Dezyenm liv Kronik 22:1-12
22 Apre sa, bann zabitan Zerizalenm ti fer son dernyen garson Aazya vin lerwa dan son plas, parski sa group bandi ki ti’n vin dan kan avek bann Arab ti’n touy tou son bann gran frer. Alor Aazya garson Zeoram ti konmans dirize konman lerwa Zida.
2 Aazya ti annan 22 an ler i ti vin lerwa e i ti dirize pour enn an ler i ti Zerizalenm. Son manman ti apel Atalya ki ti pti zanfan* Omri.
3 Li osi i ti fer parey fanmir* Aab, parski son manman ti vin son konseye e i ti fer li fer bann move keksoz.
4 I ti kontinyen fer sa ki mal dan lizye Zeova parey fanmir Aab, parski zot ti vin son bann konseye apre ki son papa ti’n mor e sa ti fer son maler.
5 I ti ekout zot bann konsey e i ti al Ramot-Gilead ansanm avek Zeoram garson Aab lerwa Izrael pour al lager avek Azael lerwa Siri. Laba, bann solda ki tir fles ti bles Zeoram.
6 Zeoram ti retourn Zezreel pour li rekipere akoz zot ti’n bles li ler i ti Rama pe lager avek Azael lerwa Siri.
Aazya* garson Zeoram ki ti lerwa Zida ti desann Zezreel pour li al vwar Zeoram garson Aab akoz i ti’n ganny blese.*
7 Me Bondye ti fer ki Aazya ti mor ler i ti al kot Zeoram. Ler Aazya ti ariv laba, i ti al avek Zeoram pour al zwenn Zeou pti zanfan* Nimsi ki Zeova ti’n swazir pour detri fanmir Aab.
8 Ler Zeou ti konmans pran aksyon kont fanmir Aab, i ti vwar bann prens Zida ek bann garson bann frer Aazya, bann minis Aazya e i ti touy zot.
9 Apre i ti rod Aazya. Zot ti tyonbo li kot i ti pe kasyet Samari e zot ti anmenn li kot Zeou. Zot ti touy li e anter li parski zot ti dir: “I pti zanfan Zeosafat, ki ti rod Zeova avek tou son leker.” I ti napa personn dan fanmir Aazya ki ti kapab vin lerwa.
10 Ler Atalya manman Aazya ti vwar ki son garson ti’n mor, i ti touy tou dimoun ki ti kapab vin lerwa* dan fanmir Zida.
11 Me Zeosabeat fiy lerwa ti pran Zeoas garson Aazya pour li pa ganny touye ansanm avek lezot garson lerwa. I ti kasyet Zeoas ansanm avek sa dimoun ki ti pran swen avek li, dan en lasanm ki pli anndan. Zeosabeat fiy Lerwa Zeoram (Zeosabeat ti madanm pret Zeoada e ser Aazya) ti kapab kasyet Zeoas pour Atalya pa touy li.
12 Zeoas ti reste kasyet avek zot pour si-z-an dan lakaz sa vre Bondye pandan ki Atalya ti pe diriz pei.
Bann not
^ Literalman, “fiy.”
^ Literalman, “lakaz.”
^ Dan serten maniskri Ebre, i ganny apele Azarya.
^ Oubyen “i ti malad.”
^ Literalman, “garson.”
^ Oubyen “tou desandans sa rwayonm.”
