Dezyenm liv bann Lerwa 17:1-41
17 Dan douzyenm lannen ki Aaz ti lerwa Zida, Osea garson Ela ti vin lerwa Izrael ler i ti Samari. I ti dirize pour ne-v-an.
2 I ti kontinyen fer sa ki mal dan lizye Zeova me pa parey bann lerwa Izrael avan li.
3 Salmaneser lerwa Asiri ti vin atak li. Osea ti vin son serviter e i ti konmans pey li taks.*
4 Me lerwa Asiri ti dekouver ki Osea ti enplike dan en konplo akoz Osea ti’n anvoy bann mesaze kot So lerwa Lezip e i pa ti al kot lerwa Asiri pour pey son taks parey i ti abitye fer avan. Alor lerwa Asiri ti met li dan prizon e anmar li.
5 Lerwa Asiri ti atak sa pei antye e i ti anserkle lavil Samari pour trwa-z-an.
6 Dan nevyenm lannen ki Osea ti lerwa, lerwa Asiri ti pran lavil Samari. I ti anmenn pep Izrael an egzil dan pei Asiri. I ti fer zot reste Ala ek Abor kot Larivyer Gozann e dan bann lavil bann Med.
7 Sa ti arive akoz pep Izrael ti’n fer pese kont Zeova zot Bondye, ki ti fer zot sorti Lezip e sov zot dan lanmen Faraon lerwa Lezip. Zot ti ador* lezot bondye,
8 zot ti swiv bann koutim bann nasyon ki Zeova ti’n pouse devan bann Izraelit e zot ti swiv bann koutim ki bann lerwa Izrael ti’n etabli.
9 Bann Izraelit ti pe fer bann keksoz ki ti mal devan Zeova zot Bondye. Zot ti kontinyen konstri bann landrwa ladorasyon* dan tou zot lavil, kot latour e dan lavil ki ganny proteze avek bann gro miray.*
10 Zot ti kontinyen fer bann ros sakre* ek bann poto sakre* lo tou montanny e anba tou bann zoli pye dibwa.
11 Zot ti fer monte lafimen zot bann sakrifis lo tou bann landrwa ladorasyon zis parey bann nasyon ki Zeova ti’n pouse devan zot ti fer. Zot ti kontinyen fer bann move keksoz pour ofans Zeova.
12 Zot ti kontinyen ador bann zidol degoutan* menm si Zeova ti’n dir zot: “Zot pa devret fer sa!”
13 Zeova ti fer tou son bann profet ek bann dimoun ki ganny vizyon, kontinyen averti pep Izrael ek Zida par dir zot: “Aret fer sa bann move keksoz ki zot pe fer! Obei mon bann komannman ek mon bann lareg dapre tou lalwa ki mon ti donn zot bann zanset e ki mon ti fer mon bann profet donn zot.”
14 Me zot pa ti ekoute e zot ti antete parey* zot bann zanset ki pa ti demontre lafwa dan Zeova zot Bondye.
15 Zot ti kontinyen rezet son bann lalwa ek son lalyans ki i ti’n fer avek zot bann zanset e osi son bann rapel ki i ti’n donn zot. Zot ti kontinyen ador bann zidol ki pa vo nanryen e zot menm zot, zot ti vin bann dimoun ki pa vo nanryen. Zot ti pe imit bann nasyon otour zot, menm si Zeova ti’n donn zot lord pour pa fer parey sa bann nasyon.
16 Zot ti kontinyen pa obei bann komannman Zeova zot Bondye e zot ti fer de stati pti bef an metal* ek en poto sakre. Zot ti azenou devan tou bann larme dan lesyel e zot ti ador Baal.
17 Zot ti osi bril zot bann garson ek zot bann fiy,* zot ti predir lavenir e get bann siny.* Zot ti kontinyen* fer sa ki mal dan lizye Zeova pour ofans li.
18 Sa ti fer Zeova vreman ankoler avek pep Izrael, alor i ti tir zot devan li. I pa ti les ni enn reste eksepte tribi Zida.
19 Menm pep Zida pa ti obei bann komannman Zeova zot Bondye. Zot osi zot ti swiv menm koutim ki pep Izrael ti swiv.
20 Zeova ti rezet tou desandans pep Izrael e i ti imilye zot. I ti livre zot dan lanmen bann dimoun ki ti depouy zot, ziska ki i ti’n tir zot devan li.
21 I ti separ Izrael avek fanmir* David e zot ti fer Zeroboam garson Nebat vin lerwa. Me Zeroboam ti fer Izrael aret obei Zeova e i ti fer zot fer en pese grav.
22 Pep Izrael ti kontinyen fer menm pese ki Zeroboam ti fer. Zot ti kontinyen fer sa bann move keksoz
23 ziska ki Zeova ti tir pep Izrael devan li zis parey i ti’n dir tou son bann profet. Alor Izrael ti ganny anmennen an egzil dan pei Asiri e zot ankor laba ziska ozordi.
24 Lerwa Asiri ti pran dimoun dan lavil Babilonn, Kouta, Ava, Amat ek Sefarvaim e fer zot al reste dan bann lavil Samari dan plas bann Izraelit. Zot ti pran Samari e reste dan son bann lavil.
