Dezyenm liv Kronik 3:1-17
3 Apre, Salomon ti konmans konstri lakaz Zeova Zerizalenm lo Montanny Moriya, kot Zeova ti aparet avek son papa David, dan sa landrwa ki David ti’n prepare kot dible i ganny bate ki ti pour Ornann en Zebouzit.
2 I ti konmans konstri dezyenm zour dan dezyenm mwan, dan katriyenm lannen ki i ti lerwa.
3 Fondasyon lakaz sa vre Bondye ki Salomon ti fer ti mezir 60 koude longer e 20 koude larzer, dapre mezir ki zot ti servi sa letan.*
4 Sa larantre* devan lakaz ti mezir 20 koude larzer,* menm parey avek larzer sa lakaz e son oter ti 120.* I ti kouver anndan avek lor pir.
5 I ti kouver anndan dan sa gran lakaz avek bann plans zenevriye,* apre i ti kouver zot avek lor pir. I ti dekor li avek bann desen pye palm ek bann lasenn.
6 Apre, i ti dekor sa lakaz anndan avek bann zoli pyer presye. Sa lor ki i ti servi ti sorti Parvaim.
7 I ti kouver sa lakaz, plafon,* bann padport,* bann miray ek bann laport avek lor. I ti grav bann desen seriben lo bann miray.
8 Apre i ti fer lasanm* Tre Sen. Son longer ti 20 koude parey avek larzer sa lakaz e son larzer ti 20 koude. I ti kouver anndan dan sa lasanm avek 600 talan* lor pir.
9 Lor ki ti ganny servi pour klou ti pez 50 sekel.* I ti kouver bann lasanm anler avek lor.
10 Apre, i ti fer de stati seriben e i ti met zot dan lasanm* Tre Sen. I ti kouver zot avek lor.
11 An tou, lezel sa de seriben ti mezir 20 koude longer. En kote lezel sa premye seriben ti mezir senk koude longer e i ti tous miray sa lakaz. Son lot kote lezel ti mezir senk koude longer e i ti tous lezel sa lot seriben.
12 En kote lezel sa dezyenm seriben ti mezir senk koude longer e i ti tous lot kote miray sa lakaz. Son lot kote lezel ti mezir senk koude longer e i ti tous lezel sa premye seriben.
13 Lezel sa de seriben ti ouver e zot ti mezir 20 koude longer. Zot ti pe debout e zot figir ti vir avek lasanm Sen.
14 I ti osi fer rido avek difil ble, lalenn mov, difil rouz fonse ek bann bon kalite latwal. I ti fer bann desen seriben lo sa rido.
15 Apre, i ti fer de kolonn devan lakaz ki ti mezir 35 koude longer. Kornis* anler lo sak kolonn ti mezir senk koude.
16 I ti fer bann lasenn parey sennon e i ti met zot anler lo sa bann kolonn. I ti fer 100 grenad e i ti met zot lo sa bann lasenn.
17 I ti met sa bann kolonn debout devan tanp, enn lo kote drwat* e enn lo kote gos.* I ti apel sa enn lo kote drwat Zakin* e sa enn lo kote gos Boaz.*
Bann not
^ En koude normal i 44.5 santimet, me serten i krwar ki “mezir ki zot ti servi sa letan” i refer avek en gran koude ki mezir 51.8 santimet. Vwar Lezot lenformasyon B14.
^ Vwar Leksplikasyon bann mo.
^ Oubyen “longer.”
^ Napa sa mezir ki’n ganny servi.
^ Juniper an Angle.
^ Literalman, “sevron.”
^ Threshold an Angle.
^ Literalman, “lakaz.”
^ En talan ti pez 34.2 kilo. Vwar Lezot lenformasyon B14.
^ En sekel ti pez 11.4 granm. Vwar Lezot lenformasyon B14.
^ Literalman, “lakaz.”
^ Sa i en dekorasyon ki ganny mete anler lo en kolonn.
^ Oubyen “dan sid.”
^ Oubyen “dan nor.”
^ Sa non i vedir “Ki i (setadir, Zeova) byen etabli.”
^ Posibleman, sa non i vedir “Avek lafors.”