Dezyenm liv Kronik 21:1-20
21 Apre, Zeosafat ti mor* e i ti ganny antere avek son bann zanset dan Lavil David. Son garson Zeoram ti vin lerwa dan son plas.
2 Son bann frer, bann garson Zeosafat ti Azarya, Zeyel, Zekarya, Azarya, Mikael ek Sefatya. Zot tou zot ti bann garson Zeosafat lerwa Izrael.
3 Zot papa ti’n donn zot en kantite kado annarzan e annor. I ti’n osi donn zot bann keksoz ki ti annan valer ek bann lavil ki ganny proteze avek bann gro miray dan Zida. Me i ti donn Zeoram rwayonm akoz i ti premye ne.
4 Ler Zeoram ti’n pran kontrol rwayonm son papa, i ti ranforsi son pozisyon konman lerwa par touy tou son bann frer avek lepe e osi serten prens Izrael.
5 Zeoram ti annan 32 an ler i ti vin lerwa e i ti dirize pour wit an ler i ti Zerizalenm.
6 I ti fer menm parey bann lerwa Izrael, zis parey bann ki ti dan fanmir* Aab ti fer, parski i ti’n marye avek fiy Aab e i ti kontinyen fer sa ki mal dan lizye Zeova.
7 Me Zeova pa ti anvi detri fanmir David parski i ti’n fer en lalyans avek David, ki li ek son bann garson pou toultan annan en desandans ki pou dirize* Zerizalenm.
8 Dan letan Zeoram, bann dimoun Edonm ti revolte kont Zida e zot ti swazir zot prop lerwa.
9 Alor Zeoram ek son bann komandan ti al Edonm avek tou son bann saret lager. Pandan lannwit, i ti lager avek bann Edonmit ki ti pe anserkle li ek bann komandan saret lager e i ti ganny laviktwar lo zot.
10 Me depi sa letan, bann Edonmit in kontinyen revolte kont Zida ziska ozordi. Sa letan, Libna osi ti revolte kont li parski i ti’n abandonn Zeova Bondye son bann zanset.
11 I ti osi fer bann landrwa ladorasyon* lo bann montanny Zida pour fer bann zabitan Zerizalenm ador* lezot bondye e i ti kontinyen fer pep Zida fer sa ki mal.
12 Finalman, i ti ganny en let sorti kot profet Eliya ki dir: “La sa ki Zeova Bondye David ou zanset i dir, ‘Ou pa’n fer menm parey avek ou papa Zeosafat oubyen parey Asa lerwa Zida.
13 Me ou’n fer menm parey avek bann lerwa Izrael e ou’n fer pep Zida ek bann zabitan Zerizalenm ador* lezot bondye parey fanmir Aab ti fer. Ou’n menm touy ou bann frer, bann garson ou papa ki ti pli meyer ki ou.
14 Alor Zeova pou pini ou pep, ou bann garson ek ou bann madanm e i pou detri tou sa ki ou annan.
15 Ou pou soufer avek en kantite maladi e sa i enkli en maladi dan ou trip. Toulezour ou pou soufer avek sa maladi ziska ki ou trip i sorti.’”
16 Apre, Zeova ti fer bann Filisten ek bann Arab ki ti pe reste o bor bann Etyopyen atak Zeoram.
17 Alor zot ti atak Zida e zot ti antre dan sa pei pardfors. Zot ti pran tou keksoz ki ti dan lakaz* lerwa e osi son bann garson ek son bann madanm. I ti reste zis son dernyen garson Zeoaaz.*
18 Apre tousala, Zeova ti fer li ganny en maladi dan son trip ki ti napa gerizon.
19 Apre en pe letan, apre de-z-an, son trip ti sorti akoz sa maladi e i ti soufer en kantite ler i ti pe mor. Son pep pa ti bril nanryen pour son lanterman parey zot ti fer pour son bann zanset.
20 I ti annan 32 an ler i ti vin lerwa e i ti dirize pour wit an ler i ti Zerizalenm. Personn pa ti annan regre ler i ti mor. Alor, zot ti anter li dan Lavil David me pa dan simityer bann lerwa.
Bann not
^ Literalman, “repoze avek son bann zanset.”
^ Literalman, “lakaz.”
^ Literalman, “annan en lalanp.”
^ Vwar Leksplikasyon bann mo.
^ Oubyen “fer prostitisyon spirityel avek.”
^ Oubyen “fer prostitisyon spirityel avek.”
^ Oubyen “pale.”
^ I ti osi ganny apele Aazya.
