ki pa li ki’n pini nou e ki sa in ariv par azar.”
10 Bann Filisten ti fer parey zot ti’n ganny dir. Zot ti pran de bef ki annan piti, anmar zot avek saret e met zot bann piti dan park kot lakour.
11 Apre, zot ti met Lars Zeova dan saret ansanm avek sa bwat ki ti annan bann souri ek zimorid annor ladan.
12 Bann bef ti al direk lo semen ki al Bet-Semes. Zot ti reste lo gran semen, pe fer tapaz kot zot ale. Zot pa ti al ni a drwat ni a gos. Bann sef Filisten ti kontinyen mars deryer zot ziska lo frontyer Bet-Semes.
13 Bann dimoun Bet-Semes ti pe anmas rekolt dible dan vale. Ler zot ti lev zot latet e vwar Lars, zot ti byen kontan.
14 Sa saret ti al dan plantasyon Zozye ki sorti Bet-Semes e aret o bor en gro ros. Alor zot ti koup dibwa sa saret e ofer bann bef konman en lofrann brile* pour Zeova.
15 Bann Levit ti tir Lars Zeova ek sa bwat ki ti annan bann lobze annor ladan e met lo sa gro ros. Sa zour, bann zonm Bet-Semes ti ofer bann lofrann brile e fer bann sakrifis pour Zeova.
16 Ler sa senk sef Filisten ti vwar sa, zot ti retourn Ekronn menm zour menm.
17 Bann zimorid annor ki bann Filisten ti anvoye pour Zeova konman en lofrann pour zot ganny pardonnen ti sorti dan sa bann landrwa: enn Asdod, enn Gaza, enn Askelonn, enn Gat e enn Ekronn.
18 Zot ti osi anvoy en souri annor sorti dan sak lavil ki sa senk sef Filisten ti annan. Zot ti anvoy enn sorti dan sak lavil ki ganny proteze avek bann gro miray e sak vilaz ki dan lakanpanny.
Sa gro ros dan plantasyon Zozye ki sorti Bet-Semes ki zot ti met Lars Zeova lo la i en moniman ziska ozordi.
19 Me Bondye ti touy bann zonm Bet-Semes parski zot ti’n get Lars Zeova. I ti touy 50,070 zonm* parmi lepep e bann dimoun ti dan dey parski Zeova ti’n touy en kantite parmi zot.
20 Alor bann zonm Bet-Semes ti demande: “Lekel ki kapab al devan Zeova, sa Bondye sen e kote Bondye pou ale ler i kit nou?”
21 Alor zot ti anvoy bann mesaze kot bann zabitan Kiryat-Zearim pour dir zot: “Bann Filisten in rann Lars Zeova. Desann e vin serse.”
Bann not
^ Vwar Leksplikasyon bann mo.
^ Vwar Leksplikasyon bann mo.
^ Literalman, “70 zonm, 50,000 zonm.”
