Let pour bann Ebre 4:1-16
4 Alor, vi ki promes pour antre dan son repo i ankor egziste, fer byen atansyon pangar serten parmi zot pa arive antre dan son repo.
2 Parski nou osi nou’n tann sa bon nouvel zis parey nou zanset. Me sa mesaz ki zot ti tande pa ti benefisye zot parski zot ti napa menm lafwa ki sa bann ki ti ekoute.
3 Parski nou ki demontre lafwa, nou antre dan son repo. Konsernan sa repo, i’n dir: “Alor, dan mon lakoler mon ti fer sa serman, ‘Zot pa pou antre dan mon repo,’” menm si li i ti’n fini son travay depi o konmansman lemonn.*
4 Parski kekpar i ti dir sa konsernan setyenm zour: “Bondye ti repoze setyenm zour apre tou son travay”
5 e la ankor i’n dir: “Zot pa pou antre dan mon repo.”
6 I annan serten ki pa ankor antre dan sa repo e sa bann ki ti premye pour tann sa bon nouvel pa ti antre dan sa repo akoz zot dezobeisans.
7 Sanmenm rezon alor ki apre en bon pe letan, Bondye ti dir dan en psonm David, zis parey i’n ganny dir pli boner dan sa let, “Ozordi, si zot ekout son lavwa, pa les zot leker vin dir.” Alor, ankor enn fwa i’n fikse en zour, ki apel “Ozordi.”
8 Parski si Zozye ti’n anmenn zot dan en landrwa repo, Bondye pa ti pou’n koz lo en lot zour apre sa.
9 Sanmenm i reste en zour repo parey Saba pour pep Bondye.
10 Parski sa dimoun ki’n antre dan repo Bondye in repoze an sa ki konsern son travay, zis parey Bondye ti repoze apre son travay.
11 Alor, annou fer tou nou posib pour antre dan sa repo, pour ki personn pa swiv menm legzanp dezobeisans ki nou bann zanset.
12 Parski parol Bondye i vivan e pwisan, i pli koupe ki en lepe ki koup de kote, i menm penetre e separ nanm* ek lespri,* lezo* ek lanmwel lezo e i kapab konn tou panse ek lentansyon ki dan leker.
13 Napa nanryen ki kasyet devan lizye Bondye, me tou keksoz i touni e o kler devan lizye sa enn ki nou bezwen rann kont avek.
14 Alor, vi ki nou annan en granpret ki siperyer ki’n al dan lesyel, Zezi, Garson Bondye, annou kontinyen koz piblikman lo li avek lezot.
15 Akoz nou granpret pa enn ki pa kapab konpran* nou febles, me i enn ki’n ganny teste dan tou keksoz parey nou menm, me i pa’n fer pese.
16 Alor, annou vin kot tronn labonte ekstraordiner* Bondye e koz avek Bondye libreman, pour ki i pran pitye* e demontre labonte ekstraordiner anver nou ler nou bezwen led.
Bann not
^ Sa pe refer avek bann zanfan Adan ek Ev.
^ Oubyen “dimoun.” Sa ki dimoun i ete an deor.
^ Sa ki dimoun i ete anndan.
^ Literalman, “zwen.”
^ Oubyen “ki napa konpasyon pour.”
^ Vwar Leksplikasyon bann mo.
^ Oubyen “demontre mizerikord.”
