Premye liv Samyel 7:1-17
7 Alor bann zonm Kiryat-Zearim ti vin sers Lars* Zeova e mont avek kot lakaz Abinadab ki lo montanny e zot ti apwent* son garson Eleazar pour li kapab vey Lars Zeova.
2 En bon pe letan ti pase depi zour Lars ti ariv Kiryat-Zearim, 20 an an tou. Apre sa, tou dimoun Izrael ti konmans rod* Zeova.
3 Alor Samyel ti dir zot: “Si zot pe retourn kot Zeova avek tou zot leker, tir bann bondye etranze ek bann stati Astoret parmi zot. Si zot donn Zeova tou zot leker e servi zis li, i pou sov zot dan lanmen bann Filisten.”
4 Alor bann Izraelit ti tir bann stati Baal ek Astoret parmi zot e servi zis Zeova.
5 Apre, Samyel ti dir: “Fer tou dimoun Izrael rasanble ansanm Mizpa e mon pou priy Zeova pour zot.”
6 Alor zot ti rasanble ansanm Mizpa. Zot ti tir delo dan pwi e vid devan Zeova. Sa zour, zot ti zennen* e dir: “Nou’n fer pese kont Zeova.” Laba Mizpa, Samyel ti konmans servi konman ziz pour bann Izraelit.
7 Ler bann Filisten ti tande ki bann Izraelit ti’n rasanble Mizpa, bann sef Filisten ti monte pour al atak Izrael. Ler bann Izraelit ti tann sa, zot ti per parski bann Filisten ti pe vin atak zot.
8 Alor bann Izraelit ti dir Samyel: “Kontinyen priy Zeova nou Bondye pour li ed nou e sov nou dan lanmen bann Filisten.”
9 Apre, Samyel ti pran en pti mouton ki ankor pe tete e ofer li avek Zeova konman en lofrann brile.* Samyel ti priy Zeova pour demann li pour ed bann Izraelit e Zeova ti reponn li.
10 Anmezir ki Samyel ti pe ofer sa lofrann brile, bann Filisten ti aprose pour lager kont Izrael. Me sa zour, Zeova ti fer bann gro tapaz loraz ki ti fer bann Filisten konfize. Alor bann Izraelit ti ranport laviktwar.
11 Ler sa ti arive, bann zonm Izraelit ti sorti Mizpa e tay deryer bann Filisten. Zot ti touy bann Filisten ziska dan sid Bet-Kar.
12 Apre, Samyel ti pran en ros e poz li ant Mizpa ek Zesana. I ti apel sa ros Ebenezer,* parski i ti dir: “Zeova in ed nou ziska aprezan.”
13 Vi ki bann Filisten ti ganny bate, zot pa ti vin ankor dan pei bann Izraelit e Zeova ti kontinyen opoz bann Filisten tou dilon lavi Samyel.
14 Deplis, bann Filisten ti rann Izrael bann lavil ki zot ti’n pran avek Izrael, depi Ekronn ziska Gat. Izrael ti repran zot teritwar avek bann Filisten.
I ti osi annan lape ant Izrael ek bann Amorit.
15 Samyel ti kontinyen ziz Izrael tou dilon son lavi.
16 Tou le-z-an, i ti fer letour Izrael e pas Betel, Gilgal ek Mizpa. I ti ziz Izrael dan tou sa bann landrwa.
17 Me i ti toultan retourn Rama akoz son lakaz ti laba e i ti osi ziz Izrael laba. I ti konstri en lotel Rama pour Zeova.
Bann not
^ Vwar Leksplikasyon bann mo.
^ Literalman, “sanktifye.”
^ Oubyen “ti dan dey devan.”
^ Vwar Leksplikasyon bann mo.
^ Vwar Leksplikasyon bann mo.
^ Sa non i vedir “Ros ki ede.”
