Dezyenm let pour bann Tesalonisyen 3:1-18
3 Finalman mon bann frer, kontinyen priy pour nou, pour ki parol Zeova* i kontinyen propaze vitman e ganny glorifye, parey i leka parmi zot.
2 Priye pour ki nou ganny proteze kont bann dimoun ki move e mesan parski pa tou dimoun ki annan lafwa.
3 Me Senyer i fidel e i pou fortifye e protez zot kont sa enn move.
4 Deplis, vi ki nou disip Senyer, nou annan konfyans dan zot, ki zot pe swiv e pou kontinyen swiv lenstriksyon ki nou’n donn zot.
5 Ki Senyer i kontinyen reisi gid zot leker pour ki zot kontan Bondye e ki zot ganny sa landirans ki zot bezwen pour swiv Kris.
6 Aprezan mon bann frer, la sa ki nou pe demann zot pour fer o non nou Senyer Zezi Kri, dekoste avek okenn frer ki dezobeisan e ki pa swiv lenstriksyon* ki nou ti donn zot.
7 Parski zot menm zot konn tre byen konman zot devret swiv nou legzanp, parski nou pa ti mal konport nou ler nou ti parmi zot,
8 ni manz manze personn pour nanryen.* O kontrer, nou ti travay dir e rente lizour konman aswar pour ki nou pa vin en fardo pour personn akoz zot ti pou bezwen pran swen avek nou.
9 I pa konmsi nou ti napa drwa* demann zot en keksoz, me nou menm nou ti anvi vin en legzanp pour zot swiv.
10 Anfet, ler nou ti avek zot, nou ti donn zot sa lord: “Si en dimoun pa oule travay, i pa devret manze osi.”
11 Parski nou’n tande ki serten i dezobeisan parmi zot, zot pa pe travay ditou, me zot pe mel dan zafer ki pa konsern zot.
12 Donn lord bann dimoun koumsa e averti zot o non Senyer Zezi Kri ki zot devret viv en lavi trankil kot zot travay pour ganny zot manze.
13 Me zot mon bann frer, pa dekouraze, kontinyen fer sa ki byen.
14 Me si en dimoun pa obei sa ki nou dir zot dan sa let, vey li byen* e aret frekant li pour ki i ava onte.
15 Me selman, pa konsider li konman en lennmi, me kontinyen averti li konman en frer.
16 Aprezan, ki Senyer lape i donn zot lape toultan dan tou fason. Ki Senyer i avek zot tou.
17 Mwan Pol mon fer zot salanm. Sa mon’n ekri avek mon prop lanmen. Sa i mon lekritir ki konfirmen ki tou sa bann let i sorti kot mwan.
18 Ki labonte ekstraordiner nou Senyer Zezi Kri i avek zot.
Bann not
^ Vwar Leksplikasyon bann mo.
^ Oubyen “tradisyon.”
^ Oubyen “san peye.”
^ Literalman, “nou ti napa lotorite.”
^ Oubyen “mark sa dimoun.”
