Dezyenm liv Kronik 25:1-28
25 Amazya ti annan 25 an ler i ti vin lerwa e i ti dirize pour 29 an ler i ti Zerizalenm. Son manman ti apel Zeoadann ki ti sorti Zerizalenm.
2 I ti kontinyen fer sa ki byen dan lizye Zeova me i pa ti fer li avek tou son leker.
3 Dek ki i ti’n byen etabli son rwayonm, i ti touy son bann serviter ki ti’n touy son papa ler i ti lerwa.
4 Me i pa ti touy zot bann garson akoz i ti obei lord Zeova ki ti’n ganny ekrir dan Lalwa, dan liv Moiz ki dir: “En papa pa devret mor akoz sa ki son garson in fer e en garson pa devret mor akoz sa ki son papa in fer. Sakenn i devret mor pour son prop pese.”
5 Amazya ti rasanble pep Zida e i ti separ tou zonm dan tribi Zida ek Benzamen e met zot dan bann group dapre zot fanmir ansanm avek bann sef 1,000 solda ek sef 100 solda. I ti anrezistre bann dimoun ki ti annan 20 an montan e i ti vwar ki i ti annan 300,000 pli bon gerye pour al dan larme. Zot ti kapab servi lans ek bann gran boukliye.
6 I ti osi anploy 100,000 gerye ki for dan Izrael pour 100 talan* larzan.
7 Me en serviter* sa vre Bondye ti vin kot li e dir li: “Mon lerwa, pa bezwen les larme Izrael al avek ou, parski Zeova pa avek Izrael e ni avek bann Efraimit.
8 Me al ou tousel e pran kouraz pour lager. Si ou pa fer sa, sa vre Bondye pou kapab fer ou tonbe devan en lennmi parski Bondye i kapab ede e fer tonbe.”
9 Amazya ti dir serviter sa vre Bondye: “Me sa 100 talan ki mon’n donnen pour bann solda Izrael?” Serviter sa vre Bondye ti dir li: “Zeova i kapab donn ou bokou plis ki sa.”
10 Alor, Amazya ti fer bann solda ki ti’n vin kot li sorti Efraim, retourn kot zot. Me zot ti vreman ankoler avek Zida, alor zot ti retourn kot zot byen ankoler.
11 Apre, Amazya ti pran kouraz e i ti diriz son bann solda dan Vale Disel. I ti touy 10,000 zonm ki sorti Seir.
12 Bann zonm Zida ti tyonbo 10,000 solda vivan. Zot ti anmenn zot anler lo en ros, zet zot anba e zot tou zot ti mor, zot lekor ti ganny kas kase.
13 Me bann solda ki Amazya ti’n fer zot retourn kot zot pour pa al avek li dan lager ti pe atak bann lavil Zida, depi Samari ziska Bet-Oronn. Zot ti touy 3,000 dimoun e zot ti pran en kantite zot bann keksoz.
14 Ler Amazya ti’n fini lager avek bann Edonmit, Amazya ti retournen e i ti anmenn bann bondye ki bann zonm Seir ti adore. I ti fer zot vin son bondye. I ti konmans tonm azenou devan zot e fer monte lafimen son bann sakrifis pour zot.
15 Alor, Zeova ti pran en gran lakoler avek Amazya e i ti anvoy en profet kot li. Sa profet ti dir li: “Akoz ou pe ador bann bondye sa bann dimoun ki pa ti kapab sov zot prop pep dan ou lanmen?”
16 Ler sa profet ti pe koze, lerwa ti dir li: “Eski nou’n fer ou vin en konseye pour lerwa? Arete! Akoz zot devret touy ou?” Ler sa profet ti pe ale, i ti dir: “Mon konnen ki Bondye in deside pour detri ou akoz sa ki ou’n fer e ou pa’n ekout mon konsey.”
17 Apre ki Amazya lerwa Zida ti’n demann konsey son bann konseye, i ti anvoy en mesaz pour Zeoas garson Zeoaaz ki ti garson Zeou lerwa Izrael. I ti dir li: “Vini, annou lager.”*
18 Zeoas lerwa Izrael ti anvoy Amazya lerwa Zida sa mesaz: “En touf pikan Liban ti anvoy en mesaz kot en pye sed Liban e dir, ‘Fer ou fiy marye avek mon garson.’ Me en zannimo sovaz Liban ti pase e kraz sa touf pikan.
19 Ou’n dir, ‘Gete! Mon’n* detri Edonm.’ La ou leker in vin arogan e ou anvi ganny glorifye. Me aprezan, reste dan ou prop lakaz.* Akoz ou anvi anmenn maler lo ou ek Zida?”
20 Me Amazya pa ti ekoute, parski sa vre Bondye ti anvi livre zot dan lanmen zot lennmi akoz zot ti’n ador bann bondye Edonm.
21 Alor Zeoas lerwa Izrael ti al Bet-Semes ki pour Zida e i ti lager avek Amazya lerwa Zida.
22 Izrael ti ganny laviktwar lo Zida e bann solda Zida ti sove e sakenn ti retourn kot zot.*
23 Zeoas lerwa Izrael ti tyonbo Amazya lerwa Zida dan lavil Bet-Semes. Amazya ti garson Zeoas ki ti garson Zeoaaz.* Apre, i ti anmenn li Zerizalenm e i ti fer en trou larzer 400 koude* dan miray Zerizalenm depi kot Baro Efraim ziska kot Baro dan Kwen.
24 I ti pran tou lor, larzan* ek lezot lobze ki ti kot* Obed-Edonm dan lakaz sa vre Bondye e dan bann lasanm trezor dan lakaz* lerwa. I ti osi pran bann dimoun konman prizonnyen. Apre i ti retourn Samari.
25 Apre lanmor Zeoas garson Zeoaaz lerwa Izrael, Amazya garson Zeoas ki ti lerwa Zida ti kontinyen viv pour ankor 15 an.
26 Larestan listwar Amazya, depi konmansman ziska finisyon, in ganny ekrir dan Liv bann Lerwa Zida ek Izrael.
27 Depi ler Amazya ti aret ador Zeova, zot ti fer en konplo Zerizalenm kont li e i ti sov dan lavil Lakis me zot ti fer bann zonm al rod li e zot ti touy li laba Lakis.
28 Zot ti retourn avek son lekor lo seval e zot ti anter li avek son bann zanset dan lavil Zida.
Bann not
^ En talan ti pez 34.2 kilo. Vwar Lezot lenformasyon B14.
^ Oubyen “zonm.”
^ Oubyen “zwenn fas a fas.”
^ Literalman, “Ou’n.”
^ Oubyen “pale.”
^ Literalman, “zot latant.”
^ I ti osi ganny apele Aazya.
^ Apepre 178 met. Vwar Lezot lenformasyon B14.
^ Larzan, sa metal.
^ Oubyen “anba responsabilite.”
^ Oubyen “pale.”
