Egzod 17:1-16
17 Pep Izrael antye ti kit dezer Sin e zot ti al dan en landrwa apre lot, dapre lord Zeova. Finalman zot ti ariv Refidim e zot ti kanpe dan sa landrwa. Me i ti napa delo pour lepep bwar.
2 Alor, bann dimoun ti konmans dispit avek Moiz e dir: “Donn nou delo pour bwar.” Me Moiz ti dir zot: “Akoz zot pe dispit avek mwan? Akoz zot pe kontinyen teste Zeova?”
3 Me sa pep ti vreman swaf e zot ti kontinyen konplent kont Moiz e dir: “Akoz ou’n fer nou sorti Lezip pour nou mor laswaf ansanm avek nou zanfan ek zannimo?”
4 Finalman, Moiz ti dir Zeova: “Ki mon pou fer avek sa pep? Pa mank lontan pour zot konmans saboul mwan avek ros!”
5 Apre, Zeova ti dir Moiz: “Al par devan sa pep e anmenn avek ou detrwa ansyen dan pep Izrael. Ale e pran sa baton ki ou ti tap Larivyer Nil avek.
6 Gete! Mon pou devan ou lo sa gro ros, dan rezyon Oreb. Ou devret tap sa ros, delo pou koule e dimoun pou bwar.” Moiz ti fer sanmenm devan bann ansyen Izrael.
7 I ti apel sa landrwa Masa* ek Meriba* akoz bann Izraelit ti dispit avek Moiz e zot ti teste Zeova par dir: “Eski Zeova i avek nou oubyen non?”
8 Apre, bann Amalekit ti vin lager avek pep Izrael, Refidim.
9 Alor, Moiz ti dir Zozye: “Swazir bann zonm e al lager avek bann Amalekit. Demen mon pou debout anler lo latet montanny avek baton sa vre Bondye dan mon lanmen.”
10 Zozye ti fer parey Moiz ti’n dir li e i ti al lager avek bann Amalekit. Moiz, Aaron ek Our ti mont anler lo latet montanny.
11 Tan ki Moiz ti kit son lanmen anler, bann Izraelit ti ganny laviktwar me dek ki i ti bes son lebra, bann Amalekit ti ganny laviktwar.
12 Ler son lebra ti’n fatige, zot ti pran en ros e fer li asiz lo la. Apre, Aaron ek Our ti tenir son lebra, enn lo sak kote. Zot ti fer sa pour son lanmen reste anler ziska soley kouse.
13 Alor, Zozye ti ranport laviktwar lo bann Amalekit avek lepe.
14 Apre sa, Zeova ti dir Moiz: “Ekri sa ki’n arive dan liv pour zot pa oubliye.* Repet li avek Zozye, ‘Mon pou fer disparet tou bann Amalekit lo later* e personn pa pou mazin zot.’”
15 Apre, Moiz ti konstri en lotel e apel li Zeova-Nisi.*
16 I ti dir: “Parski lanmen bann Amalekit i kont tronn Ya, Zeova pou lager avek zot pour zenerasyon apre zenerasyon.”
Bann not
^ Sa non i vedir “Teste, Leprev.”
^ Sa non i vedir “Dispit.”
^ Oubyen “konman en memoryal.”
^ Literalman, “anba lesyel.”
^ Sa non i vedir “Zeova i mon poto sinyal.”
