Dezyenm liv Kronik 4:1-22
4 Apre, i ti fer lotel an kwiv ki ti mezir 20 koude longer, 20 koude larzer e 10 koude oter.
2 I ti fer fonn metal e fer en basen ki ti apel Lanmer. Sa basen ti ron e i ti mezir 5 koude oter e son louvertir ti mezir 10 koude larzer. Sa basen ti en groser 30 koude.*
3 I ti annan dekorasyon bann fri ron* toultour anba rebor louvertir sa basen. I ti annan dis fri ron par koude toultour Lanmer. Sa bann fri ron ti dan de ranze e zot ti’n ganny fer en sel avek sa basen.
4 Sa basen ti ganny mete lo 12 toro, 3 ti vir dan nor, 3 dan was, 3 dan sid e 3 dan les. Lanmer ti anler lo sa bann toro e deryer bann toro ti vir ver milye sa basen.
5 Lepeser sa basen ti larzer kat ledwa* e rebor son louvertir ti parey rebor en tas, parey en fler lis ki’n ouver. Sa basen ti kapab pran 3,000 bat* delo.
6 I ti osi fer dis basen pour lav keksoz ki zot ti servi pour lofrann brile. I ti met senk basen dan kote drwat e senk dan kote gos. Me bann pret ti lav zot lanmen ek zot lipye dan Lanmer.
7 Apre, i ti fer dis sandelye annor dapre lenstriksyon e i ti met zot dan tanp. I ti met senk lo kote drwat e senk lo kote gos.
8 I ti osi fer dis latab e met zot dan tanp. I ti met senk lo kote drwat e senk lo kote gos. I ti fer 100 bol annor.
9 Apre, i ti fer en lakour pour bann pret ek en gran lakour. I ti fer bann laport pour lakour e i ti kouver sa bann laport avek kwiv.
10 I ti met Lanmer dan kote drwat, dan sides.
11 Iram ti osi fer bann resipyan ki met lasann ladan, bann lapel ek bann bol.
Alor, Iram ti fini fer bann travay ki Lerwa Salomon ti’n dir li fer pour lakaz sa vre Bondye.
12 I ti fer sa de kolonn, sa de kornis* dan laform en bol ki lo sa de kolonn, sa de lasenn dekorasyon ki lo sa de kornis anler lo bann kolonn,
13 sa 400 grenad lo sa de lasenn dekorasyon, de ranze grenad lo sak lasenn pour kouver sa de kornis anler lo bann kolonn,
14 sa dis saret* ek sa dis basen ki ti lo sa bann saret,
15 Lanmer ek sa 12 toro ki ti anba Lanmer,
16 bann resipyan ki met lasann ladan, lapel, fourset ek tou lezot keksoz. Iram-Abiv ti fer tou sa bann keksoz avek kwiv ki’n ganny poli, pour Lerwa Salomon e pour lakaz Zeova.
17 Lerwa ti fer sa bann keksoz avek larzil epe dan Vale Zourden ki ant Soukot ek Zereda.
18 Salomon ti fer tou sa bann keksoz dan en gran kantite. Zot pa ti arive konn pwa lakantite kwiv ki ti ganny servi.
19 Salomon ti fer tou keksoz pour lakaz sa vre Bondye: lotel annor, bann latab pour met dipen sakre* lo la,
20 bann sandelye ek zot bann lalanp ki ti ganny fer avek lor pir pour zot ganny alimen devan lasanm Tre Sen* dapre bann lenstriksyon,
21 bann fler, bann lalanp ek bann penset* ki’n ganny fer avek lor, lor ki pli pir,
22 bann sizo,* bann bol, bann lakoup ek bann resipyan ki met labrez ladan. Zot ti ganny fer avek lor pir. I ti osi servi lor pour fer larantre lakaz, bann laport pour Tre Sen ek bann laport pour lasanm Sen.
Bann not
^ Oubyen “En lakord 30 koude longer ti bezwen ganny servi pour mezir otour sa basen.”
^ Gourds an Angle.
^ Apepre 7.4 santimet. Vwar Lezot lenformasyon B14.
^ En bat ti 22 lit. Vwar Lezot lenformasyon B14.
^ Sa i en dekorasyon ki ganny mete anler lo en kolonn.
^ Oubyen “saret delo.”
^ Oubyen “dipen prezantasyon.”
^ Oubyen “sa lasanm ki pli anndan.”
^ Vwar Leksplikasyon bann mo.
^ Vwar Leksplikasyon bann mo.
