Dezyenm liv Kronik 33:1-25
33 Manase ti annan 12 an ler i ti vin lerwa e i ti dirize pour 55 an ler i ti Zerizalenm.
2 I ti fer sa ki mal dan lizye Zeova e i ti fer bann keksoz degoutan parey sa bann nasyon ki Zeova ti’n pouse devan pep Izrael.
3 I ti rekonstri bann landrwa ladorasyon* ki Ezekya son papa ti’n kase. I ti fer bann lotel pour bann Baal ek bann poto sakre.* I ti azenou devan tou bann larme dan lesyel e ador zot.
4 I ti osi konstri bann lotel dan lakaz Zeova menm si Zeova ti’n dir sa konsernan sa landrwa: “Mon non pou dan Zerizalenm pour touzour.”
5 I ti konstri bann lotel pour tou bann larme dan lesyel dan de lakour kot lakaz Zeova.
6 I ti bril son bann garson* dan Vale Garson Inonm. I ti fer mazik, predir lavenir, fer grigri e i ti apwent bann dimoun ki kominik avek bann mor* ek bann dimoun ki predir lavenir. I ti fer en kantite keksoz mal dan lizye Zeova pour ofans li.
7 I ti pran sa stati* ki i ti’n fer e met li dan lakaz sa vre Bondye menm si Bondye ti’n dir David ek son garson Salomon: “Mon pou met mon non pour touzour dan sa lakaz e dan Zerizalenm, sa landrwa ki mon’n swazir parmi tou bann tribi Izrael.”
8 Mon pa pou zanmen tir bann Izraelit ankor dan sa pei ki mon’n donn zot bann zanset si zot fer sir ki zot obei tou sa ki mon’n donn zot lord pour fer, tou sa ki dan Lalwa, bann lareg ek bann komannman ki Moiz in donnen.”
9 Manase ti kontinyen fer bann zabitan Zida ek Zerizalenm fer sa ki mal e fer zot fer bann move keksoz ki pli pir ki sa bann nasyon ki Zeova ti’n detri devan bann Izraelit.
10 Zeova ti kontinyen koz avek Manase ek son pep me zot pa ti ekout li.
11 Alor Zeova ti fer bann sef larme lerwa Asiri atak zot. Zot ti servi bann krose pour tyonbo Manase,* anmar li avek bann lasenn an kwiv e anmenn li Babilonn.
12 Dan son difikilte, i ti sipliy Zeova son Bondye e i ti kontinyen abes son lekor en kantite devan Bondye son bann zanset.
13 I ti kontinyen priy Bondye e Bondye ti ganny touse par son siplikasyon e i ti ekout son lapriyer. I ti fer li revin lerwa Zerizalenm. Alor Manase ti konnen ki Zeova i sa vre Bondye.
14 Apre sa, i ti konstri en miray an deor Lavil David lo kote was Gionn, dan vale* ziska kot Baro Pwason. Sa miray ti kontinyen otour Ofel e i ti fer sa miray vreman o. An plis ki sa, i ti apwent bann sef larme dan tou bann lavil ki ganny proteze avek bann gro miray dan Zida.
15 Apre, i ti tir bann fo bondye* ek sa zidol dan lakaz Zeova ek tou bann lotel ki i ti’n konstri lo montanny kot lakaz Zeova ti ete e dan Zerizalenm. I ti fer zet zot an deor lavil.
16 I ti osi repar lotel Zeova e konmans ofer bann sakrifis lape* ek sakrifis remersiman lo la. I ti dir pep Zida ador Zeova Bondye Izrael.
17 Me kantmenm sa, bann dimoun ti pe kontinyen ofer bann sakrifis kot bann landrwa ladorasyon menm si zot ti pe ofer zis avek Zeova zot Bondye.
18 Larestan listwar Manase, son lapriyer ki i ti fer avek son Bondye ek bann parol bann profet* ki ti koz avek li o non Zeova Bondye Izrael in ganny ekrir dan listwar bann lerwa Izrael.
19 Osi, son lapriyer ek lafason ki son siplikasyon ti ganny reponn, tou son bann pese ek bann aksyon ki ti montre ki i pa ti fidel, sa bann landrwa kot i ti konstri bann landrwa ladorasyon e met bann poto sakre ek bann stati* avan ki i ti abes son lekor in ganny ekrir parmi bann keksoz ki bann profet* ti ekri.
20 Apre, Manase ti mor* e zot ti anter li kot son lakaz. Son garson Amonn ti vin lerwa dan son plas.
21 Amonn ti annan 22 an ler i ti vin lerwa e i ti dirize pour de-z-an ler i ti Zerizalenm.
22 I ti kontinyen fer sa ki mal dan lizye Zeova zis parey son papa Manase ti’n fer. Amonn ti ofer sakrifis avek tou bann stati* ki son papa Manase ti’n fer e i ti kontinyen ador zot.
23 Me i pa ti abes son lekor devan Zeova parey son papa Manase ti abes son lekor, o kontrer Amonn ti kontinyen fer plis keksoz mal ki ti fer li pli koupab devan Bondye.
24 Pli tar, son bann serviter ti fer konplo kont li e zot ti touy li dan son prop lakaz.
25 Me bann dimoun dan pei ti touy tou sa bann ki ti’n fer konplo kont Lerwa Amonn e zot ti fer son garson Zosya vin lerwa dan son plas.
Bann not
^ Vwar Leksplikasyon bann mo.
^ Vwar Leksplikasyon bann mo.
^ Literalman, “fer son bann garson pas dan dife.”
^ Setadir, dimoun ki kominik avek bann demon.
^ Oubyen “stati ki’n ganny skilpte.”
^ Oubyen posibleman, “Zot ti tyonbo Manase ki ti pe kasyet dan en trou ros.”
^ Oubyen “wadi.” Vwar Leksplikasyon bann mo.
^ Literalman, “bondye etranze.”
^ Vwar Leksplikasyon bann mo.
^ Oubyen “bann dimoun ki ti ganny vizyon.”
^ Oubyen “stati ki’n ganny skilpte.”
^ Oubyen “bann dimoun ki ti ganny vizyon.”
^ Literalman, “repoze avek son bann zanset.”
^ Oubyen “stati ki’n ganny skilpte.”
