Amos 7:1-17
7 La sa ki Souvren Senyer Zeova ti montre mwan dan en vizyon: Gete! I ti anvoy en karo sotrel ler bann lagrenn liver* ti pe konmans pouse. Sa ti bann lagrenn ki ti ganny senmen apre ki zerb sek ti’n ganny koupe pour lerwa.
2 Ler sa bann sotrel ti’n fini manz tou vezetasyon dan sa pei, mon ti dir: “O Souvren Senyer Zeova, silvouple pardonn ou pep! Ki mannyer Zakob pou sirviv?* Parski i fay!”
3 Alor, Zeova ti sanz son desizyon.* Zeova ti dir: “Sa pa pou arive.”
4 La sa ki Souvren Senyer Zeova ti montre mwan dan en vizyon: Gete! Souvren Senyer Zeova ti donn lord ki sa pei i ganny pini avek dife. Sa dife ti brile ziska ki lanmer ti sek e i ti osi bril en bout dan sa pei.
5 Apre mon ti dir: “O Souvren Senyer Zeova, silvouple pa fer sa. Ki mannyer Zakob pou sirviv?* Parski i fay!”
6 Alor, Zeova ti sanz son desizyon.* Souvren Senyer Zeova ti dir: “Sa osi pa pou arive.”
7 La sa ki i ti montre mwan dan en vizyon: Gete! Zeova ti pe debout lo en miray ki’n ganny fer avek en filaplon* e dan son lanmen i ti annan en filaplon.
8 Alor, Zeova ti demann mwan: “Ki ou vwar Amos?” Alor, mon ti dir: “En filaplon.” Apre Zeova ti dir: “Mon pou met en filaplon parmi mon pep Izrael. Mon pa pou pardonn zot ankor.
9 Bann landrwa ladorasyon ki pour Izaak pou ganny dezerte e bann landrwa sakre Izrael pou ganny detrir. Mon pou detri bann desandans Zeroboam avek en lepe.”
10 Pret Betel Amazya ti anvoy sa mesaz Zeroboam, lerwa Izrael: “Amos pe fer konplo kont ou, lanmenm la parmi pep Izrael. Sa pei in ganny ase avek sa ki Amos pe dir.
11 Parski la sa ki Amos pe dir, ‘Zeroboam pou ganny touye avek lepe. Izrael pou sirman kit son pei e ganny anmennen an egzil.’”
12 Apre sa, Amazya ti dir Amos: “E ou la profet, sorti la e al Zida. Al travay laba pour ganny ou dipen* e ou pou kapab profetize laba menm.
13 Me ou pa devret kontinyen profetize Betel, parski i landrwa sakre lerwa e kot tanp* en rwayonm i ete.”
14 Apre, Amos ti dir Amazya: “Mon pa ti en profet, ni garson en profet. Me mon ti en gardyen zannimo e mon ti okip bann pye fig sikomor.*
15 Me Zeova ti fer mwan aret vey zannimo. Zeova ti dir mwan: ‘Al profetize avek mon pep Izrael.’
16 Aprezan, ekout parol Zeova: ‘Ou pe dir, “Pa bezwen profetiz kont Izrael e pa bezwen anons zizman kont bann desandans Izaak.”
17 Alor, la sa ki Zeova i dir: “Ou madanm pou vin en prostitye dan lavil. Ou bann garson ek fiy pou ganny touye avek lepe. Ou bann propriyete pou ganny arpante e partaze e ou menm, ou pou mor dan en pei etranze. Izrael pou sirman kit son pei e ganny anmennen an egzil.”’”
Bann not
^ Setadir, pandan Zanvye ek Fevriye.
^ Literalman, “leve?”
^ Oubyen “regrete.”
^ Literalman, “leve?”
^ Oubyen “regrete.”
^ Sa i en zouti ki ganny servi pour fer sir ki miray i drwat.
^ Literalman, “Al manz ou dipen.”
^ Literalman, “lakaz.”
^ Oubyen “mon ti pik fig sikomor.” Fig sikomor i en kalite fig.