25 Ler zot ti’n fek konmans reste laba, zot pa ti ador* Zeova. Alor Zeova ti anvoy bann lyon kot zot e sa bann lyon ti touy plizyer zot.
26 Zot ti dir lerwa Asiri: “Sa bann nasyon ki ou’n anmenn an egzil e fer zot reste dan bann lavil Samari pa konn larelizyon* Bondye sa pei. Alor i pe kontinyen anvoy bann lyon kot zot e sa bann lyon pe touy zot parski personn pa konn larelizyon Bondye sa pei.”
27 Alor lerwa Asiri ti donn sa lord: “Fer enn sa bann pret ki zot in anmenn an egzil, retourn dan sa pei. Fer li reste laba pour li ansenny zot larelizyon Bondye sa pei.”
28 Alor, enn bann pret Samari ki zot ti’n anmenn an egzil ti retourn Betel. I ti reste laba e konmans ansenny zot ki mannyer zot devret ador* Zeova.
29 Me sak sa bann nasyon ti fer zot prop bondye* e met zot dan bann lakaz ladorasyon dan bann landrwa ladorasyon ki bann Samariten ti’n fer. Sak sa bann nasyon ti fer sa dan sa lavil kot zot ti pe reste.
30 Alor, bann zonm Babilonn ti fer Soukot-Benot, bann zonm Kout ti fer Nergal, bann zonm Amat ti fer Asima
31 e bann Avit ti fer Nibaz ek Tartak. Bann Sefarvit ti bril zot bann garson pour Adramelek ek Anamelek, bann bondye Sefarvaim.
32 Menm si zot ti annan en gran respe* pour Zeova, zot ti swazir bann pret parmi sa pep e zot ti fer bann lakaz pour ador bann bondye dan bann landrwa ladorasyon.
33 Zot ti annan en gran respe pour Zeova me zot ti ador zot prop bondye dapre larelizyon* bann nasyon kot zot ti sorti.
34 Ziska ozordi zot ankor pe swiv zot bann larelizyon* ki zot ti ladan depi lontan. Personn pa ti ador* Zeova e personn pa ti obei son bann lareg, son bann zizman, Lalwa ek bann komannman ki Zeova ti donn bann desandans* Zakob. I ti sanz non Zakob e apel li Izrael.
35 Ler Zeova ti fer en lalyans avek zot, i ti donn zot sa lord: “Zot pa devret annan en gran respe pour lezot bondye e zot pa devret tonm azenou devan zot, ni ador zot oubyen ofer sakrifis avek zot.
36 Me Zeova, ki ti fer zot sorti Lezip avek en gran pwisans ek son lanmen for, i sa Enn ki zot devret annan en gran respe pour li. Zot devret tonm azenou devan li e zot devret ofer bann sakrifis avek li.
37 Zot devret toultan swiv byen bann lareg, zizman, Lalwa ek komannman ki i’n ekri pour zot. Zot pa devret annan en gran respe pour lezot bondye.
38 Zot pa devret oubliy sa lalyans ki mon’n fer avek zot e zot pa devret annan en gran respe pour lezot bondye.
39 Me zot devret annan en gran respe pour Zeova zot Bondye akoz li menm ki pou sov zot dan lanmen tou zot bann lennmi.”
40 Me zot pa ti obei e zot ti swiv zot bann larelizyon* ki zot ti ladan depi lontan.
41 Alor, sa bann nasyon ti annan en gran respe pour Zeova me zot ti pe osi ador zot prop stati.* Ziska ozordi, zot bann zanfan ek zot bann pti zanfan in fer parey zot bann zanset ti fer.
Bann not
^ Oubyen “donn li kado.”
^ Literalman, “annan lafreyer pour.”
^ Vwar Leksplikasyon bann mo.
^ Setadir, dan tou landrwa, ki swa kot i annan en ptigin dimoun oubyen en kantite dimoun.
^ Vwar Leksplikasyon bann mo.
^ Vwar Leksplikasyon bann mo.
^ Dan langaz Ebre, sa mo i kapab pe refer avek en mo ki vedir “malpropte zannimo” pour montre ki en keksoz i degoutan.
^ Literalman, “fer zot likou vin red parey likou.”
^ Oubyen “metal ki’n ganny fonn.”
^ Oubyen “kontinyen vann zot lekor pour.”
^ Sa i refer avek predir lavenir par get bann siny ki arive.
^ Literalman, “fer zot bann garson ek zot bann fiy pas dan dife.”
^ Literalman, “lakaz.”
^ Oubyen “annan lafreyer pour.”
^ Oubyen “bann koutim relizye.”
^ Oubyen “annan lafreyer pour.”
^ Oubyen “bann bondye.”
^ Literalman, “lafreyer.”
^ Oubyen “koutim relizye.”
^ Oubyen “koutim relizye.”
^ Oubyen “annan lafreyer pour.”
^ Literalman, “garson.”
^ Oubyen “koutim relizye.”
^ Oubyen “stati ki’n ganny skilpte.”
