Dezyenm liv Kronik 5:1-14
5 Alor Salomon ti fini tou travay ki i ti bezwen fer pour lakaz Zeova. Apre, Salomon ti pran bann keksoz ki son papa David ti’n fer vin sen e i ti met zot dan sa lakaz. I ti met larzan,* lor ek tou lezot keksoz dan bann lasanm trezor dan lakaz sa vre Bondye.
2 Sa letan, Salomon ti rasanble bann ansyen dan Izrael, tou sef tribi ek bann sef fanmir.* Zot ti al Zerizalenm pour zot anmenn lars lalyans* Zeova ki ti dan Lavil David, setadir Siyon.
3 Tou bann zonm Izrael ti rasanble devan lerwa pandan lafet* ki ganny fer dan setyenm mwan.
4 Alor, tou bann ansyen dan Izrael ti vini e bann Levit ti anmenn lars.
5 Bann pret ek bann Levit* ti anmenn Lars, latant renyon ek tou bann keksoz sen ki ti dan sa latant.
6 Lerwa Salomon ansanm avek pep Izrael antye ki ti’n ganny demande pour vin zwenn Salomon ti par devan Lars. Zot ti pe sakrifye en kantite mouton ek bef ki personn pa ti kapab konte.
7 Apre sa, bann pret ti anmenn lars lalyans Zeova dan son plas, dan sa lasanm ki pli anndan dan lakaz, setadir Tre Sen. Zot ti met li anba lezel bann seriben.
8 Lezel bann seriben ti ouver gran par lao Lars pour ki sa bann seriben ti kouver Lars ek son bann bar.
9 Sa bann bar ti sitan gran ki ou ti kapab vwar zot bout si ou ti dan lasanm Sen ki par devan lasanm Tre Sen.* Me ou pa ti kapab vwar sa bann bar si ou ti deor. Zot ankor la ziska ozordi.
10 I ti napa nanryen dan Lars eksepte sa de plak ros ki Moiz ti met ladan ler i ti Oreb, ler Zeova ti fer en lalyans avek pep Izrael pandan ki zot ti pe kit Lezip.
11 Ler bann pret ti sorti dan landrwa sen (parski tou bann pret ki ti la ti’n sanktifye* zot lekor, nenport ki group zot ti ladan),
12 tou bann Levit ki ti bann santer ki ti pour Asaf, pour Emann, pour Zedoutoun e pour zot bann garson ek zot bann frer ti’n met bann lenz ki ti’n ganny fer avek bann bon kalite latwal e zot ti pe tyonbo bann senbal, bann lenstriman lakord ek bann larp. Zot ti pe debout dan kote les lotel ansanm avek 120 pret ki ti pe soufle tronpet.
13 Ler sa bann ki ti pe zwe tronpet ek bann santer ti pe loue e remersye Zeova e anmezir ki zot ti pe zwe tronpet, senbal ek lezot lenstriman lanmizik pour loue Zeova, “parski i bon e son lanmour fidel i dire pour touzour,” en nyaz ti ranpli lakaz Zeova.
14 Bann pret pa ti kapab fer zot servis akoz sa nyaz, parski laglwar Zeova ti’n ranpli lakaz sa vre Bondye.
Bann not
^ Larzan, sa metal.
^ Literalman, “sef lakaz paternel.”
^ Vwar Leksplikasyon bann mo.
^ Setadir, Lafet bann Payot.
^ Oubyen “Bann Levit ki pret.”
^ Literalman, “sa lasanm ki pli anndan.”
^ Oubyen “met apar.”
