Egzod 31:1-18
31 Zeova ti osi dir Moiz:
2 “Gete, mon’n swazir Besalel garson Ouri ki garson Our, dan tribi Zida.
3 Mon pou donn li lespri sen* Bondye pour ki i ganny lasazes, lentelizans ek konnesans pour fer tou sort travay en artizan,
4 pour fer bann keksoz artistik, pour travay avek lor, larzan ek kwiv,
5 pour tay e met an plas bann pyer presye e pour fer diferan keksoz avek dibwa.
6 Mon’n osi swazir Oolyab garson Aisamak, dan tribi Dann pour ed li. Mon pou donn lasazes tou bann artizan ki annan abilite* pour ki zot kapab fer tou sa ki mon’n donn ou lord pour fer:
7 latant renyon, lars Temwannyaz ek kouvertir ki lo la, tou bann keksoz ki ganny servi dan tabernak,
8 latab ek tou son keksoz, sandelye annor ek tou son keksoz, lotel pour lansan,
9 lotel pour lofrann brile* ek tou son keksoz, basen ek son sipor,
10 bann zoli lenz, bann lenz sen pour pret Aaron, bann lenz pour son bann garson ki pou servi konman pret,
11 delwil sen* ek lansan parfimen pour landrwa sen. Zot pou fer tou sa ki mon’n donn ou lord pour fer.”
12 Zeova ti osi dir Moiz:
13 “Koz avek bann Izraelit e dir zot, ‘Zot devret sirtou obei lalwa konsernan mon bann saba, parski sa i en siny ant mwan ek zot pour zenerasyon apre zenerasyon pour ki zot konnen ki mwan Zeova mon’n sanktifye zot.*
14 Zot devret obei lalwa Saba parski i en keksoz sen pour zot. En dimoun ki kas sa lalwa i devret ganny met amor. Si en dimoun i fer nenport ki travay sa zour, sa dimoun i devret ganny met amor.
15 Zot kapab travay pour sis zour me setyenm zour i en saba e zot devret repoze. Sa i en keksoz sen pour Zeova. Nenport dimoun ki travay zour Saba i devret ganny met amor.
16 Bann Izraelit i devret obei lalwa Saba. Zot devret obei lalwa Saba zenerasyon apre zenerasyon. Sa i en lalyans permanan.
17 Sa i en siny permanan ant mwan ek pep Izrael parski Zeova ti kree lesyel ek later pandan sis zour e setyenm zour, i ti aret travay e repoze.’”
18 Dek ki Bondye ti’n fini koz avek Moiz lo Montanny Sinai, i ti donn li sa de plak Temwannyaz, setadir sa de plak an ros ki Bondye ti’n ekri lo la avek son ledwa.
Bann not
^ Vwar Leksplikasyon bann mo.
^ Literalman, “bann ki annan leker saz.”
^ Vwar Leksplikasyon bann mo.
^ Sa delwil ti ganny servi pour apwent bann pret ek lerwa.
^ Oubyen “met zot apar.”
