Let pour bann Ebre 7:1-28
7 Melkisedek ti lerwa Salenm e pret Bondye Tre O. I ti al zwenn Abraam ler Abraam ti pe retournen apre ki i ti’n touy bann lerwa e Melkisedek ti beni li.
2 Abraam ti donn* li en dizyenm tou keksoz. Premyerman, son non i vedir “Lerwa Ladrwatir” e i ti osi lerwa Salenm ki vedir “Lerwa Lape.”
3 Vi ki i napa en rikord lo lekel son papa, manman, zanset, son nesans oubyen son lanmor me i ti vin parey Garson Bondye, alor i reste pret pour touzour.
4 Pa sa zonm ti vreman enportan si Abraam, sef fanmir,* ti donn li en dizyenm dan tou sa bann pli bon keksoz ki zot ti gannyen dan lager.
5 I vre ki dapre Lalwa, bann garson Levi ki ti annan sa responsabilite konman pret ti ganny lord pour anmas ladim* avek lepep, setadir avek zot frer, menm si zot ti bann desandans Abraam.
6 Me Abraam ti donn ladim avek sa zonm ki pa sorti dan fanmir Levi e Melkisedek ti beni sa enn ki Bondye ti’n fer bann promes avek.
7 Napa okenn dout ki sa enn ki pli gran i beni sa enn ki pli pti.
8 Dan sa premye ka, se bann zonm ki pou mor ki ganny ladim, me dan sa lot ka, i en dimoun ki Lekritir i dir ki i kontinyen viv.
9 I kapab ganny dir ki menm si lepep i donn ladim avek Levi, Levi in pey ladim atraver Abraam
10 parski Levi pa ti ankor ne ler Melkisedek ti al zwenn Abraam.
11 Alor, si i ti posib pour vin parfe gras a bann pret sorti dan fanmir Levi (parski sa ti en laspe dan Lalwa ki ti ganny donnen avek lepep), eski i ti pou neseser pour annan en lot pret parey Melkisedek me ki pa parey Aaron?
12 Parski si sa laranzman pour bann pret i sanze, i neseser pour sanz Lalwa osi.
13 Parski sa zonm ki nou pe koz lo la i sorti dan en lot tribi, ki personn dan sa tribi pa’n deza servi kot lotel.
14 Parski i kler ki nou Senyer i sorti dan tribi Zida, pourtan Moiz pa’n zanmen dir si i ti pou annan bann pret sorti dan sa tribi.
15 Tousala in vin pli kler ankor ler i’n annan en lot pret ki parey Melkisedek.
16 I servi konman pret pa akoz sa tribi ki i sorti ladan parey Lalwa ti demande me akoz i’n ganny sa pwisans ki donn li lavi ki pa kapab ganny detrir.
17 Parski la sa ki’n ganny dir konsernan li: “Ou en pret pour touzour parey Melkisedek.”
18 Alor, vye komannman i ganny met dekote akoz i feb e i pa efikas.
19 Parski Lalwa pa’n fer nanryen vin parfe, me se sa lespwar ki pli meyer ki’n fer keksoz vin parfe e sa i fer nou vin pli pros avek Bondye.
20 Deplis, Bondye ti fer en serman ler i ti fer Zezi vin pret.
21 (Parski vreman i’n annan bann zonm ki’n vin pret san ki Bondye ti fer en serman, me sa enn in vin pret gras a en serman ki Bondye ti fer ler i ti dir: “Zeova* in fer serman e i pa pou sanz son lide, ‘Ou en pret pour touzour’”).
22 Alor, Zezi in vin sa enn ki garanti en lalyans pli meyer.
23 Deplis, i ti annan en kantite pret parski zot ti bezwen ranplas kanmarad akoz zot ti mor e sa ti anpes zot kontinyen servi konman pret.
24 Me akoz Zezi i viv pour touzour, i napa personn ki pou ranplas li konman pret.
25 Alor i kapab osi sov bann ki pe priy Bondye atraver li dan en fason parfe, parski i pou touzour la pour pled pour zot.
26 Parski nou bezwen en granpret ki fidel, inosan, pir, separe avek bann ki fer pese e ki’n ganny mete dan en pozisyon ki pli o ki lesyel.
27 Kontrerman avek bann granpret, i pa bezwen ofer sakrifis tou le zour, premyerman pour son prop pese e apre pour pese lepep parski i ti ofer son prop lekor konman en sakrifis enn fwa pour tou.
28 Parski Lalwa i apwent konman granpret bann zonm ki fer pese, me Bondye, ki ti fer sa serman apre ki Lalwa ti’n ganny donnen, in apwent en Garson ki’n vin parfe pour touzour.
Bann not
^ Literalman, “partaz avek.”
^ Oubyen “patriars.”
^ Vwar Leksplikasyon bann mo.
^ Vwar Leksplikasyon bann mo.
