Dezyenm liv bann Lerwa 8:1-29
8 Elisa ti dir manman sa garson ki i ti’n fer revin vivan: “Kit sa landrwa ansanm avek ou fanmir. Al reste konman en etranze nenport landrwa kot ou kapab, parski Zeova in dir ki i pou annan en lafanmin dan pei ki pou dire pour set an.”
2 Alor sa madanm ti ale e i ti fer sa ki serviter* sa vre Bondye ti’n dir li. Sa madanm ek son fanmir ti al reste dan pei bann Filisten pour set an.
3 Apre set an, sa madanm ti retournen sorti dan pei bann Filisten e i ti al koz avek lerwa konsernan son lakaz ek son plantasyon.
4 Lerwa ti pe koz avek Geazi serviter Elisa e i ti dir li: “Silvouple, rakont mwan tou sa bann keksoz merveye ki Elisa in fer.”
5 Pandan ki i ti pe rakont lerwa ki mannyer Elisa ti fer en dimoun mor revin vivan, sa madanm ki son garson ti’n revin vivan ti vin kot lerwa pour koz avek li konsernan son lakaz ek son plantasyon. Deswit Geazi ti dir: “Mon senyer lerwa, li menm li sa madanm e sa i son garson ki Elisa ti fer revin vivan.”
6 Lerwa ti demann sa madanm pour rakont sa ki ti’n arive e sa madanm ti rakont li. Apre, lerwa ti dir enn son zofisye: “Rann sa madanm tou sa ki ti pour li e donn li lakantite larzan ki i ti pou’n gannyen avek son bann rekolt dan son plantasyon pandan tou sa letan ki i pa ti la.”
7 Ler Elisa ti al Damas, Benn-Adad lerwa Siri ti malad. Alor zot ti dir li: “Serviter sa vre Bondye i Damas.”
8 Lerwa ti dir Azael: “Pran en kado e al zwenn serviter sa vre Bondye. Dir li demann Zeova si mon pou byen.”
9 Azael ti al zwenn Elisa e i ti anmenn en kado avek li. I ti anmenn tou sort kalite keksoz ki ti annan Damas ki 40 samo ti kapab anmennen. I ti debout devan Elisa e dir: “Benn-Adad lerwa Siri, ou garson, in anvoy mwan kot ou pour demann ou si i pou byen.”
10 Elisa ti dir li: “Al dir li ki i pou byen, me Zeova in montre mwan ki i pou sirman mor.”
11 Elisa ti kontinyen get Azael ziska ki i ti anbarase. Apre, serviter sa vre Bondye ti konmans plere.
12 Azael ti demann li: “Akoz mon senyer pe plere?” I ti reponn: “Akoz mon konnen ki ditor ou pou fer pep Izrael. Ou pou bril zot bann lavil ki ganny proteze avek bann gro miray, ou pou touy zot bann zonm for avek lepe, ou pou koup zot bann zanfan an morso e ou pou koup vant bann madanm ansent.”
13 Azael ti dir: “Ki mannyer ou serviter ki en senp lisyen i kapab fer en keksoz koumsa?” Me Elisa ti dir: “Zeova in montre mwan ki ou pou vin lerwa Siri.”
14 Apre sa, i ti kit Elisa e retourn kot son senyer ki ti dir li: “Ki Elisa in dir ou?” I ti dir: “I’n dir mwan ki ou pou sirman byen.”
15 Me son lannmen, Azael ti pran en dra, tranp li dan delo e pez* lo figir lerwa ziska ki i ti mor. Apre, Azael ti vin lerwa dan son plas.
16 Dan senkyenm lannen ki Zeoram garson Aab ti lerwa Izrael, Zeoram garson Zeosafat ti vin lerwa Zida pandan ki son papa Zeosafat ti ankor lerwa Zida.
17 I ti annan 32 an ler i ti vin lerwa e i ti dirize pour wit an ler i ti Zerizalenm.
18 I ti fer menm parey avek bann lerwa Izrael, zis parey bann ki ti dan fanmir* Aab ti fer, parski i ti’n marye avek fiy Aab e i ti kontinyen fer sa ki mal dan lizye Zeova.
19 Me Zeova pa ti anvi detri Zida parski i ti’n promet David son serviter ki li ek son bann garson pou toultan annan en desandans ki pou dirize* Zerizalenm.
20 Dan letan Zeoram, bann dimoun Edonm ti revolte kont Zida e zot ti swazir zot prop lerwa.
21 Alor Zeoram ek tou son bann saret lager ti al Zair. Pandan lannwit, i ti lager avek bann Edonmit ki ti pe anserkle li ek bann komandan saret lager. I ti ganny laviktwar lo zot e bann solda ti sov dan zot latant.
22 Me depi sa letan, bann Edonmit in kontinyen revolte kont Zida ziska ozordi. Libna osi ti revolte sa letan.
23 Larestan listwar Zeoram, tou sa ki i ti fer in ganny ekrir dan liv listwar bann lerwa Zida.
24 Apre, Zeoram ti mor* e i ti ganny antere avek son bann zanset dan Lavil David. Son garson Aazya ti vin lerwa dan son plas.
25 Dan douzyenm lannen ki Zeoram garson Aab ti lerwa Izrael, Aazya garson Zeoram lerwa Zida ti vin lerwa.
26 Aazya ti annan 22 an ler i ti vin lerwa e i ti dirize pour enn an ler i ti Zerizalenm. Son manman ti apel Atalya ki ti pti zanfan* Omri lerwa Izrael.
27 I ti fer parey fanmir Aab e i ti kontinyen fer sa ki mal dan lizye Zeova parey fanmir Aab, parski i ti’n marye dan fanmir Aab.
28 Alor, i ti al Ramot-Gilead ansanm avek Zeoram garson Aab pour lager avek Azael lerwa Siri me bann Siriyen ti bles Zeoram.
29 Alor, Lerwa Zeoram ti retourn Zezreel pour li rekipere akoz bann Siriyen ti’n bles li ler i ti Rama pe lager avek Azael lerwa Siri. Aazya garson Zeoram ki ti lerwa Zida ti desann Zezreel pour li al vwar Zeoram garson Aab akoz i ti’n ganny blese.*
Bann not
^ Oubyen “zonm.”
^ Oubyen “met.”
^ Literalman, “lakaz.”
^ Literalman, “annan en lalanp.”
^ Literalman, “repoze avek son bann zanset.”
^ Literalman, “fiy.”
^ Oubyen “i ti malad.”
