Dezyenm liv Kronik 8:1-18
8 Salomon ti pran 20 an pour konstri lakaz Zeova ek son prop lakaz.*
2 Apre sa, Salomon ti rekonstri bann lavil ki Iram ti’n donn li e i ti fer bann Izraelit* al reste laba.
3 Salomon ti osi al Amat-Zoba e pran sa lavil.
4 Apre, i ti ranforsi* Tadmor dan dezer ek tou bann lavil ki i ti servi pour stor bann keksoz ladan ki i ti’n konstri dan lavil Amat.
5 I ti osi konstri bann miray, bann baro ek bann bar pour ranforsi Bet-Oronn Anler ek Bet-Oronn Anba.
6 Salomon ti osi ranforsi Baalat e osi tou bann lavil ki i ti servi pour stor bann keksoz ladan, tou bann lavil kot zot ti met bann saret lager, bann lavil kot bann kavalye ti’n stasyonnen e nenport keksoz ki Salomon ti anvi konstri dan Zerizalenm, dan Liban e partou dan pei kot i ti pe dirize.
7 Me tou bann Itit, Amorit, Perizit, Ivit ek bann Zebouzit ki ti ankor la e ki pa ti form parti pep Izrael,
8 zot bann desandans ki ti’n reste deryer dan sa pei e ki bann Izraelit pa ti’n detri, Salomon ti donn zot lord pour travay dir konman lesklav ziska ozordi.
9 Me Salomon pa ti fer okenn Izraelit vin bann lesklav dan son travay parski zot ti son bann gerye, sef son bann zofisye larme e sef son bann dimoun ki anmenn saret lager ek kavalye.
10 Lerwa Salomon ti annan 250 zonm ki ti sef bann formenn e zot ti ansarz bann travayer.
11 Salomon ti osi fer fiy Faraon kit Lavil David e fer li vin reste dan sa lakaz ki i ti’n konstri pour li, parski i ti dir: “Menm si i mon madanm, i pa devret reste dan lakaz David lerwa Izrael, parski bann landrwa kot Lars* Zeova in ganny mete i sen.”
12 Apre, Salomon ti ofer bann lofrann brile* avek Zeova lo lotel Zeova ki i ti’n fer par devan larantre* sa lakaz.
13 Toulezour i ti ofer bann lofrann dapre bann komannman Moiz, pour bann zour Saba, nouvellin e pandan sa trwa lafet ki zot ti fer dan lannen, setadir Lafet Dipen san Lelven, Lafet bann Semenn ek Lafet bann Payot.*
14 I ti osi swazir bann group pret pour zot fer zot bann travay dapre lord ki son papa David ti donnen. I ti swazir bann Levit pour zot fer zot travay ki zot sipoze fer, setadir pour loue Bondye e pour fer zot servis devan bann pret parey zot devret fer toulezour. I ti swazir bann group gardyen baro pour diferan baro, parski David serviter* sa vre Bondye ti’n donn sa lord.
15 Zot ti obei bann lord ki lerwa ti’n donn bann pret ek bann Levit konsernan tou keksoz oubyen konsernan bann stor.
16 Alor, tou bann travay ki Salomon ti annan pour fer ti byen organize,* depi sa zour ki fondasyon lakaz Zeova ti ganny mete ziska ki i ti fini. Alor, lakaz Zeova ti fini ganny konstrir.
17 Apre sa, Salomon ti al Ezyonn-Geber ek Elot ki ti o bor lanmer dan pei Edonm.
18 Iram ti fer son bann serviter anvoy bann bato ek bann maren eksperyanse pour Salomon. Zot ti al Ofir avek bann serviter Salomon e zot ti retourn avek 450 talan* lor pour Lerwa Salomon.
Bann not
^ Oubyen “pale.”
^ Literalman, “bann garson Izrael.”
^ Oubyen “rekonstri.”
^ Vwar Leksplikasyon bann mo.
^ Vwar Leksplikasyon bann mo.
^ Vwar Leksplikasyon bann mo.
^ Vwar Leksplikasyon bann mo.
^ Oubyen “zonm.”
^ Oubyen “byen aranze, fini.”
^ En talan ti pez 34.2 kilo. Vwar Lezot lenformasyon B14.
